އަނިޔާވެރިކޮށް މަރާލާފައިވާ ސައުދީ އަރަބިޔާގެ ނޫސްވެރިޔާ، ޖަމާލް ޚަޝޯޤީގެ މައްޗަށް ޣައިބަށް ކަށުނަމާދު ކޮށްފިއެވެ. މައްކާގައި ހުންނަ މާތްވެގެންވާ މަސްޖިދުލް ހަރަމުގަޔާއި މަދީނާގައި ހުންނަ މަސްޖިދުލް ނަބަވީގައި، ޚަޝޯޤީގެ މައްޗަށްވަނީ ޣައިބަށް ކަށުނަމާދު ކޮށްފައެވެ.

ޚަބަރު ފަތުރާ ވަސީލަތްތަކުން ބުނާގޮތުގައި ޣައިބަށް ކުރެވުނު ކަށުނަމާދު އޮތީ މިއަދު ހުކުރު ނަމާދަށް ފަހުގައެވެ. އަދި، ނަބަވީ މިސްކިތުގައި ޣައިބަށް ކުރި ކަށުނަމާދުގައި، ޚަޝޯޤީގެ ދަރިފުޅު، ޞާލިހުވެސް ބައިވެރިވެފައިވެއެވެ.

فيديو / قبل قليل تمت صلاة الجنازة على الميت الغائب (جمال خاشقجي) رحمة الله في الحرم المكي 🕋#جمال_خاشقجي#الحرم#مكة pic.twitter.com/owFBiYyYiI

— الزيادي (@AlziadiQ8) November 16, 2018

މާތްވެގެންވާ މައްކާ އާއި މަދީނާގެ އިތުރުން، ތުރުކީގެ އިސްތަންބޫލުގައި ހުންނަ ފާތިހު މިސްކިތުގައިވެސްވަނީ ނޫސްވެރިޔާގެ މައްޗަށް ޣައިބަށް ކަށުނަމާދުކޮށްފައެވެ. ހަމައެހެންމެ، އިނގިރޭސިވިލާތުގެ ލަންޑަނުގައި ހުންނަ ފިންސްބަރީ ޕާކް މިސްކިތުގައިވެސް ކަށުނަމާދު ކުރަން ހަމަޖެހިފައިވާކަމަށް މައުލޫމާތު ލިބެއެވެ.

ޚަޝޯޤީގެ މަރުގެ މައްސަލަ ކުރުކޮށް

"ވޮޝިންޓަން ޕޯސްޓް" ނޫހަށް ކޮލަމް ލިޔަމުން ގެންދިޔަ ޚަޝޯޤީ މަރާލާފައިވަނީ މިދިޔަ އޮކްޓޯބަރ މަހުގެ ދެވަނަ ދުވަހު، އިސްތަންބޫލުގައި ހުންނަ ސައުދީގެ ކޮންސިއުލޭޓުގެ ތެރޭގައެވެ. އޭނާ މަރާލުމަށްފަހު، ހަށިގަނޑުގެ ގުނަވަންތައް ކުދިކުދި ކޮށްލާފައިވާކަމަށް މައްސަލަ ތަހުގީގު ކުރި ގިނަ ފަރާތްތަކަކުން ބުނެފައިވެއެވެ.

ޚަޝޯޤީ މަރާލުމުގެ މަސައްކަތް، 15 މީހުންގެ ޓީމަކާ ހަވާލުކޮށްގެން ކުރިއިރު، އެޓީމުވެސް އިތުރު ތިން ވަކި ޓީމަކަށް ބަހާފައިވާކަމަށް ސައުދީގެ ޕަބްލިކް ޕްރޮސެކިއުޓަރ ބުނެފައިވެއެވެ. އަދި، ނޫސްވެރިޔާ މަރާލުމަށް އަމުރުކޮށްފައިވަނީ ތިން ޓީމުގެ ތެރޭގައި ހިމެނޭ ނެގޯޝިއޭޝަން ޓީމުގެ ވެރިޔާކަމަށްވެސް ބުނެފައިވެއެވެ.

މައްސަލައާ ގުޅުން ހުރި އޯޑިޔޯ ރިކޯޑިންތަކެއް ތުރުކީން ހޯދާފައިވާއިރު، މައްސަލައާ ގުޅުންހުރި ފަސް މީހަކު މަރަން ސައުދީން މިހާރުވަނީ ނިންމާފައެވެ.

ޚަޝޯޤީގެ މައްސަލައަކީ މުޅި ދުނިޔޭގެ ސަމާލުކަން ލިބިގެންދިޔަ މައްސަލައެއްކަން ފާހަގަކޮށްލެވެއެވެ.