ސަރުކާރުން ވައްކަން ކުރާ ކަމަށް ވިދާޅުވެ، ރައްޔިތުންގެ މަޖިލިހުގެ ރައީސް މުހައްމަދު ނަޝީދު އިއުތިރާފްވެވަޑައިގަތަސް، ލޯކަލް ކައުންސިލް އިންތިހާބުގައި އެމްޑީޕީ އަށް ވޯޓެއް އިތުރު ނުވާނެ ކަމަށް ރައްޔިތުންގެ މަޖިލިހުގެ މަޑުއްވަރީ ދާއިރާގެ މެމްބަރު އާދަމް ޝަރީފް ވިދާޅުވެއްޖެއެވެ.

މި ސަރުކާރު ހިންގާ ކޯލިޝަންގެ މައި ޕާޓީ އެމްޑީޕީގެ ރައީސް ނަޝީދު ކުރެއްވި ޓްވީޓެއްގައި ވިދާޅުވީ ވައްކަންކުރާ ސަރުކާރަކާ އެކީ އޮންނަން އެ ޕާޓީ ނޭދޭނެ ކަމަށެވެ. އެކަން ބަދަލުކުރަން ޖެހޭނެ ކަމަށާއި ރައްޔިތުންނާ އެކީ އެމަނިކުފާނު ވެސް ހުންނެވީ ދޫދެއްވަން ނޫން ކަމަށް ވިދާޅުވިއެވެ.

ނަޝީދު އެގޮތަށް ވާހަކަފުޅު ދެއްކެވީ ކޮވިޑް-19 އާ ގުޅިގެން ވެންޓިލޭޓަރު ގެންނަން ދުބާއީގެ ކުންފުންޏެއް ކަމަށްވާ އެގްޒެކިއުޓާސް ޕްރައިވެޓް ލިމިޓެޑާ ހަވާލުކުރުމުގައި ހިންގާފައިވާ ކަމަށް ތުހުމަތު ކުރެވޭ ކަންކަންމާ ގުޅިގެން ދައުވާ ނުކުރައްވަން ޕްރޮސެކިއުޓާ ޖެނެރަލް ހުސައިން ޝަމީމް ނިންމެވުމުންނެވެ. ޝަމީމްގެ ނިންމެވުމާ ގުޅިގެން އޭނާ އަށް އެންމެ ބޮޑަށް ފާޑު ކިއުން އަމާޒުވީ ވެސް ނަޝީދުގެ ފަރާތުންނެވެ.

Miee vakkan kuraa sarukaareh kamah RN vidhaalhuvumakee opposition in dhakkaa vaahakaige haqeeqaiy eminikufaanu qabool kuravvaakan haamavaa kameh! RN ge mi iuthiraafun MDP ah vote ithureh nuvaane. Vagu sarukaareh thamseel kuran vote dheynjehey sababeh neiy! https://t.co/eWEuuYpsCh

— Adam Shareef Umar (@Adamshareefz) March 28, 2021

އާދަމް ޝަރީފް ކުރެއްވި ޓުވީޓެއްގައި ވިދާޅުވީ މިއީ ވައްކަން ކުރާ ސަރުކާރެއް ކަމަށް ނަޝީދު ވިދާޅުވުމަކީ އިދިކޮޅު ފަރާތްތަކުން ދައްކާ ވާހަކައިގެ ހަގީގަތް އެމަނިކުފާނު ގަބޫލު ކުރައްވާ ކަން ހާމަވާ ކަމެއް ކަމަށެވެ. އަދި ނަޝީދުގެ އިއުތިރާފުން އެމްޑީޕީ އަށް ވޯޓެއް އިތުރު ނުވާނެ ކަމަށާއި ވަގު ސަރުކާރެއް ތަމްސީލް ކުރަން އެ ޕާޓީ އަށް ވޯޓު ދޭން ޖެހޭ ސަބަބެއް ނެތް ކަމަށް އާދަމް ޝަރީފް ވިދާޅުވިއެވެ.

Abadhuves mibunanee ventilator corruption akee state sponsored daylight robbery ekey! Ameen Didi in feshigen hingaafaihuri corruption mi verikamugai amudhun nubeleyne! Isthiufaa ah govanee drama!
Komme faharaku vote hoadhanveemaa rayyithun gunboa hedhdheyne kamah heenukurey! pic.twitter.com/Hin1x0DUOo

— Adam Shareef Umar (@Adamshareefz) March 27, 2021

އާދަމް ޝަރީފް އިއްޔެ ކުރެއްވި ޓުވީޓެއްގައި ވިދާޅުވީ ވެންޓިލޭޓަރުގެ ކޮރަޕްޝަނަކީ "ސްޓޭޓް ސްޕޮންސާޑް ޑޭ ލައިޓް ރޮބަރީއެއް" ކަމަށެވެ. އަދި އަމީން ދީދީގެ ވެރިކަމުން ފެށިގެން ހިނގާފައި ހުރި ކޮރަޕްޝަން މި ވެރިކަމުގައި އަމުދުން ނުބެލޭނެ ކަމަށް އޭނާ ވިދާޅުވިއެވެ.

"ކޮންމެ ފަހަރަކު ގުނބޯ ހޯދަންވީމަ ރައްޔިތުން ގުނބޯ ހެއްދޭނެ ކަމަށް ހީނުކުރޭ،" އާދަމް ޝަރީފް ވިދާޅުވިއެވެ.

ދުބާއީގެ އެގްޒެކިއުޓާސް ކުންފުންޏާ ހަވާލުކޮށްގެން 75 ވެންޓިލޭޓަރު ގަންނަން ސަރުކާރުން ފައިސާ ދެއްކިއެވެ. ނަމަވެސް މިހާތަނަށް ލިބުނީ އެންމެ 10 ވެންޓިލޭޓަރެވެ. އެ މުއާމަލާތުގައި އެޑްވާންސްކޮށް ފައިސާ ދެއްކުމުގައި ކޮރަޕްޝަނުގެ އަމަލުތައް ހިންގާފައިވާ ކަމަށް ތުހުމަތުކޮށް، އެންޓި ކޮރަޕްޝަން ކޮމިޝަން (އޭސީސީ) އިން ޕީޖީ އަށް މައްސަލަ ފޮނުވުމުން ޕީޖީ ޝަމީމް ނިންމެވީ ދައުވާކުރެވޭ ވަރުގެ ހެއްކެއް ނެތް ކަމަށެވެ.