ޔުއެފާ ޔޫރޮޕާ ލީގުގެ ކުއާޓާ ފައިނަލުގެ ފުރަތަމަ ލެގުގައި ޗެކް ރިޕަބްލިކްގެ ސްލާވިއާ ޕްރާހާ އާއި އިނގިރޭސި ކުލަބް އާސެނަލް އެއްވަރުވިއިރު ސްޕެއިންގެ ގްރަނާޑާ އަތުން އިނގިރޭސި ކުލަބް މެންޗެސްޓާ ޔުނައިޓެޑް މޮޅުވެއްޖެ އެވެ.

ގްރަނާޑާގެ އަތުން ޔުނައިޓެޑް މޮޅުވީ 2-0 ގެ ނަތީޖާއަކުންނެވެ. ފުރަތަމަ ހާފުގައި ޔުނައިޓެޑުން ވަނީ ފުރަތަމަ ލަނޑު ޖަހާފައެވެ. މާކަސް ރަޝްފޯޑް މި ލަނޑު ޖެހީ ވިކްޓަ ލިންޑެލޯފް ތަނަވަސްކޮށްދިން ފުރުސަތަކުންނެވެ. ޔުނައިޓެޑުން ލީޑު ފުޅާކޮށްފައިވަނީ މެޗުގެ އިތުރު ވަގުތުގައެވެ. ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ ބްރޫނޯ ފެނާންޑޭސް އެވެ.

ނަމަވެސް ދެވަނަ ލެގާއި ކުރިމަތިލާއިރު ޔުނައިޓެޑަށް އިތުރު އުނދަގޫތަކާއި ކުރިމަތިވާނެ އެވެ. އެއީ އެ ޓީމުގެ މުހިއްމު ކުޅުންތެރިންތަކެއް ދެވަނަ ލެގަށް ސަސްޕެންޑް ވާތީއެވެ .މީގެތެރޭގައި ޔުނައިޓެޑުގެ ކެޕްޓަން ހެރީ މެގުއާ އާއި ފެންޑަރު ލޫކް ޝޯ އަދި މިޑްފީލްޑަރު ސްކޮޓް މެކްޓޮމިނޭ ހިމެނެއެވެ.

ކުއާޓާފައިނަލުގައި ކުޅުނު އެހެން މެޗުތަކަށް ބަލާއިރު ރޯމާ އިން ވަނީ އަޔެކްސް 2-1 އިން ބަލިކޮށްފައެވެ. ވިޔަރެއާލް މޮޅުވީ ޑީނަމޯ ޒެގްރެބް އަތުން 1-0 ގެ ނަތީޖާއަކުންނެވެ.