2 Faraathun Ves Foareegai Campaign Nimmaalaifihttps://t.co/8KI6ur2mVu https://t.co/8KI6ur2mVu

— Vaguthu Online (@VaguthuOnline) September 22, 2018

ހާއްސަ ދުއާ އަކާއެކު އިދިކޮޅު ކޯލިޝަންގެ ކެމްޕެއިން ހަރަކާތްތައް ނިންމާލައިފި. މިހާރު އިބޫ ގެންދަވަނީ އެއްވެފައިތިބި ސަޕޯޓަރުންނާ ސަލާމް ކުރައްވަމުން

ރައީސް ޔާމީން: އިދިކޮޅު ފަރާތްތަކުން ފައިސާ ބަހަމުންދަނީ އިބްރަހީމް މުޙައްމަދު ޞާލިހަށް ތާއީދު ނެތީމަ. އެމްޑީޕީ ހަތް ފެނުން ކެއްކިޔަސް ބަދަލެއް ނާއްނާނެ. އެމްޑިޕީ އާ ގުޅެންޏާ އަހިވަކަކާ ޖެހި އަހިވަކެއް ފާވާނެ.

ޕީޕީއެމުން މާލޭގައި ބާއްވާ ކެމްޕޭނުގެ އެންމެ ފަހުގެ ޙަރަކާތުގައި ރައީސުލްޖުމްހޫރިއްޔާ އަބްދުﷲ ޔާމީން އަބްދުޤައްޔޫމް މިހާރު ދަނީ ބައިވެރިވެވަޑައިގަންނަމުން.

އިދިކޮޅު ކޯލިޝަނުން ކެމްޕެއިން ނިންމުމަށް މިއަދު މާލޭގައި ބޭއްވި ޕެރޭޑް ނިންމާލަން ގިނަ އަދަދެއްގެ ސަޕޯޓަރުން ވަނީ އާޓިފިޝަލް ބީޗް ސަރަހައްދަށް އެއްވެފައި. ކުޑަ އިރުކޮޅެއްގެ ތެރޭގައި ސަޕޯޓަރުންނާ މުހާތަބުކޮށް އިދިކޮޅު ރިޔާސީ ކެންޑިޑޭޓް އިބްރާހިމް މުހައްމަދު ސޯލިހް (އިބޫ) ވާހަކަފުޅުދައްކަވާނެ

ގުޅިފައިވާ އިއްތިހާދާއި ޕީޕީއެމްގެ ރެލީތައް މާލޭގައި ކުރިއަށްދާއިރު، ދެފަރާތަށް ތާއީދުކުރާ ފަރާތްތަކުން ދަނީ މަގުމައްޗަށް ނިކުމެ ބައިވެރިންނަށް ހިއްވަރުދެމުން.

ކެމްޕޭނު ނިންމަން ޖެހޭ ވަގުތު ކުޑަތަންވަމުން ދާތީ، މާލޭގައި ކުރިއަށްދާ ޕީޕީއެމްގެ ވެހިކަލްބުރު މިހާރު ކުރިއަށްދަނީ ވަރަށް ބާރަށް. މި ވެހިކަލްބުރު މިހާރު އަނެއްކާވެސް ކުރިއަށްދަނީ މަޖީދީ މަގުން.

އައްޑޫގައި ވެސް ސަރުކާރަށް ތާއީދުކުރާ ފަރާތްތަކުން ކެމްޕޭނުގެ އެންމެ ފަހުގެ ހަރަކާތްތައް ދަނީ ހިންގަމުން. އެގޮތުން މިހާތަނަށް އެ ސިޓީގައި ބާއްވާ އެންމެ ބޮޑު ވެހިކަލް ބުރު މިހާރު ދަނީ ކުރިއަށް. ގުޅިފައިވާ ރަށްތަކުން ޕީޕީއެމަށް ތާއީދުކުރާ ފަރާތްތަކުން ބައިވެރިވާ މި ވެހިކަލްބުރުގައި ހިތަދޫ ލިންކުރޯޑާއި ގުޅިފައިވާ ފަޅު ރަށްތަކާއި ހަމައަށް ބައިވެރިން އެބަތިބި.

މާލޭގައި ކުރިއަށްދާ ޕީޕީއެމްގެ ވެހިކަލްބުރު ބޮޑުތަކުރުފާނު މަގަށް އަޅުވައިފި.

މަޖީދީ މަގުން ޕީޕީއެމްގެ ވެހިކަލްބުރު ކުރިއަށް ދަނިކޮށް، އިދިކޮޅު ފަރާތްތަކުން ބާއްވާ ހިނގާލުން އެ ދިމާލަށް މިސްރާބު ޖަހާފައި ވަނިކޮށް އެފަރާތްތައް މާވެޔޮ މަގަށް ވައްދައިފި. ޕީޕީއެމްގެ ވެހިކަލްބުރު ވަނީ އެހިސާބާ މާ ދުރުނޫން ހިސާބެއްގައި ހުއްޓުވާފައި. ދެފަރާތުގެ ރެލީގެ ދެމެދުގައި އެސްއޯ ފުލުހުން ހަރަކާތްތެރިވަމުންދޭ. އިދިކޮޅު ހިނގާލުމުގައިވެސް އެތައް ސަތޭކަ ބަޔަކު ދަނީ ބައިވެރިވަމުން.

މާލޭގައި ޕީޕީއެމުން ބާއްވާ ވެހިކަލް ބުރުގައި 2500 އަށްވުރެ ގިނަ ސައިކަލް ބައިވެރިވަމުންދާ ކަމަށް ބެލެވޭ. މީގެ އިތުރުން ގިނަ ޢަދަދެއްގެ ޕިކަޕާއި ކާރުގައިވެސް ގިނަ ބަޔަކު ދަނީ މި ހަރަކާތުގައި ބައިވެރިވަމުން. މި ވެހިކަލްބުރުގައި ބައިވެރިވާ ކޮންމެ ޕިކަޕެއްގައިވެސް 20 އާއި 30 އާއި ދެމެދުގެ ޢަދަދަކަށް މީހުން އެބަތިބި.

ރިޔާސީ އިންތިޚާބުގެ ކެމްޕޭނުގެ ހަރަކާތްތައް ކުރިއަށްދާ މި ދަނޑިވަޅުގައި މާލޭގެ ސޯލްޓް ކެފޭ ރެސްޓޯރެންޓު ސަރަޙައްދު ފުލުހުން ވަނީ ބަންދުކޮށްފައި. މަޢުލޫމާތު ލިބޭގޮތުގައި މި ސަރަޙައްދު ބަންދުކޮށް ފުލުހުން ތަހުޤީޤު ކުރަމުން ދަނީ ޤާނޫނާއި ޚިލާފު ކަމެއް ހިންގަމުންދާތީ. ނަމަވެސް އެކަމަކީ މި އިންތިޚާބާއި ގުޅުންހުރި ކަމެއްކަމެއް އަދި އެނގިފައެއް ނުވޭ.

ޕީޕީއެމް ކެމްޕޭނު ހަރަކާތްތައް ކުރިއަށްދާ މާލޭގެ މަޖީދީ މަގުގައި ޕީޕީއެމަށް ސަޕޯޓުކުރާ އެތައް ހާސް ބަޔަކު ޖަމާވެ އެބަތިބި. މަޖީދީ މަގުގެ އެއްކޮޅުން އަނެއްކޮޅަށް މީހުން ވަނީ ވެހިކަލްތަކުގައި އެއްވެފައި.

މާލޭގެ އިތުރުން ރާއްޖޭގެ އެކި ރަށްރަށުގައިވެސް، ކެމްޕޭނުގެ ފަހުގެ ޙަރަކާތްތައް ސަރުކާރަށް ތާއީދުކުރާ ފަރާތްތަކާއި އިދިކޮޅު ފަރާތްތަކުން ދަނީ ފޯރީގައި ކުރިއަށް ގެންދަމުން.

ޕީޕީއެމްގެ ފަރާތުން މާލޭގައި ބާއްވާ އެންމެ ފަހުގެ ކެމްޕޭން ޙަރަކާތްތައް ފަށައިފި. މި ވެހިކަލް ބުރު ފަށާފައިވަނީ މަޖީދީ މަގުން. ޕީޕީއެމް އާއި ރައީސް ޔާމީނަށް ސަޕޯޓުކުރާ ގިނަ ޢަދަދެއްގެ ބަޔަކު ދަނީ މި ވެހިކަލްބުރުގައި ބައިވެރިވަމުން.

މާދަމާ ބާއްވާ ރިޔާސީ އިންތިހާބަށް ކެމްޕެއިން ކުރުމަށް ހުޅުވާލި ފުރުސަތު މިއަދު އިރުއޮއްސި 6:00 އަށް ބަންދުވާއިރު، އިންތިހާބުގައި ވާދަކުރައްވާ ދެ ކެންޑިޑޭޓުންގެ ފަރާތުން އެންމެ ފަހުގެ ކެމްޕެއިން ހަރަކާތްތައް ވަނީ ފަށާފައި. އެގޮތުން މާލޭގެ އިތުރުން އަތޮޅުތެރޭގައި ވެސް އިންތިހާބުގެ ނިންމުމުގެ ހަރަކާތްތައް ކުރިއަށްދާއިރު މާލޭގައި ބައްވާ ޕެރޭޑްގައި އިންތިހާބުގައި ވާދަކުރައްވާ ދެ ކެންޑިޑޭޓުން ކަމަށްވާ ރައީސް އަބްދުﷲ ޔާމީނާއި އިބްރާހިމް މުހައްމަދު ސޯލިހް ބައިވެރިވެވަޑައިގަންނަވާނެ.

އިދިކޮޅު ކޯލިޝަނުން ފެށި ކެމްޕެއިން ހަރަކާތްތައް ނިންމާލުމަށް ކުރިއަށް ގެންދަނީ މާލޭގައި ބޮޑު ހިނގާލުމެއް. މިއަދު ހަވީރު ރަސްފަންނު ސަރަހައްދުން ފަށާ އެ ފެރޭޑްގައި އިދިކޮޅު ކޯލިޝަންގެ ކެންޑިޑޭޓް އިބްރާހިމް މުހައްމަދު ސޯލިހު، އިބޫ އާއި ރަނިންމޭޓް ފައިސަލް ނަސީމް ބައިވެރިވެވަޑައިގަންނަވާ.

ޕީޕީއެމްގެ ރިޔާސީ ކެންޑިޑޭޓް، ރައީސް އަބްދުﷲ ޔާމީންގެ ފަހު ކެމްޕެއިން ހަރަކާތެއްގެ ގޮތުގައި ބޭއްވުމަށް ހަމަޖެހިފައިވަނީ ވެހިކަލް ބުރެއް. މާލޭގެ ބޮޑެތި މަގުތަކުގައި ކުރިއަށް ގެންދާ އެ ވެހިކަލް ބުރު ފެށުމަށް ހަމަޖެހިފައިވާ އާޓިފިޝަލް ބީޗަށް ގިނަ އަދަދެއްގެ ސަޕޯޓަރުން ދަނީ ޖަމާވަމުން. މައުލޫމާތު ލިބިފައިވާ ގޮތުގައި، އެ ހަރަކާތުގައި ރައީސް ޔާމީނާއި އެމަނިކުފާނުގެ ރަނިންމޭޓް ޑރ. މުހައްމަދު ޝަހީމް އަލީ ސައީދު ބައިވެރިވެވަޑައިގަންނަވާނެ.