ކޮވިޑް-19 އާ ގުޅިގެން ބަންދުކޮށްފައި ހުރި ގެސްޓްހައުސްތައް ގާތްގަނޑަކަށް ހަތް މަސް ފަހުން ފަތުރުވެރިންނަށް ހުޅުވާލައިފިއެވެ.

ރާއްޖޭގައި ހަލުވިކަމާ އެކު، ކޮވިޑް-19 ފެތުރެމުންދާތީ ރައްކާތެރިކަމުގެ ފިޔަވަޅެއްގެ ގޮތުން މާލެ އާއި ރަށްރަށުގައި ހުރި ގެސްޓްހައުސްތައް ބަންދުކުރީ މިދިޔަ މާޗް 17 ވަނަ ދުވަހުއެވެ. ގެސްޓްހައުސްތައް ބަންދު ކުރި ނަމަވެސް، މީހުން ކަރަންޓީން ކުރުމަށާއި ކޮވިޑް-19 ޖެހޭ މީހުން ބޭތިއްބުމަށް ގެސްޓްހައުސްތައް ބޭނުން ކުރިއެވެ. އަދި ހުޅުމާލޭގެ ބައެއް ގެސްޓްހައުސްތައް މިހާރު ވެސް ކޮވިޑް-19 ޖެހޭ މީހުން ބައިތިއްބަން ބޭނުންކުރެއެވެ.

ކޮވިޑް-19 ގެ ހާލަތު މަޑު މަޑުން ރަނގަޅުވަމުން އަންނާތީ ނުވަ ރަށަކުން 16 ގެސްޓްހައުސްއެއް ހުޅުވުމުގެ ހުއްދަ މީހާރު ވަނީ ދީފައެވެ.

ގެސްޓްހައުސްތައް އަލުން ހުޅުވުން ފާހަގަ ކުރުމަށް ކ. މާފުށީގައި މިއަދު ވަނީ ހާއްސަ ހަރަކާތެއް ބާއްވައިފައެވެ. މި ހަރަކާތުގައި ޓޫރިޒަމް މިނިސްޓަރު ޑރ. އަބްދުﷲ މައުސޫމް ބައިވެރިވެވަޑައިގެން ފަތުރުވެރިންނަށް މަރުހަބާ ދަންނަވާފައިވެއެވެ.

ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ) އިން ރޭ ބޭއްވި ނޫސްވެރިންގެ ބައްދަލުވުމުގައި ޓޫރިޒަމް މިނިސްޓްރީގެ ސީނިއާ އެގްޒެކެޓިވް ޑިރެކްޓަރު އަލީ ރައްޒާން ވިދާޅުވީ ގެސްޓްހައުސތައް އަލުން ހުޅުވާލުމުގައި އަމަލުކުރުމަށް ކަނޑައަޅާފައިވާ ގައިޑްލައިނާ އެއްގޮތަށް ފުރިހަމަކުރަންޖެހޭ ކަންކަން ފުރިހަމަކުރުމަށްފަހު، 22 ގެސްޓް ހައުސްއަކުން ސްޓޭޑަޑް އޮޕަރޭޓިން ޕްރޮސިޖަ (އެސްއޯޕީ)ތައް މިނިސްޓްރީއަށް ހުށަހަޅާފައިވާ ކަމަށެވެ.

ޓޫރިޒަމް މިނިސްޓްރީން މިހާތަނަށް ހުއްދަ ދިން ނުވަ ރަށުގެ ތެރޭގައި ހިމެނެނީ މާފުށީގެ އިތުރުން ހދ. ހަނިމާދޫ، ށ. ނަރުދޫ، ނ. ފޮއްދޫ، ކ. ހުރާ،އއ. މަތިވެރި، ވ. ތިނަދޫ، އަދި ވ. ފުލިދޫގެ އިތުރުން ތ. ގާދިއްފުއްޓެވެ.

ޓޫރިޒަމް މިނިސްޓްރީގައި ރަޖިސްޓްރީކޮށްފައި 600 އަށްވުރެ ގިނަ ގެސްޓް ހައުސް އެބަހުއްޓެވެ. މިއީ ރާއްޖޭގެ ޓޫރިޒަމްގެ އެނދުގެ ނިސްބަތައް ބަލާނަމަ 20 ޕަސެންޓެވެ. މިދިޔަ އަހަރު ރާއްޖެ އައި ޓޫރިސްޓުންގެ 10 ޕަސެންޓު ޓޫރިސްޓުން ގެސްޓްހައުސްތަކުގައި ޗުއްޓީ ހޭދަކޮށްފައިވެއެވެ. މިއީ 6،000 އަށްވުރެ ގިނަ ވަޒީފާގެ ގޮތުގައި ޓޫރިޒަމް މިނިސްޓްރީން ލަފާ ކުރެއެވެ.

ގެސްޓްހައުސް ހުޅުވުމުގެ ހުއްދަ ދޭނީ ކޮވިޑް19 ސޭފް ޕްލޭން އެކުލަވާލާ ގެސްޓްހައުސްތަކަށް އެކަންޏެވެ. އެ ޕްލޭން ބަލައި ހުއްދަ ދޭނީ ރަށު ކައުންސިލުން ގެސްޓްހައުސް އަށް ގޮސް، ޕްލޭނާ އެއްގޮތަށް ހުރިތޯ ޗެކް ކުރުމަށް ފަހު ސަލާމަތާއި ރައްކާތެރިކަމުގެ ފިޔަވަޅުތައް އަޅާފައިވާ ނަމައެވެ.

މާލެ ފިޔަވައި، ރާއްޖޭގެ ރަށްރަށުގެ ގެސްޓްހައުސްތައް އަލުން ހުޅުވާ އިރު، ގެސްޓްހައުސްތައް ހުޅުވާ ރަށްރަށުގައި ދިރިއުޅޭ އެންމެން ވެސް ގެއިން ބޭރަށް ނިކުންނައިރު މާސްކް އެޅުން މަޖުބޫރުކޮށް ހެލްތު ޕްރޮޓެކްޝަން އެޖެންސީ (އެޗްޕީއޭ) ގައިޑްލައިން ވަނީ އާންމުކޮށްފައެވެ.

ގައިޑްލައިންގައި ހިމެނޭ އިތުރު ކަންތައްތަކަށް ބަލާއިރު ވަކި ހާއްސަ ހާލަތެއްގައި ނޫން ގޮތަކަށް ގެސްޓްހައުސް ހުޅުވާފައި ހުންނަ ރަށަކުން އެހެން ރަށަކަށް މީހުން ދަތުރު ކުރުން ވަނީ މަނާކޮށްފައެވެ. ގެސްޓްހައުސް ހުޅުވާފައި ހުންނަ ރަށަކުން އެހެން ރަށަކަށް ދަތުރު ކުރުމުގެ ހުއްދަ އޮންނަނީ ހަމައެކަނި ޑޮކްޓަރަށް ދެއްކުމަށާއި، ބަލިވެފައިވާ އާއިލާ މީހަކަށް ޒިޔާރަތް ކުރުމަށާއި، ބޭންކްގެ ޚިދުމަތް ހޯދުމަށާއި، ސްކޫލަށް ދިއުމަށާއި، ކޮންމެހެން ގަންނަން ބޭނުންވާ އެއްޗެއް ގަތުމަށާއި، ކޯޓަށް ހާޒިރުވުމަށެވެ.

ގައިޑްލައިން ބުނާ ގޮތުން ފަތުރުވެރިންނަށް ހިދުމަތްދޭ މުވައްޒަފުންނާއި ރަށްރަށަށް ޒިޔާރަތް ކުރާ ފަތުރުވެރިން "ޓްރޭސްއެކީ އެޕް" ވެސް ބޭނުން ކުރުން މަޖުބޫރު ވާނެއެވެ. އަދި ގެސްޓްހައުސްތަކަށް ޒިޔާރަތްތަކުރާ ފަތުރުވެރިންނާއި އަދި އެނޫން މީހަކު ވެސް ކަރަންޓީނަށް ނުވަތަ އައިސޮލޭޝަނަށް ދާންޖެހިއްޖެ ހާލަތެއްގައި އެ ފަރާތަކުން ހާލުބެލުން ޕޯޓަލްގައި ރަޖިސްޓްރީވާން ޖެހޭނެ ކަމަށް ގައިޑްލައިންގައި ބުނެފައި ވެއެވެ.

ފަތުރުވެރިންނަށް ރަށުގެ އާންމު ރައްޔިތުން ދިރިއުޅޭ ގެތަކަށް ދިއުން ވަނީ މަނާ ކޮށްފައެވެ. ނަމަވެސް އާންމުކޮށް ހުޅުވާފައި ހުންނަ ކެފޭތަކާއި ރެސްޓޯރެންޓްތަކާއި ފިހާރަތަކަށް ވަނުމަށް ފަތުރުވެރިންނަށް އެއްވެސް ހުރަހެއް ނޯންނާނެ ކަމަށް ގައިޑްލައިން ބުނެއެވެ. ފިހާރަތަކާއި ރެސްޓޯރެންޓްތަކާއި ކެފޭތަކުގައި އެޗްޕީއޭގެ ގައިޑްލައިންތަކާ އެއްގޮތަށް ކަންކަން އިންތިޒާމް ކޮށްފައި ބެހެއްޓުމަށް ގައިޑްލައިންގައި ވަނީ އަންގާފައެވެ.