މިއަދަކީ މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އަށް 52 އަހަރު ފުރޭ އުފާވެރި މުނާސަބާއެވެ. 1966ގައި ވުޖޫދުވި މި ކުންފުންޏަކީ ނުހަނު އުފާވެރި އަދި އެހާމެ ހިތާވެރި ދުވަސްތައްވެސް ކަޑައްތުކޮށްފައިވާ ތަޖުރިބާހުރި ޤައުމު ފަޚުރުވެރިވާފަދަ ކުންފުންޏެވެ. ވޭތުވެގެން މިދާ 52 އަހަރުގެ ތެރޭގައި އެމްއޭސީއެލް ވެފައިވަނީ ބޭރުގެ ފަރާތްތަކަށް ރާއްޖެއަށް މަރުހަބާކިޔާ ދޮރާށީގެ ގޮތުގައެވެ. އަދި ހަމައެހެންމެ މި ކުންފުނި ވެފައިވަނީ ރާއްޖޭގެ އިޤްތިޞާދުގެ މައި ދޮރާށީގެ ފާރަވެރިޔާއަށެވެ.

އެމްެއޭސީއެލްގެ ބޮޑެތި ކާމިޔާބީތަކުގެ ތެރެއިންވެސް އެކުންފުނީގެ ހައިބަތާއި ކުންފުނީގެ ކުޅަދާނަކަން އެންމެބޮޑަށް ހާމަވެފައިވަނީ ކުންފުނީގެ މުވައްޒަފުންގެ ފަރާތުންނެވެ. 90 އިންސައްތަ ދިވެހި މުވައްޒަފުންނާއިއެކު ހިންގާމި ކުންފުންޏަކީ ދިވެހި ރައްޔިތުން މިއަދު ފަޚުރުވެރިވާ ކުންފުންޏެެވެ. އެމްއޭސީއެލްގެ ޚިދުމަތް ފުޅާކޮށް މުޅި ދުނިޔެއަށް ހުޅުވާލުމަކީ ސަރުކާރުން ނުހަނު ބޮޑު އިސްކަމެއް ދީގެން ކުރިއަށް ގެންދާ މަސައްކަތެކެވެ. ރާއްޖޭގެ ވައިގެ މައި ދޮރާއްޓަކީ ދުނިޔޭގެ އެތަކެއްބަޔަކު އެއްފަހަރާ ބޭނުންކުރާ ހިއްގައިމު އަދި އެހާމެ ހިންހަމަޖެހުން ލިބޭ ތަނަކަށް ހެދުމަށް ސަރުކާރުންވަނީ ޚާއްސަ މަޝްރޫޢެއް ފައްޓަވާފައެވެ.

އެގޮތުން 2016 ވަނަ އަހަރުގެ މެއި މަހުގެ ތެރޭގައި އެއާޕޯޓަށް ބޮޑެތި ބަދަލުތަކެއް ގެނައުމަށް ސައުދީ އަރަބިއްޔާގެ އެންމެވަރުގަދަ ކުުންފުނި ސައުދީ ބިންލާދީން ގުރޫޕާއި ވަނީ ހަވާލުކޮށްފައެވެ. މި ކުންފުނިން އެއާޕޯޓުގައި ކުރަމުންދާ މަސައްކަތުގެ ތެރެއިން އިންޓަރނޭޝަނަލް ޕެސެންޖާ ޓާމިނަލްގެ މަސައްކަތް ހިމެނެއެވެ. އެ މަސައްކަތް މިހާރު ވަނީ ގާތްގަނޑަކަށް ފެށިފައެވެ.

މި ޓާމިނަލްއަކީ މިހާރު ބޭނުންކުރަމުންދާ ޓާމިނަލް އަށްވުރެ ތިން ގުނަ ބޮޑު އެންމެ ޒަމާނީ ފެންވަރުގެ ވަސީލަތްތަކާއިއެކު ހުޅުވުމަށް ތައްޔާރުވަމުންދާ ޓާމިނަލްއެކެވެ. އެގޮތުން ހަ އެއިރޯ ބްރިޖާއި، އެންމެ ޒަމާނީ ބެގޭޖް ހޭންޑްލިން ސިސްޓަމް ގާއިމް ކުރުމުގެ އިތުރުން އެތައް ގުނައަކަށް ޑިއުޓީ ފްރީ ފިހާރަތަކާއި، އިންޓަރނޭޝަނަލް ބްރޭންޑްތައް ތަޢާރަފްވެގެން ދާނެއެވެ.

މިމަޝްރޫޢުގެ ތެރެއިން މިހާރު އެއާޕޯޓްގައި ބޭނުންކުރަމުންދާ 3 ގޭޓްގެ އަދަދު 10 އަކަށް އިތުރު ކުރެވިގެންދާނެއެވެ. މީގެ އިތުރުންވެސް މިމަޝްރޫޢު އެއްކޮށް ނިމިގެންދާއިރު ހުޅުލޭގެ މަލަމައްޗަށް ބޮޑެތި ބަދަލުތަކެއް އައިސް، އާޓާމިނަލް އާއިއެކު ވެލާނާ އިންޓަނޭޝަނަލް 7 މިލިޔަން ފަސިންޖަރުންނަށް ޚިދުމަތް ދެވޭނެކަމަށްވެސް އެމްއޭސީއެލްއިން ބުނެއެވެ.

މީގެ އިތުރުން, ޗައިނާގެ ބެއިޖިން އާބަން ކޮންސްޓްރަކްޝަން ގްރޫޕް (ބީޔޫސީޖީ) އިން އެެެއާޕޯޯޓުުުު ގެ އާާރަންވޭގެ މަސައްކަތް ބާރު ސްޕީޑްގައި ދަނީ ކުރެވެމުންނެވެ. މި މަސައްކަތް މި އަހަރު ފަހުކޮޅު ނިމި އެންމެ ބޮޑެތި މަތިންދާ ބޯޓުތައް އެ ރަންވޭގައި ޖައްސާނެއެވެ.

މި ޕްރޮޖެކްޓްގެ އިތުރުންވެސް އިތުރު ބައެއް ތަރައްގީގެ ބޮޑެތި ޕްރޮޖެކެޓްތައް ދަނީ އެއާޕޯޓުގައި ކުރެވެމުންނެވެ. އެގޮތުން އެއާޕޯޓުގެ އާ ސީޕްލޭން ޓާމިނަލްގެ މަސައްކަތް ރަސްމީކޮށް ވަނީ ފަށާ މަސައްްްކަތްތައް ބާރު ސްްޕީޑްގައި ދަނީ ކުުުރެވެެެމުންނެވެ. އަދި އާ ކާގޯ ޓާމިނަލްގެ އަމަލީ މަސައްކަތް ވަނީ ފަށާފައެވެ. އަދި އާ ވީއައިޕީ ކޮމްޕްލެކްސް އަޅަންވެެެސް ބަަޔަކާއި ވަނީ ހަވާލުކޮށްފަައެވެ.

އަދި އެއާޕޯޓްގެ މަލަމައްޗަށް ރީތިކަން ގެނެސްދޭ ގޮތަށް ހަދާފައިވާ "ވޯޓާފްރަންޓް ރެސްޓޯރަންޓް" ގައި ދުނިޔޭގެ މަޝްހޫރު ފްރެންޗައިސް ރެސްޓޯރަންޓް، ކޭއެފްސީ އާއި ޕިއްޒާ ހަޓާއި ކޮސްޓާ ކޮފީ އަދި ހާވެސްޓް މާކެޓް ހިންގުމަށްް ނިންމައިި އެއްބަސްވުުުުމުގައިި ސޮއިކޮޮޮށްފައެވެެ.

މި ނޫނަސް އެއާޕޯޓްގައި ތަރައްގީގެ މަޝްރޫތައް ހުއްޓުމެއް ނެތި ދަނީ ކުރަމުންނެވެ.

އެއާޕޯޓް ތަރައްގީ ކުރުމުގެ ބޮޑު ބިޔަ މަޝްރޫޢަށް 800 މިލިޔަން ޑޮލަރު ޚަރަދުވާއިރު މިއީ މިހާތަނަށް ސަރުކާރަކުން އިސްނަގައިގެން ރާއްޖޭގެ ތަރައްގީއަށް ހިންގާ އެންމެބޮޑު މަޝްރޫޢުއެވެ.

އެއާޕޯޓް ތަރައްގީ ކުރުމުގެ މަޝްރޫއުގެ ފުރަތަމަ ފިޔަވަހީގެ ހުރިހާ މަސައްކަތެއް ނިންމުމަށް ކަނޑައަޅާފައި ވަނީ މި އަހަރުގެ ނިޔަލަށެވެ ނަމަވެސް ޓާމިނަލްގެ މަސައްކަތް މުޅިން ނިމޭނީ 2019 ވަނަ އަހަރު ފަހުކޮޅު ނޫނީ 2020 ވަނަ އަހަރުގެ ކުރީކޮޅުގައެވެ.

"މިބޮޑު ޕްރޮޖެކްޓަށް ހިނގާ ޚަރަދު ކުރު މުއްދަތެއްގެ ތެރޭގައި ފޫބެއްދި ބޮޑު ފައިދާއެއް ދައުލަތަށް ދައްކަމުން ގެންދެވޭނެ ކަމުގެ ޤާބިލްކަމާއި ހިތްވަރު އަޅުގަނޑުމެންގެ ކިބައިގައި ހުންނާނެ ކަމުގެ ޔަގީންކަން އަރުވަން." އެމްއޭސީއެލްގެ މެނޭޖިން ޑިރެކްޓަ އާދިލް މޫސާ ވިދާޅުވެފައިވެއެވެ.

އެމްއޭސީއެލްގެ 52 ވަނަ އަހަރީ ދުވަސް ކުލަގަދަކޮށް މިއަދު ފާހަގަކުރަމުންދާއިރު މި އުފާވެރި މަންޒަރުތައް މިއަދު ދަނީ އެއާޕޯޓުން ފެންނަމުންނެވެ. މި މަންޒަރުތަކާއި ފެންނަމުންދާ ހަގީގަތްތަކަކީ އެއްވެސް މީހަކަށް އޮޅުވާލައި، ފޮރުވާލެވޭނެ ކަންކަމެއް ނޫނެވެ. އެއާޕޯޓުގައި ހިންގާ މަޝްރޫޢުގެ ތެރެއިން ކުރިއަށްދާ ޕްރައިވެޓް ޖެޓް ޕާކްކުރުމަށް ހެދެމުންދާ އޭޕްރަންއަކީވެސް ނުހަނު ހިތްގައިމު އަދި އެހާމެ ތަނަވަސް ތަނެކެވެ. މިފަދަ އެތައް މަސައްކަތާއިއެކު މިއަދުު ދަނީ އެތަކެެއް ކާމިޔާބުތަކެއް އެމްއޭސީއެލް އަށް ލިިބެމުންނެވެ. އެގޮތުން މިއަހަރު ޖެނުއަރީ 7 ވަނަ ދުވަސް ވެފައިވަނީ ވެލާނާ އިންޓަރނޭޝަނަލް އެއާޕޯޓްގެ އެއަރކްރާފްޓް މޫވްމަންޓްގެ ރެކޯޑް ގާއިމްކުރެވުނު ދުވަހުގެ ގޮތުގައެވެ. އެގޮތުން އެދުވަހު އެކަނިވެސް 644 އެއާކްރާފްޓް މޫވްމަންޓްވަނީ ރެކޯޑް ކުރެވިފައެވެ.

މިހުރިހާ ކާމިޔާބީއެއް އަދި ހުރިހާ މަސައްކަތެއްގެ ހައްގު ވެރިންނަކީ މިއަދު މިނިވަންކަމާއިއެކު އެއާޕޯޓްގެ އަހަރީ ދުވަސްފާހަގަކުރަމުންދާ ހިންގުންތެރި ވެރިިންނާއި ހީވާގި މުވައްޒިފުންކަމާއިމެދު އެއްވެސް ޝައްކެތް ނެތެވެ.

އެމްއޭސީއެލް އިން މިއަދު އުފާވެރި 52 އަހަރު ފާހަގަކުރާއިރު އޭގެ ތެރޭގައި ހިތާމަވެރި ދުވަސްތަކެއްވެސް ވަނީ ދެކެފައެވެ. އެގޮތުން އިސްތިއުފާދެއްވި މުހައްމަދު ނަޝީދުގެ ވެރިކަމުގައި އިންޑިޔާގެ ޖީއެމްއާރަށް އެއާޕޯޓްގެ ހިންގުން 25 އަހަރަށް ހަވާލުކުރި ހިސާބުން އެއައި ބޮޑު ހީނަރުކަމާއި އިގްތިސޯދީ ބޮޑު އަދަވަޅަކީ ހިތާމަވެރި ދުވަސްތަކެކެވެ. ނަމަވެސް އެކަމުން އެއާރޕޯޓް ސަލާމަތް ކުރުމަށް ކުރެވިދިޔަ މަސައްކަތަކީ ނުހަނު ބޮޑު ކަމިޔާބެއްކަމަށް މިއަދު ގިނަބަޔަކު ދެކެއެވެ.

އެއާޕޯޓަށް 50 އަހަރު ފުރުން ފާހަގަކުރުމަށް 2016 ވަނަ އަހަރު ދަރުބާރުގޭގައި ބޭއްވި ޖަލްސާގައި ވާހަކަ ދައްކަވަމުން ރައީސް ޔާމީން ވިދާޅުވެފައިވަނީ ޖީއެމްއާރަށް އެއާރޕޯޓް ދިނުމަކީ ބޮޑު އިކޮނޮމިކް ކްރައިމެއްކަމަށެވެ. ރައީސް ޔަމީންގެ ޚިކުމަތްތެރި ކަމާއި، ނިންމެވި ހިއްވަރުގަދަ ނިންމެވުމާއިއެކު ޖީއެމްއާރު ބޭރުކޮށް ދައުލަތަށް އެއްވެސް ގެއްލުމެއް ނުވާނޭ ގޮތަކަށް ޖީއެމްއާރަށް ދައްކަންޖެހޭ ފައިސާވެސް މިއަދު ވަނީ ދައްކާ ޚަލާސްކޮށްފައެވެ.

މިއީ މިއަދު އެމްއޭސީއެލްއިން މިނިވަންކަމާއިއެކު 52 ވަނަ އަހަރު ފާހަގަކުރުމަށް ލިބޭ އެންމެބޮޑު އެއް އުފާކަމުގައިވެސް އެކުންފުނިން ދެކެއެވެ.

އެއާޕޯޓްސް ކުންފުނީގެ އުފާވެރި އަދި ހިތާމަވެރި ދުވަސްތަކުގައިވެސް އެކުންފުނީގެ މުވައްޒިފުން ކޮށްދެއްވާފައިވަނީ ނުހަނު މަތިވެރި ޚިދުމަތެކެވެ.

ކުންފުނީގެ މުވައްޒިފުންގެ ޚިދުމަތް ބަލައިގަނެ ސަރުކާރުންވަނީ ކުންފުނީގެ މުވައްޒިފުންނަށް ޚާއްސަކޮށްގެން 14 ބުރީގެ 2 ފުލެޓް އެޅުމަށް ނިންމާފައެވެ. ހުޅުމާލޭ ދެވަނަ ފިޔަވަހީގައި އަޅާ މިފްލެޓްތައް އެޅުމުގެ މަސައްކަތް މިއަހަރުގެ ފެބްރުއަރީ މަހުން ފެށިގެން ކުރިއަށްދާއިރު މި ފްލެޓްތަކަަކީ ހިޔާ މަޝްރޫޢުގެ ތެރެއިން އެންމެ އަވަހަށް ނިންމާލާ މަސައްކަތަށް ހެދުމަށްވެސް އެކުންފުނިން ދަނީ މަސައްކަތް ކުރަމުންނެވެ.

އެމްއޭސީއެލްގެ 52 އަހަރުގެ ކާމިޔާބީއާއި ގުޅިފައިވަނީ އެއާޕޯޓުން ހޯދި ކާމިޔާބީތައް އެކަންޏެެއްނޫނެވެ. އެކުންފުނީގެ ތާރީޚީ ދިގުމާޒީއަކީ ޤައުމީ ޚިދުމާއި ގުޅިފައިވާ އުފާވެރި އެހާމެ ކާމިޔާބު ދުވަސްތަކެވެ. މިއަދު އެކުންފުޏަކީ ކުޅިވަރުގައިވެސް ކާމިޔާބް ކުންފުންޏެކެވެ. ވޮލީ ބޯޅާގައާއި، ފުޓްސަލް އަދި އެނޫންވެސް ކުޅިވަރުތަކުގައި ނަންހިނގާ މޮޅެތި ކުޅުންތެރިންތަކެެއް ތިބި ކުޅިވަރުގެވެސް އާއިލާއެކެވެ.

އެމްއޭސީއެލް މިއަދު ފާހަނގަކުރަމުންދާ އުންމީދީ 52 އަހަރަކީ މިހުރިހާ ކާމިޔާބީއަކާއި ގުޅިފައިވާ އުފާވެރި މުނާސަބާއެވެ.