ބޮޑުވަޒީރު ޖުރަޕެ ކޮންޓީ ވިދާޅުވީ މިއީ އުނދަގޫ ވަގުތެއް ކަމަށާއި މިވަގުތު ހުރިހާ ފިޔަވަޅުތަކެއް ވެސް އަޅަން ޖެހޭ ކަމަށެވެ. އަދި މިކަމުގެ ސިޔާސީ ގޮތުން ނަގަންޖެހޭ ހުރިހާ ޒިންމާއެއް ނަގާނެ ކަމަށް ބޮޑުވަޒީރު ވިދާޅުވިއެވެ.

ލޮކްޑައުންކޮށްފައި އޮތްނަމަވެސް ފޮތް ފިހާރަތަކާއި ކުޑަކުދިންނަށް ބޭނުންވާ ހެދުން ވިއްކާ ފިހާރަތަކާއި ސްޓޭޝަނަރީ ވިއްކާ ފިހާރަތައް އަންގާރަ ދުވަހުން ފެށިގެން ހުޅުވުމުގެ ހުއްދަ ލިބޭނެ ކަމަށް އޭނާ ވިދާޅުވިއެވެ.

އިޓަލީގެ ފެކްޓަރީތައް ބަންދުކޮށްފައި ހުރުމުގެ ސަބަބުން ތަޖުރިބާކާރުން ވަނީ އެ ގައުމުގެ އިގްތިސާދު ދަށަށް ދާނެ ކަމުގެ އިންޒާރުދީފައެވެ. އަދި އެ ތަންތަނުގައި މަސައްކަތް ކުރާ މީހުންގެ ވަޒީފާތައް ނެތިގެން ގޮސް، އިގްތިސާދަށް ނޭދެވޭ އަސަރު ކުރާނެ ކަމަށް ކަމާބެހޭ މާހިރުން ވަނީ ބުނެފައެވެ.

އިޓަލީގައި އާދަޔާ ޙިލާފަށް ކޮވިޑް-19 ފެތުރެން ފަށާފައިވާއިރު އެގައުމުން ފުރަތަމަ އެ ވައިރަސް ފެނިފައިވަނީ ފެބްރުއަރީ މަހުގެ 21 ވަނަ ދުވަހުއެވެ. އަދި އެގައުމުގައި ހަލުވިކަމާއެކު ކޮވިޑް-19 ފެތުރެމުންދާއިރު އެގައުމަކީ އެންމެ ގިނަ އަދަދަކަށް މީހުން މަރުވެގެން ރިޕޯޓްކުރަމުން އަންނަ ގައުމެވެ.

އިޓަލީގައި މިހާތަނަށް ވަނީ 147،577 މީހުން ޕޮޒިޓިވްވެ 18،849 މީހުން މަރުވެފައެވެ.