ކައުންސިލް އިމާރާތްތައް އަޅާނެ ރަށްތައް ކަނޑައެޅުމުގެ މަސައްކަތް މި މަސް ނިމުމުގެ ކުރިން ނިންމަން މަސައްކަތް ކުރައްވަމުންދާ ކަމަށް ސިޓީތަކާއި އިދާރީ ދައިރާތައް ހިންގުމާއި އާންމު މަސައްކަތްތަކާ ބެހޭ ވަޒީރު އާދަމް ޝަރީފް އުމަރު ވިދާޅުވެއްޖެއެވެ.
ޕީއެސްއެމް ނިއުސްގެ ރާއްޖެމިއަދު ޕްރޮގްރާމްގައި ވާހަކަދައްކަވަމުން ޝަރީފް ވިދާޅުވީ، އޮފީސް އިމާރާތްތައް އަޅާނެ ރަށްތައް ކަނޑައެޅުމުގައި ގުޅޭ މަޝްވަރާތައް ކުރައްވަމުން ގެންދަވާ ކަމަށާއި އެކަމަށް އޫސޫލެއް ވެސް ތައްޔާރުކޮށްފައިވާ ކަމަށެވެ.
މި މަޝްރޫއު ކުރިއަށް ގެންދިއުމަށް ބޭނުންވާ ވަޞީލަތްތައް ޗައިނާ ސަރުކާރުން ހިލޭ ފޯރުކޮށްދިނުމަށް ނިންމާފައިވާ ކަަމަށް ވެސް ވިދާޅުވިއެވެ.
"އޮފީސް އިމާރާތްތައް ތަރައްޤީކުރާނީ އެކަށީގެންވާ ޖާގައާއި ޒަމާނީ ވަޞީލަތްތައް ހިމަނައިގެން ޒަމާނަށް އަންނަމުންދާ ބަދަލުތަކާއެކު އިތުރަށް ބޭނުންވާ އިންސާނީ ވަޞީލަތްތައް ޤާއިމްކުރެވޭނެ އިންތިޒާމްތަކާއެކު،" ވަޒީރު ވިދާޅުވިއެވެ.
މިއަހަރު 50 ރަށެއްގައި ކައުންސިލް އިމާރާތްތައް އަޅައިދެއްވާނެ ކަމަށް ރައީސް ޑރ. މުހައްމަދު މުއިއްޒު ވަނީ ކުރިން ވިދާޅުވެފައެވެ. ހދ. ކުޅުދުއްފުށި ސިޓީގެ ރައްޔިތުންނާއެކު ބޭއްވި ބައްދަލުވުމެއްގައި ރައީސް ވިދާޅުވީ މިހާތަނަށް ކުރެއްވި ގިނަ ދަތުރުރަކުން ފާހަގަ ކުރެވުނީ ގިނަ ކައުންސިލް އޮފީސްތައް ހުރީ ބޮލަށް ވެއްޓޭ ހިސާބުގައި ކަމަށެވެ.
"މިހާތަނަށް ކުރެވުނު ހުރިހާ ދަތުރުތަކުން ވެސް ފާހަގަކުރެވުނީ ގިނަ ކައުންސިލް އޮފީސްތައް ހުރީ ބޮލަށް ވެއްޓޭ ހިސާބުގައި ކަން، ވާރޭވެހިއްޖެނަމަ ރަނގަޅަށް ހިދުމަތެއް ނުދެވޭ، 13 ނޫނީ 14 އަހަރު ލާމަރުކަޒީ ނިޒާމު ޕްރެކްޓިސް ކުރަން ފެށިތާ އެހެންނަމަވެސް ކައުންސިލް އޮފީސްތައް ތަރައްޤީ ކުރަން ދުވަހަކު ވެސް ބަޖެޓުން ޖާގަ ލިބޭ ކަމަކަށް ނުވޭ، އަޅުގަނޑުމެން ފުރަތަމަ ފިޔަވަހީގެ ދަށުން 50 ކައުންސިލް ނަގާ، 50 ރަށެއްގައި ކައުންސިލް އިމާރާތްތައް މިއަހަރު އަޅައިދޭނަން،" ރައީސް ވިދާޅުވެފައިވެއެވެ.
އޮފީސްތައް ތަރައްޤީކުރުމުގެ ފުރަތަމަ ފިޔަވަހީގައި އިސްކަން ދެނީ އެންމެ ބޮޑަށް ހަލާކުވެފައިވާ، އެންމެ ޖާގަ ކުޑަ އަދި އާބާދީގެ ގޮތުން އެކަމަށް އެންމެ ބޭނުންޖެހިފައިވާ ރަށްތަކަށް ކަމަށް ސަރުކާރުން ވަނީ ބުނެފައެވެ.
