މިއަދަކީ ރަމަޟާން މަހުގެ 20 ވަނަ ދުވަހެވެ. މިއަދުވެސް، އާއްމުކޮށް މީހުން ގަންނަ ބާވާތްތަކުގެ އަގުތައް ބާޒާރުގައި އުޅޭ އަގުތައް ބަލާލީމެވެ.
އެގޮތުން ރޯދަ މަސް ފެށުމުގެ ކުރިން 1200 ރުފިޔާ އަށް ލިބެން ހުރި ކަނޑޫދޫ މިރުސް، 600 ރުފިޔާ އާއި 650 ރުފިޔާ އާއި ދެމެދުގެ އަގެއްގައި ލިބެން އެބަ ހުއްޓެވެ. މީގެ އިތުރުން ހުރިހާ ގޭގައިވެސް ފަނި ގިރުމަށް އާއްމުކޮށް އެންމެންވެސް ބޭނުންކުރާ، ކަރާ ގެ އަގު އުޅެނީ ކިލޯއެއް 18 ރުފިޔާ އާއި 20 ރުފިޔާ އާއި ދެމެދުގެ އަގެއްގައެވެ. 20 ރުފިޔާ އާއި 25 ރުފިޔާ އާއި ދެމެދުގެ އަގެއްގައި ކުރުނބާ ވެސް ލިބެން އެބަ ހުއްޓެވެ.
މީގެ އިތުރުން، ފަރުމަސް ކިލޯއެއް 45 ރުފިޔާ އަށް، ކަޑުމަސް ކިލޯއެއް 30 ރުފިޔާ އަށް، ބޭރު މިރުސް ކިލޯއެއް 150 ރުފިޔާއަށް، ލިނބޯ ކިލޯއެއް 40 ރުފިޔާ އަށް، ކޮޕީފަތް ބޮނޑިއެއް 10 ރުފިޔާ އަށް، ކުއްޅަވަށް ފިލާފަތް ބޮނޑިއެއް 15 ރުފިޔާ އަށް، ވަޅޯމަސް ކިލޯއެއް 80 ރުފިޔާ އަށް ލިބެން އެބަ ހުއްޓެވެ.
ހިކަނދިފަތް ބޮނޑިއެއް ލިބެނީ 10 ރުފިޔާ އަށެވެ. އަދި ރާނބާ ފަތެއް ލިބެނީ 5 ރުފިޔާ އަށެވެ. މި ދެބާވަތުގެ ފަތް ގިނަ އަދަދަކަށް ކޮންމެ ދުވަހަކުވެސް ވިކޭ ކަމަށް ވިޔަފާރިވެރިން މަޢުލޫމާތު ދެއްވައެވެ.
ބާޒާރުގައި ދެ ވައްތަރެއްގެ ކަށިކެޔޮ އެބަ ހުއްޓެވެ. އެއްވައްތަރަކީ ރީނދޫ ކަށިކޭލެވެ. އަދި އަނެއް ވައްތަރަކީ ރަތް ކަށިކޭލެވެ. މި ދެ ކޭލުގެ އަގުވެސް ތަފާތުކަން ފާހަގަ ކުރެވެއެވެ.
އެގޮތުން ރީނދޫ ކަށި ކެޔޮ ލިބެންހުރީ، 10 ރުފިޔާ އަށް 3 ވަކުގެ ރޭޓުންނެވެ. ނަމަވެސް ރަތް ކަށިކެޔޮ ލިބެން ހުރީ 5 ރުފިޔާ އަށް ވަކެކެވެ. ކަށިކެޔި ވިއްކާ ފަރާތްތަކުން ބުނާ ގޮތުގައި ރީނދޫ ކަށިކޭލަކީ ވަރަށް ފޮނި ކޭލެއް ކަމަށާއި، ނަމަވެސް ރަތް ކޭލުގެ ޑިމާންޑް މާ ބޮޑު ކަމަށެވެ.
ފާރޮށި ޕެކެޓެއް 30 ރުފިޔާ އަށް ލިބެން ހުރިއިރު، 200 ގްރާމުގެ ފާރޮށި ކުނޑި ޕެކެޓެއް 15 ރުފިޔާ އަށް ލިބެން އެބަ ހުއްޓެވެ. އަދި 500 ގުރާމުގެ ފާރޮށި ކުނޑި ޕެކެޓެއް 25 ރުފިޔާ އަށް ލިބެން އެބަ ހުއްޓެވެ.
ފާރޮއްޓާއި، ފާރޮށި ކުނޑި ވިއްކާ ވިޔަފާރިވެރިން ބުނީ، މިދުވަސް ކޮޅު ފާރިށީގެ ވިޔަފާރި އެހާ ރަނގަޅު ނޫން ކަމަށާއި ނަމަވެސް ފާރޮށި ކުނޑީގެ ވިޔަފާރި އާއްމުގޮތެއްގައި ރަނގަޅު ކަމަށެވެ.
