ހެންވޭރު އަބަދަށް ފަހި މަގުގައި ހިނގި އަލިފާނުގެ ހާދިސާގައި އަސަރު ކުރި ފަރާތްތަކަށް ރައީސް އިބްރާހިމް މުހައްމަދު ސާލިހު ހަމްދަރުދީ ފޮނުއްވައިފިއެވެ.

އެ ހާދިސާ އާ ގުޅިގެން ރައީސް މިރޭ ކުރެއްވި ޓްވީޓެއްގައި ވިދާޅުވީ، ހންވޭރުގައި މިރޭ ހިނގައިގެންއުޅޭ އަލިފާނުގެ ހާދިސާގެ އަސަރުކުރި އެންމެހާ ފަރާތްތަކަށް ހަމްދަރުދީ ފޮނުއްވާ ކަމަށެވެ.

ރައީސްގެ އެ ޓްވީޓުގައި އެ އަލިފާންގަނޑު ކޮންޓްރޯލް ކުރުމުގެ މަސައްކަތް ސަލާމަތީ ބާރުތަކުން ކުރަމުންދާކަން ވަނީ ފާހަގަކޮށްފައެވެ.

My condolences to all affected by the fire in Henveiru this evening. Our first responders are on the scene and working to contain the fire. Emergency operations are currently underway to provide assistance for all who need it.

— Ibrahim Mohamed Solih (@ibusolih) September 20, 2019

މީގެ ދެގަޑިއެއްހާއިރު ކުރިން ފުރަތަމަ ރޯވެފައި ވަނީ ހެންވޭރު ފެހި އާބާދުގޭގައި ހުރި ކެމިކަލް ގުދަނެއްގައި ކަމަށް މައުލޫމާތު ލިބެއެވެ. އެ ގުދަނުގައި ރޯވި އަލިފާންގަނޑު ކޮންޓްރޯލް ނުވެ އިތުރު ގެތަކަށް ފޯރައި، އެގެތަކުގެ ތިބި މީހުންވެސް ވަނީ ހުސްކޮށްފައެވެ.

އަދި އެ ހާދިސާގައި 50 އަށްވުރެ ގިނަ މީހުންނަށް ހޮސްޕިޓަލްތަކުގައި ފަރުވާދީފައިވާއިރު، އޭގެ ތެރެއިން ގިނަ މީހުން ވަނީ ދޫކޮށްލާފައެވެ.

މި އަލިފާނުގެ ހާދިސާ ހިނގަން މެދުވެރިވި ސަބަބު ކަމާއި ބެހޭ އެއްވެސް ފަރާތަކުން ހާމަކޮށްފައެއް ނުވެއެވެ.