އިޒްރޭލްގެ ނުބައި ނުލަފާ މީހުންނާއި އަތޮޅުތަކުގެ މީހުންނާއި އެއްވަރު ކުރުމަކީ ލަދުވެތިވާ ކަމަށް ދާންދޫ ދާއިރާގެ މެމްބަރު ޔައުގޫބު އަބްދުﷲ ވިދާޅުވެއްޖެއެވެ.

ޔައުގޫބް މިހެން ވިދާޅުވީ، ހެންވޭރު ދެކުނު ދާއިރާގެ މެމްބަރު ހުސެެއިން ޝަހީމް (އަނދުން ހުސެއިން) ޓީވީ ޕްރޮގްރާމެއްގައި ވާހަކަދައްކަވަމުން، މާލޭގެ ރައްޔިތުންނަށް ފްލެޓެއް ނުވަތަ ބިންކޮޅެއް ނުލިބޭ ކަމަށާ، މާލޭގެ ރައްޔިތުން އެޅެމުން އަންނަނީ ފަލަސްޠީނު ރައްޔިތުން އުޅެމުންދާ ގޮތަށްކަމަށް ސިފަ ކުރައްވާ ދެއްކެވި ވާހަކަ އާއި ގުޅިގެންނެވެ.

ޔައުގޫބް ވިދާޅުވީ، އެ ވާހަކަތަކާއި މެދު ކަންބޮޑުވެ ދެރަވެވަޑައިގަންނަވާ ކަމަށެވެ.

ޔައުގޫބް ވިދާޅުވީ، މާލޭގައި ދިރިއުޅޭ ރައްޔިތުންނަށްވެސް ބޯހިޔާވަހިކަން ކަަށަވަރު ކުރަން ޖެހޭކަމަށް ގަބޫލުކުރައްވާ ކަމަށާއި، އެހެންނަމަވެސް އަތޮޅުތަކުގެ ރައްޔިތުންނާއި މާލޭގެ ރައްޔިތުންނާއި ތަފާތު ކުރުން ނައްތާލަން ޖެހޭ ކަމަށް ޔައުގޫބު ވިދާޅުވިއެވެ.

"އިޒްރޭލްގެ ނުބައި ނުލަފާ މީހުންނާއި އެއް ހަމަޔަކުން މި ރާއްޖޭގެ ރާއްޖެތެރޭ މީހުންނާ މިނެކިރީތީވެ އެކަމާ ލަދުވެތިވެ، ކަންބޮޑުވެ ދެރަވޭ. އަޅުގަނޑު ވެސް ގަބޫލުކުރަން މާލޭގައި ދިރިއުޅޭ ރައްޔިތުންނަށްވެސް ބޯހިޔާވަހިކަން ކަަށަވަރު ކުރަން ޖެހޭކަން، އެކަމަކު ތަފާތު ކުރުން ނައްތާލަން ޖެހޭ." ޔައުގޫބް ވިދާޅުވިއެވެ.

 

ޔައުގޫބްގެ އިތުރުން ކުޅުދުއްފުށި އުތުރު ދާއިރާގެ މެމްބަރު ޔާސިރު އަބްދުއްލަތީފު ވެސް ވަނީ އަނދުން ހުސައިންގެ ވާހަކަތަކަށް ރައްދު ދެއްވާފައެވެ.

"އެގޮތް މަޖުބޫޫރު ކުރުވުމުން. މިއަދު އެސިޔާސަތުތަކުގެ ގެއްލުން މާލޭގެ ރައްޔިތުންނަށާއި ދިވެހި އެންމެހާރައްޔިތުންނަށް ފޯރަމުންދާއިރު، މާލެއަށް ހިޖުރަކުރަން މަޖުބޫރުކުރުވި ރައްޔިތުންނަކީ އިޒްރޭލުގެ މީހުން ކަމުގައި ސިފަވާގޮތަށް ވާހަކަފުޅު ދެއްކެވުމީ ހިތާމަހުރި ކަމެއް." ޔާސިރު ވިދާޅުވިއެވެ.

2/2 އެގޮތް މަޖުބޫޫރު ކުރުވުމުން. މިއަދު އެސިޔާސަތުތަކުގެ ގެއްލުން މާލޭގެ ރައްޔިތުންނަށާއި ދިވެހި އެންމެހާރައްޔިތުންނަށް ފޯރަމުންދާއިރު، މާލެއަށް ހިޖުރަކުރަން މަޖުބޫރުކުރުވި ރައްޔިތުންނަކީ އިޒްރޭލުގެ މީހުން ކަމުގައި ސިފަވާގޮތަށް ވާހަކަފުޅު ދެއްކެވުމީ ހިތާމަހުރި ކަމެއް.

— Yasir Abdul Latheef (@YasirLathyf) February 9, 2020

ޔާސިރު ވިދާޅުވީ، 1911 ވަނަ އަަހަރު ފުރަ މާލޭގެ އާބާދީއަކީ 5236 މީހުން ކަމަށާ މާލެއަށް މީހުން ހިޖުރަކުރަން މަޖުބޫރު ކުރުވީ ދިވެހިރާއްޖެ ޖުމްހޫރިއްޔާއަކަށް ބަދަލުވެ އައި ވެރިންތަކުގައި ސީދާ އެމަޤުސަދުގައި ސިޔާސާތުތަކަށް ގެެނެވުނު ބަަދަލުތަކުގެ ސަބަބުން ކަމަށެވެ.

މާލޭގެ ރައްޔިތުންނާއި އަތޮޅު ތެރޭގެ ރައްޔިތުންނާއި ތަފާތު ނުކުރުމަކީ ސަރުކާރުގެ ވައުދެކެވެ.

އެހެންނަމަވެސް ސަރުކާރު ހިންގާ ޕާޓީގެ ބައެއް މެމްބަރުން މާލޭގައި ދިރިއުޅޭ އަތޮޅު ތެރޭގެ ރައްޔިތުންނާއި މެދު ދައްކާ ވާހަަކަތަކުން އާއްމުންގެ ނުރުހުމާއި ފާޑުކިޔުން ވަނީ އަމާޒުވެފައެވެ.