ރާއްޖޭގެ އެކި ކަންކޮޅުތަކުގައި ސަރުކާރުން އަޅައިދޭ ފުޓުބޯޅަ ދަނޑުތަކުގެ ތެރެއިން ޏ.ފުވައްމުލަކުގައި ސަރުކާރުން އަޅާ ފެންވަރު ރަނގަޅު ޓާފް ފުޓްބޯޅަ ދަނޑުގެ ފުރަތަމަ ފޭސްގެ މަސައްކަތްތަކުގެ ތެރެއިން ދަނޑުގެ ޓާރފް އަޅައިފިއެވެ.

ދަނޑުގެ ބިން އެއްވަރުމުގެ މަސައްކަތް ކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިންނެވެ. މި މަސައްކަތަށް ކުޅިވަރާ ބެހޭ ވުޒާރާއިން 2.54 މިލިޔަން ރުފިޔާ ވަނީ ޚަރަދުކޮށްފައެވެ.

އެއަށްފަހު ދެން ކުރިޔަށްދިޔައީ ދަނޑުގެ ޓާރފް އެޅުމުގެ މަސައްކަތެކެވެ. މި މަސައްކަތް އަމީން ކޮންސްޓްރަކްޝަނުން ކޮށްފައިވަނީ 4.53 މިލިޔަން ރުފިޔާއަށެވެ.

ކުޅިވަރާ ބެހޭ ވަޒީރު އަޙްމަދު މަޙްލޫފް ކުރެއްވި ޓްވީޓެއްގައި ވަނީ ފުވައްމުލަކު ފުޓްބޯޅަ ދަނޑުގެ ފުރަތަމަ ފިޔަވަހީގެ މަސައްކަތް ނިންމާލާފައިވާކަން ހާމަކުރައްވާފައެވެ. އެހެންކަމުން ވަޒީރު ވަނީ ކުޅިވަރާ ބެހޭ ވުޒާރާގެ މުވައްޒަފުންނާއި، އެ ސިޓީއަށް ނިސްބަތްވާ ރައްޔިތުންގެ މަޖިލީހުގެ މެންބަރުންގެ އިތުރަށް، އެ ސިޓީގެ ޒުވާނުންނާއި ކައުންސިލަށް ޝުކުރުއަދާކުރައްވާފައެވެ.

Fuvahmulah Football Ground phase 1 has been completed. Thank Ministry staff, MP's,youth & Council for their support.We've also given the go ahead to the council to start work on fencing and hope to install lighting in the near future. @DhonbeRasheed @HunuboliHussain @MumthazFVM pic.twitter.com/WSuMSOGYq5

— Ahmed Mahloof (@AhmedMahloof) November 2, 2020

މީގެ އިތުރުން ވަޒީރު ވިދާޅުވީ އެ ދަނޑުގެ ފުރަތަމަ ފިޔަވަހީގެ މަސައްކަތް ނިންމާލާފައިވާއިރު، ދެވަނަ ފިޔަވަހީގައި ހިމެނޭ ފެންސް ޖެހުމާއި ލައިޓް ހަރުކުރުމުގެ މަސައްކަތް ކުރިއަށްގެންދިޔުމަށް ފުވައްމަލަކު ކައުންސިލަށް މިހާރު ހުއްދާ ދީފައިވާ ކަމަށެވެ.

ރާއްޖޭގެ އެކި ކަންކޮޅުތަކުގައި ފުޓުބޯޅަ ދަނޑު އެޅުމުގެ މަޝްރޫއުތަކުގެ ދަށުން ސަރުކާރުން ވަނީ މިހާތަނަށް ގިނަ ދަނޑުތަކެއްގެ މަސައްކަތް ކޮށްފައެވެ. އަދި މިހާރުވެސް ގިނަ ދަނޑުތަކެއްގެ މަސައްކަތް ދަނީ ކުރަމުންނެވެ. ފެންވަރު ރަނގަޅު ފުޓުބޯޅަ ދަނޑުތަކެއް އަޅާއިރު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ރިޔާސީ ވައުދުފުޅުގެ ތެރޭގައި ރާއްޖޭގެ 100 ރަށެއްގައި ފެންވަރު ރަނގަޅު ފުޓްބޯޅަ ދަނޑު އެޅުން ހިމެނެއެވެ.