ރާއްޖޭގައި ޒޫ ފަދަ ތަންތަން ނެތް ނަމަވެސް މުޅި ދުނިޔެ އަށް ބަލާ އިރު ޖަނަވާރު ގެންގުޅުމަކީ ވަރަށް ގިނައިން ކޮށް އުޅޭ ކަމެކެވެ. މިގޮތަށް އެއްގަމު ޖަނަވާރާއި މޫދުގައި އުޅޭ މަސްމަހާއި މެހި ވެސް ގެންގުޅޭ އިރު، އެންމެ އާއްމުކޮށް މިގޮތަށް ގެންގުޅޭ އެއް ޖަނަވާރަކީ ކޯމަހެވެ.
ޕޫލް ނުވަތަ ޓޭންކް ފަދަ ތަންތަނުގައި ކޯމަސް ގެންގުޅުމާއި، ކޯމަހާއި އެކުގައި ފޮޓޯ ނެގުން އަދި ކޯމަސް ޓްރެއިންކޮށްގެން އެކި ކަހަލަ ހުނަރު ދެއްކުމަކީ އާއްމުކޮށް ކޮށް އުޅޭ ކަމެކެވެ.
ނަމަވެސް މިހާރު ވުޖޫދަށް އައިސްފައިވާ ރޮބޮޓް ކޯމަސްތަކާއި އެކު ކޯމަސް ހިފަހައްޓައިގެން ގެންގުޅުމުގެ ސަގާފަތް ހުއްޓުމަކަށް ގެނައުމުގެ އުންމީދު ވަނީ އާވެފައެވެ. މިއާއި އެކު ތީމު ޕާކުތަކަށް އީޖާބީ ބަދަލެއް އަންނާނެ ކަމަށް ބެލެވެއެވެ.
ދިރިހުރި ކޯމަހަކާއި ދާދި އެއްގޮތްކޮށް ހަދާފައިވާ ރޮބޮޓް ކޯމަސްތަކަކީ އެމެރިކާގެ އިންޖިނިއަރިން ފާމެއްގެ އުފެއްދުންތަކެކެވެ.
މިހާތަނަށް މިފަދަ 3000 ކޯމަސް އުފައްދާފައިވާ އިރު، އެ ރޮބޮޓްތަކަކީ ފަސް މިލިއަން އެެމެރިކާ ޑޮލަރުގެ އަގު ހުރި ކޯމަސްތަކެކެވެ.
މެޑިކަލް ގްރޭޑް ސިލިކޯން އިން އުފައްދާފައިވާ މި އުފެއްދުމުގައި ބޭނުންކޮށްފައިވާ މެޓީރިއަލް އަކީ އެނަކޮންޑާ އާއި ޑީޕް ބްލޫ ސީ ފަދަ ފިލްމްތަކުން ފެންނަ އާޓިފިޝަލް ޖަނަވާރުތައް އުފައްދާފައިވާ މެޓީރިއަލްއެވެ.
މި އުފެއްދުންތަކާ އެކު އަސްލު ކޯމަސްތައް ހައްޔަރުކޮށްގެން އެ އެއްޗެހީގެ ގުދުރަތީ މާހައުލާއި ދުރުކުރުމުގެ އުންމީދު ވަނީ އާވެފައެވެ.
އެ ރޮބޮޓް ކޯމަސްތައް ބަލާ ބެލުމަށް އަސްލު ކޯމަހާއި ތަފާތުކަން ފާހަގައެއް ނުކުރެވެއެވެ.
މިފަދަ ގޮތަކަށް ވައިޓް ޝާކް އާއި ފެނުގައި ދިރިއުޅޭ އެހެން ޖަނަވާރު ވެސް އުފެއްދޭނެ ކަމަށް މި ކޯމަސްތައް އުފެއްދި ކުންފުނިން ބުނެއެވެ.
އެޖް އިނޮވޭޝަންސް ނަމަކަށް ކިޔާ ކުންފުނިން އުންމީދު ކުރަނީ މިފަދަ އުފެއްދުންތަކާއެކު ކަނޑު އަޑީގެ ދިރުންތައް އާންމުންނަށް ފުރިހަމައަށް ދައްކައި ދިނުމެވެ.