އެޕްރީލް 06 ވަނަ ދުވަހު ބޭއްވުމަށް ހަަމަޖެހިފައިވާ ރައްޔިތުންގެ މަޖިލިސް އިންތިޚާބުގެ ސަލާމަތާއި ރައްކާތެރިކަމަށް ފުލުހުން ކުރަމުންދާ މަަސައްކަތްތަކުގެ ތެރެއިން، މާލެސިޓީގެ ދާއިރާތަކަށް ޕާޓީތަކުން ކުރިމަތިލާފައިވާ ކެންޑިޑޭޓުންނާއި ފުލުހުން ބައްދަލުކޮށްފިއެވެ.
ފުލުހުން މިއަދު ވިދާޅުވީ އިސްކަންދަރު ބިލްޑިންގގައި އިއްޔެ ބޭއްވި މި ބައްދަލުވުމުގައި، އިންތިޚާބުގެ އެންމެހާ ކަންކަން ސުލްހަވެރިކަމާއި އަމާންކަމާއިއެކު ކުރިއަށް ގެންދިއުމަށް ފުލުހުންނަށް އެއްބާރުލުން ދިނުމަށާއި، މިނިވަންކަމާއިއެކު ހުރިހާ ކެންޑިޑޭޓުންނަށް ކެމްޕެއިން ކުރުމުގެ ފުރުޞަތު ތަނަވަސްކޮށްދިނުމަށާއި އަދި ކެމްޕެއިން ކުރުމުގައި އާންމު އިޖްތިމާޢީ މިންގަނޑުތަކާއި ޚިލާފުނުވާނޭ ގޮތަށް އަމަލުތައް ބެހެއްޓުމާއި ގުޅޭގޮތުން ވާހަކަ ދައްކައި މަޝްވަރާކޮށްފައިވާ ކަމަށެވެ.
މީގެ އިތުރުން އިންތިޚާބުގެ އެންމެހާ ކަންކަން ސުލްހަވެރިކަމާއެކު ކުރިއަށްގެންދިއުމަށް ސަޕޯޓަރުންނަށް ނަސޭހަތްތެރިވުމަށް ކެންޑިޑޭޓުންގެ ކިބައިން އެދިލައްވާފައިވާ ކަމަށް ވެސް ފުލުހުން ވިދާޅުވިއެވެ.
މި ބައްދަލުވުމުގައި، ރައްޔިތުން މަޖިލިސް އިންތިޚާބުގެ ސެކިއުރިޓީ ބެލެހެއްޓުމަށް ފުލުހުން ހިންގާ އޮޕަރޭޝަންގެ ކޮމާންޑަރ ޗީފް ސްޕްރިންޑެންޓެންޓް އޮފް ޕޮލިސް ޢަބްދުﷲ ޝަރީފާއި، ޑެޕިއުޓީ ކޮމާންޑަރ ޗީފް ސްޕްރިންޑެންޓެންޑް އޮފް ޕޮލިސް މޫސާ އަލީއާއި، ސެންޓްރަލް ޕޮލިސް ކޮމާންޑްގެ ހެޑް އެސިސްޓެންޓް ކޮމިޝަނަރ އޮފް ޕޮލިސް އިސްމާޢީލް ނަވީނާއި އަދި ޗީފް ސްޕްރިންޑެންޓެންޑް އޮފް ޕޮލިސް މުޙައްމަދު ރަޝީދުގެ އިތުރުން ފުލުހުންގެ އިތުރު އޮފިސަރުން ބައިވެރިވެލެއްވި ކަމަށް ފުލުހުން ވިދާޅުވިއެވެ.
