ކޮވިޑް-19 ޖެހިގެން ދެކުނު ކޮރެއާއިން އިތުރު މީހަކު މަރުވެއްޖެ އެވެ.
މިއީ މި ވައިރަސް ޖެހިގެން އެ ގައުމުން މަރުވި ދެ ވަނަ މީހާއެވެ. އެ ގައުމުގެ ނޭޝަނަލް ޑިޒާޒްސްޓަރ ޕްރިވެންޝަން އެންޑް ކައުންޓްރމެޝަރ ހެޑްކުއާޓަސް އިން ބުނީ، މަރުވެފައި ވަނީ އަންހެނެއް ކަމަށާއި، އޭނާގެ އުމުރަކީ 55 އަހަރު ކަމަށެވެ.
އެ މީހުން ބުނެފައިވާގޮތުގައި، އެ މީހާ ކޮވިޑްވައިރަސްއަށް ޕޮޒިޓިވްވެފައިވާކަން އެނގުނީ ހުކުރު ދުވަހުއެވެ.
ކޮވިޑް 19 ޖެހިގެން އެ ގައުމުން ފުރަތަމަ މަރުވި މީހާއަކީ ފުއްޕާމޭގެ ބައްޔަށް ފަރުވާދެމުން ދިޔަ މީހެކެވެ. އޭނާ އެ ބައްޔަށް ފަރުވާ ދިނުމަށް ހޮސްޕިޓަލްގައި އެޑްމިޓްކޮށްފައި އޮންނަތާ ވަރަށް ގިނަ ދުވަސްވެދާނެ ކަމަށް ރިޕޯޓްތައް ބުނެއެވެ.
މިހާރު ދެކުނު ކޮރެއާގައި ކޮވިޑް-19 އަށް ޕޮޒިޓިވްވި މީހުންގެ އަދަދު 204 އަށް ވަނީ އަރާފައެވެ.
އެންމެ ފަހުން އެ ގައުމުން އާއްމު ކުރި ތަފާސް ހިސާބުތައް ބުނާގޮތުގައި، 48 މީހަކު ކޮވިޑް-19 އަށް ޕޮޒިޓިވްވެފައިވާއިރު، އޭގެ ތެރެއިން 42 މީހަކު ޕޮޒިޓިވްވެފައި ވަނީ މި ވައިރަސް އެންމެ ބޮޑަށް އެ ގައުމުގައި ފެތުރެމުން އަންނަ ޑައިގު ސިޓީންނެވެ.