ކޮވިޑް-19 ވެކްސިންގެ ދެވަނަ ޑޯޒް ފުރިހަމަ ކުރުމަށްފަހު ރިސޯޓް މުވައްޒަފުންނަށް ވެސް ކަރަންޓީނާއި ނުލާ ދެން ދަތުރު ކުރެވޭނެ ކަމަށް ޓޫރިޒަމް މިނިސްޓްރީން ވިދާޅުވެއްޖެއެވެ.

ރިސޯޓު މުވައްޒަފުންނަށް ކަރަންޓީނު ނުވެ މީހުން ދިރިއުޅޭ ރަށްތަކަށް ދަތުރު ކުރެވޭނެ ގޮތަށް ހަދާފައިވަނީ ދެވަނަ ޑޯޒު ޖަހާތާ 14 ދުވަސް ފަހުން ކަމަށް މިނިސްޓްރީން ވަނީ ބުނެފައެވެ.

Resort employees are permitted to travel to inhabited islands, 14 days after the 2nd dose of COVID19 vaccine, without home quarantine, subject to @HPA_MV terms and conditions.
Employees’ contributions towards #Maldives tourism recovery are highly appreciated. Thank you all.

— Ministry of Tourism (@MoTmv) April 16, 2021

ޓޫރިޒަމް މިނިސްޓްރީން އެކަން ހާމަކޮށްފައިވާއިރު، ރޭ ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ނެރުނު އިއުލާނެއްގައި ބުނެފައިވަނީ، ރާއްޖޭގައި ކޮވިޑް-19 ފެތުރޭތީ އަޅާފައިވާ ރައްކާތެރިކަމުގެ ބައެއް ފިޔަވަޅުތަކަށް އޭޕްރިލް 20 ވަނަ ދުވަހުން ފެށިގެން ލުއިތައް ދިނުމަށް ނިންމާފައިވާ ކަމަށެވެ.

އެގޮތުން މިމަހުގެ 20 އިން ފެށިގެން ދީފައިވާ ލުއިތަކުގެ ތެރޭގައި، އާބާދީގައި 60 އިންސައްތަ މީހުން ކޮވިޑް-19 ގެ ވެކްސިން ޑޯޒްތައް ހަމަވެފައިވާނަމަ، އެ ރަށަކަށް ކަރަންޓީނުވުމަކާ ނުލައި ދަތުރު ކުރުމަށް ހުޅުވާލުމާއި، އާބާދީގެ 60 އިންސައްތަ މީހުންނަށް ކޮވިޑް-19 ގެ ވެކްސިން ޑޯޒްތައް ހަމަވެފައި ނުވާ ރަށްރަށަށް ވެކްސިންގެ ދެ ޑޯޒް ފުރިހަމަކޮށް، ދެ ހަފްތާ ވެފައިވާ ފަރާތްތަކަށް ކަރަންޓީނާ ނުލައި ދަތުރުކުރުމަށް ހުޅުވައިލުން ހިމެނެއެވެ.

މީގެ އިތުރުން އެޗްޕީއޭއިން ވިދާޅުވީ، މި ލުއިތަކާއެކު ރަށެއްގައި ކޮވިޑް-19 ގެ ބަލި އުޅޭ ނިސްބަތް 5 އިންސައްތައަށްވުރެ މަތި ރަށަކުން އެނޫން ރަށަކަށް ދަތުރު ކުރާނަމަ ޕީ.ސީ.އާރު. ނައްސި ޓެސްޓާއެކު ދަތުރުކުރެވޭނެ ކަމަށެވެ.