އަވަށްޓެރި ސްރީ ލަންކާގެ ބޮޑުވަޒީރުގެ ކަމުގެ މަޤާމުގައި ހުންނެވި އެޤައުމުގެ ކުރީގެ ރައީސް މަހިންދަ ރާޖަޕަކްސަ އިސްތިއުފާ ދެއްވުމަށް ނިންމަވައިފިއެވެ. މިކަންވަނީ އޭނާގެ ފަރާތްޕުޅުން ކަށަވަރުވެސް ކޮށްދެއްވާފައެވެ.
ރާޖަޕަކްސަގެ ދަރިކަލުން އަދި އެޤައުމުގެ ސިޔާސީ ފަރާތެއްކަމުގައިވާ ނަމަލް ރާޖަޕަކްސަ ކުރައްވާފައިވާ ޓްވީޓެއްގައި ވިދާޅުވީ ރާޖަޕަކްސަ، ލަންކާގެ ބޮޑުވަޒީރުކަމުން އިސްތިއުފާ ދެއްވުމަށް ނިންމަވާފައިވަނީ ޤައުމުގެ ހަމަޖެހުމަށްޓަކައިކަމަށެވެ.
"ޤައުމުގެ ހަމަޖެހުން ޔަޤީން ކުރުމަށްޓަކައި، ކުރީގެ ރައީސް މަހިންދަ ރާޖަޕަކްސަ ވަނީ މާދަމާ ޤައުމާ މުޚާޠަބު ކުރެއްވުމަށްފަހު މަޤާމުން އިސްތިއުފާ ދެއްވުމަށް ނިންމަވާފައި." ނަމަލްގެ މިރޭ ކުރެއްވި ޓްވީޓެއްގައި ވިދާޅުވިއެވެ.
To ensure stability of the nation, Former President @PresRajapaksa has decided to resign from the Premiership tomorrow after an address to the nation. The SLPP with Frm President, SLFP & others will now work to form a broader political coalition with President Sirisena.
— Namal Rajapaksa (@RajapaksaNamal) December 14, 2018
ނަމަލްގެ ޓްވީޓުގައި އޭނާ އިތުރަށް ވިދާޅުވީ ރާޖަޕަކްސްގެ ޕާޓީ، ސްރީ ލަންކާ ޕޮޑުޖަނާ ޕެރަމުނާ (އެސްއެލްޕީޕީ) އާއި ސްރީ ލަންކާގެ ފްރީޑަމް ޕާޓީ އިން ރައީސްކަމުގެ މަޤާމުގައި ހުންނެވި މައިތިރިޕާލާ ސިރިސޭނާއާއެކު ކޯލިޝަން އިތުރަށް ވަރުގަދަ ކުރެއްވުމަށް މަސައްކަތްޕުޅު ކުރައްވާނެކަމުގައެވެ.
ބޮޑުވަޒީރުކަމަށް ރާޖަޕަކްސަ އައްޔަން ކުރައްވާފައިވަނީ ކުރިން އެމަޤާމުގައި ހުންނެވި ރަނިލް ވިކްސަރަމަސިންހަގެ ޕާޓީއާއެކު ސިރިސޭނާގެ ޕާޓީން ހަދާފައިވާ ކޯލިޝަން ރޫޅާލުމަށްފަހުއެވެ. މިކަންތައްތަކަށްފަހު އެޤައުމުގެ ސިޔާސީ މަޝްރަހު ވަރަށް ބޮޑަށް ހަލަބޮލިވެގެން ދިޔައެވެ. އެގޮތުން، އެޤައުމުގެ ޤާނޫނު ހަދާ މަޖިލީހުގެ މަސައްކަތްތައް ސަސްޕެންޑް ކުރުންވެސް ހިމެނެއެވެ.
ލަންކާގައި އުފެދިފައިވާ ސިޔާސީ ނުތަނަވަސްކަމުގެ ސަބަބުން އެޤައުމުގެ އިޤުތިޞާދުވެސް ދަނީ ހީނަރުވަމުންނެވެ.
