ފުވައްމުލަކު ދަނޑިމަގި ކިޅި ސަރަހައްދުގައި އަލިފާން ރޯވެ އަނދަމުން އެބަދެއެވެ.
އެސަރަހައްދުގައި ތިބި "ވަގުތު" ނޫސްވެރިން ބުނާ ގޮތުގައި މިހާރު ވެސް ވަރަށް ބޮޑު ސަރަހައްދެއްގައި ވަނީ އަލިފާން ރޯވެ އަނދާފައެވެ.
އަލިފާން ނިއްވުމުގެ މަސައްކަތް އާއްމުންނާއި ސިފައިން މިހާރު ކުރަމުން އެބަގެންދެއެވެ.
އެ ސަރަހައްދުގައި ރޯވެފައި ވަނީ މިއަދު 11:45ހާއިރު އެެވެ.
އަލިފާން ރޯވެފައި ވަނީ ހުއިތަކެއްގައެވެ.
މި ސަރަހައްދަކީ ދޭތެރެ ދޭތެރެއިން އަލިފާން ރޯކޮށްލާ ސަރަހައްދެކެވެ. ބެލެވޭގޮތުގައި މި ސަރަހައްދުގައި ދަނޑު ހައްދަން އުޅުނު ބަޔަކު ތަން ސާފް ކުރުމަށް އެތަނުގައި ރޯކޮށްލި ގަޑީގައި ބޮޑު ސަރަހައްދަކަށް އަލިފާންގަނޑު ފެތުރިގަތީ އެވެ.
"ވަގުތު"އަށް މައުލޫމާތުދެއްވަމުން ނޭޗާ ޕާކުގެ އޮފިޝަލަކު ވިދާޅުވީ, ވާރޭ ނުވެހި ގިނަ ދުވަސްވުމުން މި ސަރަހައްދަކީ ވަރަށް ހިކިކޮށް އޮންނަ ސަރަަހައްދެއް ކަމަށާއި, އެހެންވެ ވަރަށް ފަސޭހައިން ރޯވެ ފެތުރިގެން ހިނގައިދާނެ ކަމަށެވެ.
އެހެންކަމުން އެއްވެސް ފަރާތަކުން އަލިފާން ރޯނުކުރުމަކީ އެދޭ ކަމެއް ކަމަށް އޮފިޝަލް ވިދާޅުވިއެވެ.
އެ ސަރަހައްދުގައި ރޯވި އަލިފާންގަނޑުން ވަރަށް ބޮޑު ބައެއް ވަނީ ނިއްވާލާފައެވެ. އަދި އަލިފާން ފެތުރުން ވަނީ ކޮންޓްރޯލްކޮށްފައެވެ.