(ފުވައްމުލައް ސިޓީ) ޕެލަޖިކާ ޑައިވާސް ޑައިވް ސެންޓަރުން ފިންސާއި ޑައިވް ކުރަން ބޭނުންވާ ސާމާނު ހިފައިގެން، ދޯންޏެއްގައި ފީނާލުމަށް ހަމަޖެހިފައި އޮތް ސަރަހައްދަށް ގޮސް، ޑައިވަރުންގެ އިރުޝާދާއި އެކު، ކަނޑުގެ އަޑިއަށް ފީނާލިތާ މާ ގިނައިރުތަކެއް ނުވަނީސް ފެނުނީ ރާއްޖޭގެ ކަނޑުގެ އަޑީގެ ހިތްގައިމުކަމެވެ. އުމުރުން މިވީހާ ދުވަހެއް ވީއިރު ވެސް މިހާ ރީތި މަންޒަރެއް ކަނޑު އަޑިއަކުން ނުދެކެމެވެ. އޭގެ އިރުކޮޅެއް ފަހުން ދެން ފެނުނު މަންޒަރު މާ ބިރުވެރިއެވެ. ލޮލުގައި އަޅައިގަތީ ވަށައިގެން އެނބުރެމުން ދިޔަ މިޔަރުތަކެވެ.
މިޔަރުތަކުގެ ނަޒަރު ހުއްޓިފައި ހުރީ އޮކްސިޖަން ފުޅި އަޅައިގެން ކަނޑު އަޑީގައި ތިބި މީހުންނަށް ވުރެ ބޮޑަށް އެތާ އުޅެމުން ދިޔަ މަސްތަކަށެވެ. ބައެއް މިޔަރުތައް މަސްތައް ކަމުން ދިޔައީ އެއްވެސް ޖެހިލުމެއް ނެތިއެވެ. ކަނޑު އަޑީގައި "ރަސްކަން" ކުރަނީ އެސޮރުމެންނޭ ބުންޏަސް ދޮގަކަށް ނުވާނެއެވެ. އެއްވެސް ދިރުމެއް އެސޮރުމެންނާ ދިމާކޮށްލާ ތަނެއް ނުފެނެއެވެ. އިންސާނަކަށް ވެސް ކައިރިވާން ނުކުރޭހާ އެސޮރުމެން ބިރުވެރިއެވެ.
ޏ. ފުވައްމުލައް ޚާއްސަވާ ސަބަބުތައް ވަރަށް ގިނައެވެ.އެއީ ރާއްޖޭގެ އަތޮޅުތަކުގެ ތެރެއިން ވަކިން އޮންނަ ހަމައެކަނި އަތޮޅެވެ. ރަށުގެ ވަށައިގެން ބޮޑު ފަރެކެވެ. ހިތްގައިމު މޫދަކާއި ގޮނޑުދޮށެކެވެ. ރަށުގެ ރައްޔިތުން އެހާމެ ހިތްހެޔޮވެފައި އޯގާތެރިއެވެ. ރަށުން ތަރައްގީގެ ކުލަތައް ފެނެއެވެ.. ނަމަވެސް ފުވައްމުލަކުގައި ހޭދަކުރި ދެ ހަފްތާއެއްހާ ދުވަހުގެ ތެރޭގައި އެންމެ ތަފާތު ތަޖުރިބާއެއް ކުރެވުނީ ކުރިން ދެންނެވުނު ޝާކް ޕޮއިންޓުންނެވެ. ފުވައްމުލަކަށް އަންނަ ގިނަ މީހުން، އެ ސަރަހައްދުގެ ރީތިކަން ބަލައިލައިފައި ނޫނީ ރަށުން ފުރައިގެން ނުދެއެވެ. އެ ރަށަށް އަންނަ ފަތުރުވެރިންގެ "މަންޒިލަކީ" ވެސް އެއީއެވެ. ފުވައްމުލައް ތަފާތުވާ އެއް ސަބަބަކީ ވެސް އެއީއެވެ.
ފުވައްމުލަކަށް ޒިޔާރަތް ކުރުމަށް ފަހު، ރަށުގެ ވަށައިގެންވާ ފަރުތަކާއި ކަނޑުގެ އަޑީގެ ރީތިކަން ބަލާ ނުލައި ރަށުން ފުރުމުން ދަތުރު ފުރިހަމަ ނުވާނެތީވެ، ރަށުގެ ޑައިވިން ސްކޫލަކާއި ގުޅިގެން ފަރުތަކާއި ކަނޑު އަޑީގެ ރީތިކަން ބަލާލަން ދިއުމަށް އަޅުގަނޑުވެސް ނިންމީމެވެ.
އެގޮތުން ރަށުގެ ބަނދަރު ސަރަހައްދުގައި ހުންނަ "ޕެލަޖިކް ޑައިވާސް" ނަމަކަށް ކިޔާ ޑައިވިން ސްކޫލަކުން، ރަށުގެ މަޝްހޫރު ޝާކް ޕޮއިންޓް ބަލަން ދިއުމަށް ބުކިންގް ހެއްދީމެވެ. މިއީ ގިނަ އަދަދެއްގެ ފަތުރުވެރިން ވެސް ކޮންމެ ދުވަހަކު ކުރާ ކަމަކަށް ވުމުން ބުކިންތައް ދަނީ ވަރަށް ބާރު ބޮޑުކޮށެވެ. ނަމަވެސް އަޅުގަނޑުގެ ނަސީބު ރަނގަޅުކަމުން ޖާގައެއް ހަމަޖެހުނެވެ. އެވަގުތުން ފެށިގެން އެބުނާ ސަރަހައްދަކަށް ދިއުމަށް ކެތް މަދުވިއެވެ.
މެންދުރު ނަމާދު ކޮށްލައިގެން ޑައިވް ސެންޓަރަށް ގޮސް ޑައިވިން އާލާތްތައް ބަލައި ހެޔޮވަރު ކުރުމަށް ފަހު، ޕެލަޖިކް ޑައިވާސްގެ ދޯނީގައި ޝާކް ޕޮއިންޓާ ދިމާލަށް މިސްރާބު ޖެހީމެވެ. އެވަގުތު ދޯނީގައި ތިބި ފަތުރުވެރިންނާއި ދިވެހިންނަށް ޑައިވް ސެންޓަރުގެ އިންސްޓްރަކްޓަރުން ދިޔައީ ބްރީފް ކޮށްދެމުންނެވެ. ޑައިވް ޕާޓްނަރުން ބަހައި، ކުރަންވީ ކަންކަމާއި ނުކުރަންވީ ކަންކަން ކިޔައިދީ އޮޅުންފިލުވައި ދެމުންނެވެ.
މީގެ ކުރިން އަޅުގަނޑު ދުވަހަކުވެސް މާ ކަނޑުގެ ތެރެއިން މިޔަރެއް ނުދެކެމެވެ. އެހެންކަމުން އެ ދުވަހު އަޅުގަނޑު ހުރީ، އެ މިޔަރުތަކާއި އެކު ކަނޑު އަޑީގައި ފީނާލުމަށް ނުހަނު ބޭނުންވެފައެވެ. ދިހަ ވަރަކަށް މިނެޓު ތެރޭ ޝާކް ޕޮއިންޓާއި ހިސާބަށް ފޯރައިފިއެވެ. އެއަށްފަހު ފަހަރަކު މީހަކު ފުންމާލަން ފެށިއެވެ.
ކަނޑު އޮޅިއަށް ފުންމާލައި ފުރަތަމަ ބަލައިލީ ފަރުގެ ރީތިކަމެވެ. މިއީ ކުރިން ދުވަހަކުވެސް ފެނުނު މަންޒަރެއް ނޫނެވެ. ރާޅު ޖަހާ ހިސާބުން ފަރު ތިރިވަމުން އައިސް ކަނޑު އޮޅިއާ ހިސާބުގައި އެތައް މީޓަރެއް އަޑިއަށް ގުދުރަތީ ފާރެއް ވަނީ އުފެދިފައެވެ. އެތަނުގައި ބަލާލަން ރީތި އެތައް މަސްތަކެއް އަޅުގަނޑާއި އެކު ފީނަމުން ގެންދިޔައެވެ. އެއްވެސް ކަހަލަ ޖެހިލުމެއް ނެތި، މިނިވަންކަމާއި އެކުގައެވެ.
އިރުކޮޅެއް ފަހުން އިންސްޓްރަކްޓަރުގެ އިރުޝާދުގެ މަތިން ހުރިހާ އެންމެން އޭނާގެ ފަހަތުން ދިޔައީމެވެ. މާ ގިނަ އިރުތަކެއް ނުވެ އަޅުގަނޑަށް ހީވީ "ހިތް އަތަށް" އައިހެންނެވެ. މާ ދުރު ނޫން ހިސާބަކުން ފެނުނީ މިޔަރުތަކެކެވެ. ހީވީ ދެންމެ އައިސް ހަމަލާދީފާނެހެންނެވެ.
ނަމަވެސް ބްރީފިންގައި ދިން އިރުޝާދުގެ މަތިން ހުރިހާ އެންމެންވެސް ތިބީ ހަމަޖެހިލައިގެންނެވެ. އިންސްޓްރަކްޓަރު ގޮސް މިޔަރުތައް ކައިރީ އުޅެލާފައި އެތަނަށް ކައިރިވުމަށް އިޝާރަތް ކުރުމުން މަޑުމަޑުން ދިޔައީއެވެ. ގާތްގަނޑަކަށް 5-7 ފޫޓުގެ ދިގުމިން ހުރި ހައެއްކަ ޓައިގާ ޝާކް އެތަނުގައި އުޅުނެވެ. ރީތި ފޮޓޯ އާއި ވީޑިއޯތައް ނެގުމަށްވެސް ފުރުސަތު ލިބުނެވެ. ގިނަ ބަޔަކު ހީކުރާ ގޮތާއި ޚިލާފަށް އެ މިޔަރުތައް ވަރަށް ރަހުމަތްތެރިއެވެ. އިންސާނުންނަކީ އެ މިޔަރުތަކުގެ ކާނާ ނޫންކަން ހާމަވިއެވެ. އެއީ އެ ސަރަހައްދަށް ދޫކޮށްލާފައި ތިބި "އޮޅު" މިޔަރުތަކެއް ހެން ހީވާ ފަހަރު ވެސް ދިޔައެވެ.
މީގެ ކުރިން ތައިލޭންޑުގައި ހަތަރު މިނިކާވަގު އޮތް ކޮއްޓެއް ތެރެއަށް ވަދެވުމަށްވުރެވެސް މި މިޔަރުތަކަކާއެކު ފީނާލެވުމުން މާ ހިތްހަމަޖެހުނެވެ. އެއީ ސްކޫބާ ޑައިވިން އަކީ ސަމާލު ނުވެއްޖެ ނަމ ވަރަށްވެސް ނުރައްކާތެރި ކަމަކަށްވުމާއި ވެސް އެކުގައެވެ. މިކަން ކުރުމާއެކު ނަފްސަށް އޮތް އިތުބާރު ބޮޑުވެގެން ހިނގައްޖެއެވެ. ކަނޑު އަޑީގެ ރީތި މަންޒަރުތައް އަނެއްކާވެސް ފެންނާނެ ދުވަހަކަށް އިންތިޒާރު ކުރެވެން ފެށުނެވެ.
ފުވައްމުލަކުގެ ޝާކް ޕޮއިންޓް ފަތުރުވެރިންގެ މެދުގައި ދުވަހެއް ދުވަހަކަށް މަގްބޫލުވަމުން އަންނައިރު، މިރަށަށް އައިސް މިކަން ކުރަން ބޭނުންވާ ފަރާތްތަކަށް ޕެލަޖިކް ޑައިވާސްގެ ފަރާތުން އަންނަނީ ބޮޑު އެހީތެރިކަމެއް ދެމުންނެވެ. މި ރަށުގައި ހައެއްކަ ޑައިވް ސެންޓަރު ހުންނައިރު، ޕެލަޖިކް ޑައިވާސްގެ މަގުބޫލުކަން ފަތުރުވެރިންގެ ތެރޭގައި ވަރަށް ބޮޑެވެ.
ދިވެހިރާއްޖެ އަކީ ވަށައިގެން ކަނޑު އޮންނަ ގައުމަކަށް ވާއިރު، ދުނިޔޭގެ އެކި ކަންކޮޅުތަކުން ކޮންމެ އަހަރަކުވެސް އެތައް ލައްކަ ފަތުރުވެރިންނެއް، ކަނޑާއި ފަރުތަކުގެ ރީތިކަން ބެލުމަށް ރާއްޖެ އާދެއެވެ. އުމުރުގައި ކަނޑުގެ ރީތިކަން އެއް ފަހަރު ނަމަވެސް ބަލައި ނުލުމަކީ ލިބޭނެ ދެރައެއް ކަން މިކަން ތަޖުރިބާ ކޮށްފައިވާ ކޮންމެ މީހަކުވެސް އިއްތިފާގުވާނެއެވެ.
ކަނޑު އަޑީގައި މިޔަރުތަކާއެކު ފީނަން ގޮސް އުޅުނު އިރު ހީވީ އުދުހެވޭ ހެންނެވެ. ބިމަށް ދަމާ ބާރެއް ނެތި، ބޭނުން ގޮތަކަށް ކަނޑުގެ އަޑީގައި 45 ވަރަކަށް މިނެޓު އުޅުމުގެ ފުރުސަތު ލިބުނެވެ. މިއީ އަޅުގަޑުގެ ހަޔާތުގައި ކުރެވުނު އެންމެ ތަފާތު އަދި އެންމެ އުފާވެރި އެއް ތަޖުރިބާއެވެ.
އެއް ގަޑިއިރުގެ މި ދަތުރަކީ ދުވަހަކު ވެސް ހަނދާނުން ފޮހެލެވޭނެ ދަތުރެއް ނޫނެވެ.
"ވަގުތު" އިން ފުވައްމުލަކަށް ކުރާ "ހޭރިޔާ" ދަތުރުގެ ސްޕޮންސަރުންނަކީ ރިލެކްސް ފެރީ ސާވިސް، ފުވައްމުލަކު ސިޓީ ކައުންސިލް، ރިއަލް ބްރީޒް ރެސްޓޯރަންޓް، ހައިވޭ29 ރެސްޓޯރަންޓް އަދި ރޯޔަލް ރެސްޓޯރަންޓް ޕަބްލްސް ބައި ރޯޔަލްއެވެ.
ވަގުތު ނޫހަށް ވަރަށް ބޮޑަށް ޝުކުރިއްޔާ ތަ ފާތުކުރިޔަސް ބޮޑުވަރު އައްޑު އާ ބެހޭގޮތުން ލިޔަން އެގުނީ ހަރުކައްޓޭ މަޑުކައްޓޭ ކިޔާ ފަ
މަނޒަރު ފޮޓޯ ނަގަން ދާބަޔަކާ އެއްއިރަކުވެސް ހަމަލާއެއް ނުދޭ. ޢުނދަގޫވަނި މަސްވެރިންނަށް. ޢެމީހުންގެ ބޭނުން ތަކަށް ދިރިއުޅުމުގެ މަސްވެރިކަމުގައި ގަންނަ މަސް މިޔަރުޚާލާތީ.
ކޮންމެ ދިވެއްސަކުވެސް ކުރަން ޖެހޭ ކަމެއް. އެކަމު ގިނަ މީހުން ނުކުރޭ. ހީވަނީ ތަފާތު ކަމެއް ނޫނޭ އެވެރިންނަށް.
Varah salhi
ކަނޑުގެ ދިރުންތަށް އެއްތަނަކުން އެންމެ ގިނައިން ފެންނަ ތަނެއް ރާއްޖެ އިސްތިހާރު ކުރަން ވެސް ދެއްކީ އަރިއަތޮޅު މާޔާތިލަ ބީބީސީން ލައިވް ކޮށް 24 ގަޑިއިރު ދެއްކި އެތަނަކީ އެންމެ ގިނަ ވައްތަރުގެ މިޔަރު އެއްތާކުން އެންމެ ގިނައިން ފެންނަ އެއްތަން އަނެއްކާ ވަރަށްމަދުން ފެންނަ ފުރޮގް ފިސް ވެސް ފެންނަ ތަނެއް، މުޅި ދުނިޔޭންވެސް ޖުމްލަކޮށް މުަލި އަހަރުގެ ދުވަސްތަކަށް ބަލާއިރު ފެހުރިހި އެންމެ ގިނައިން ފެންނަނީ މިއަތޮޅު ދިގުރަށު ބޭރުން އަދި ކޮބާ ފިސް ހެޑް، ކަދޮޅުދޫ ހައުސް ރީފް، މާޅޮސް ތިލަ ކުޑަރށް ތިލަ ދިގުރަށް ކަނޑުގަ ހުރި ތިލަތައް މަންތާ ޕޮއިންޓް އެއްލައިދޫ ހައުސްރީފް ގަހުރި ކޭވް އަކީ މުޅި ދުނި ޔެއްވެސް މައްސޫރު ތަނެއް ބުރޯ އާދޭ ބަލާލަން ރީތި ވަރަށް ގިނަ ތަން ތަން ފެންނާނޭ.
ބުރޯ މިހުރިހާ ދުހު ބޭރުދުނިޔެއަށް ހަމަ އެކަނި އިސްތިހާރު ކުރަމުން އައި އަތޮޅުތަކަކީ ކ.އ އަދި ބ، ހަމަ އެހެން އަތޮޅުތަށް މަޝްހޫރު ނޫނަސް އަޖައިބު ކުރުވަނިވި ރީތި ކަނޑުއަޑީގެ މަންޒަރުތަކާއި ރައްތަކުގެ ރީތި ނަލަ ތުނޑި އެއަތޮޅުތަކުގައިވެސް އެބަހުރި.
ބަޔަކަށް ބަލައިނުގަނެވުނަސް ފުވައްމުލަކު ފަ ރިކެޑެ މިއީ މިގައުމުގައި ޔަޤީންކަމާއި އެކު ކޮންމެ ދުވަހަކު ޓައިގަ ރ ޝާކް (ފެމުނު މިޔަ ރު)ފެންނަ ސަ ރަޙައްދު ކަމުގައި މިއަދު ޔުނެސްކޯ ބޔޮސްފިއަ ގައިވެސް ހިމެނެމުންދާ ތަނެއް.
ވަރަށްދެރަ. މިޔަރާހެދި އެހެންމަސްތަކަށް އެއްވެސްހިމާޔަތެއްނެތީމަ!
އޮކްސިޖަން އޯ!!
ހަމަހުވަަ ތީ މިޔަރެއް ނޮޮން ސަރްކެއް ކަންނޭންގެ......................................................................................................