ތުރުކީގެ އިސްތަންބުލްގައި ހުންނަ ސައުދީގެ ކޮންސިއުލޭޓްގައި މަރާލި ކަމަށް ބުނާ ނޫސްވެރިޔާ ޖަމާލް އަހުމަދު ޚާޝޮގީ މަރާލާފައިވާ ގޮތުގެ އިތުރު ތަފްސީލް ސައުދީ ސަރުކާރުގެ ސީނިއަރ އޮފިޝަލަކު ހާމަކޮށްފިއެވެ.

ނޫސްވެރިޔާ މަރުވެފައިވަނީ ސައުދީ ކޮންސިއުލޭޓްގައި ހިނގި ތަޅާފޮޅުމެއްގައި ކަމަށް ސައުދީން މީގެކުރިން ބުނެފައިވީ ނަމަވެސް ނަން ހާމަނުކުރުމަށް ޝަރުތުކޮށް އަލްޖަޒީރާ އާއި ވާހަކަ ދައްކަމުން ސައުދީގެ އޮފިޝަލަކު ބުނެފައިވަނީ ނޫސްވެރިޔާ މަރާލާފައިވަނީ އެކަމަށް ތައްޔާރު ވެގެން ދިޔަ ސައުދީގެ 15 މެންބަރުންގެ ޓީމަކުން ކަމަށެވެ. އަދި ނޫސްވެރިޔާ މަރާލާލުމުގެ ކުރިން އޭނާ ޑްރަގްގެ މައްސަލައެއްގައި ކަމަށްބުނެ ކޮންސިއުލޭޓް ތެރޭގައި ބަންދު ކުރި ކަމަށެވެ. އަދި އެކަމަށް ހާޝޮގީ އެއްބަސް ނުވުމުން، އޭނާ މަރާލާފައިވަނީ ނޭވާ ހާސްކޮށްލައިގެން ކަމަށް އޮފިޝަލް ބުނެފައިވެއެވެ.

ތުރުކީވިލާތުގައި ހުންނަ ސައުދީ އަރަބިއްޔާގެ ކޮންސިއުލޭޓަށް ވަން ފަހުން ޚަބަރެއް ނުވެ ގެއްލިފައިވާ ސައުދީގެ ނޫސްވެރިޔާ ޚާޝޮގީ މަރުވެފައިވަނީ ކޮންސިއުލޭޓްގެ ތެރޭގައި ހިނގި ތަޅާފޮޅުމެއްގެ ތެރެއިން ކަމަށް ސައުދީގެ ރަސްމީ މީޑީޔާ އިން ވަނީ ހާމަކޮށްފައެވެ.

ޚާޝޮގީ ގެއްލުނީ މިމަހުގެ 02 ވަނަ ދުވަހު އެވެ. އޭނާ ގެއްލުނު ހާދިސާ ތަޙްޤީޤު ކުރުމަށް ތުރުކީ ފުލުހުން ކުރަމުންދާ މަސައްކަތަށް ކުރިއެރުން ލިބެމުން އަންނަ ކަމަށް ތުރުކީ ފުލުހުން ބުނެއެވެ. ނަމަވެސް ތަޙްޤީޤާއި ގުޅޭ ރަސްމީ އެއްވެސް މައުލޫމާތެއް އަދި ހާމައެއް ނުކުރެއެވެ.

މި މައްސަލަ ތަޙްޤީޤް ކުރުމަށް މިދިޔަ ހަފްތާގައި ތުރުކީގައި ހުންނަ ސައުދީ ކޮންސިއުލޭޓްއަށް ފުލުހުން ވަދެފައިވާއިރު، 9 ގަޑިއިރު ވަންދެން އެތަންވަނީ ބަލާ ފާސްކޮށްފައެވެ.