ދުނިޔޭގެ ހުރިހާ ގައުމެއްގައި އެޕަލް އައިފޯން ވިއްކާ މިންވަރު ދަށަށް ގޮސްފައިވާ ކަމަށް އެ ކުންފުނީގެ ތަފާސް ހިސާބުތަކުން ދައްކައިފިއެވެ.
ޓެކްނޮލޮޖީ ޖަޔަންޓުން ބުނީ މިއަހަރުގެ ފުރަތަމަ ތިން މަސް ދުވަހުގެ ތެރޭގައި ސްމާޓްފޯނުތަކަށް ޖުމްލަ ޑިމާންޑް %10 އަށް ވުރެ ދަށްވެފައިވާ ކަމަށާއި ޔޫރަޕް ފިޔަވައި ކޮންމެ ޖިއޮގްރަފިކް ސަރަހައްދެއްގައި ވެސް ޑިމާންޑު ދަށްވެފައިވާ ކަމަށެވެ.
އެޕަލް އިން ބުނީ ޖުމްލަކޮށް ބަލާއިރު މުޅި ކުންފުނީގެ އާމްދަނީ %4 ދަށަށް ނުވަތަ 90.8 ބިލިއަން ޑޮލަރު (72.5 ބިލިއަން ޕައުންޑް) އަށް ދަށް ވެފައިވާ ކަމަށެވެ. މިއީ އަހަރަކަށްވުރެ ގިނަ ދުވަސްވަންދެން އެންމެ ބޮޑު ދަށްވުމެވެ. ނަމަވެސް ނަތީޖާ އުއްމީދު ކުރި ވަރަށް ވުރެ ދަށަށް ގޮސްފައި ނުވާ ކަމަށް ބުނެފައިވާއިރު، އެއީ ނިއުޔޯކްގައި އާފްޓާ އަވާސް ޓްރޭޑިންގައި އެޕަލްގެ ހިއްސާގެ އަގު އުފުލިގެން ދިޔުމުން ކަމަށެވެ.
އެ ކުންފުނިން ބުނާގޮތުން އެޕަލް އައިފޯނު ވިއްކާ މިންވަރު ދުނިޔޭގެ ބާޒާރުގައި ވެއްޓުނީ ކޮވިޑް-19ގެ އާލަމީ ވަބާގެ ސަބަބުން ސަޕްލައިއަށް ކުރި އަސަރާއި ގުޅުގެންނެވެ. ނަމަވެސް މިދިޔަ އަހަރުގެ މި މުއްދަތުގައި އާދަޔާ ހިލާފަށް ވިޔަފާރި ކުރިއަރާފައިވާ ކަމަށް އެޕަލްއިން ބުނެއެވެ.
ސޭލް މިދުވަސްކޮޅު ދަށްވި ނަމަވެސް ކުރިޔަށް އޮތް މަސްތަކުގައި ވިޔަފާރި ރަނގަޅުކުރާނެ ކަމަށް އެ ކުންފުނިން ވަނީ ބުނެފައެވެ. އެގޮތުން އާ ޕްރޮޑަކްޓްތައް ލޯންޗުކުރުމާއި އާޓިފިޝަލް އިންޓެލިޖެންސް (އޭއައި) އަށް ކުރާ އިންވެސްޓްމަންޓްތައް ފާހަގަކޮށްފައިވެއެވެ.
އައިފޯނަށް ބަލާއިރު، ޗައިނާ މާކެޓުގައި ވިޔަފާރި ވަނީ %8 ދަށްވެފައެވެ. ދުނިޔޭގެ ދެވަނައަށް އެންމެ ބޮޑު އިގްތިސާދުގެ ވިޔަފާރީގެ ހާލަތާ ބެހޭ ގޮތުން އިންވެސްޓަރުންނަށް ޔަގީންކަން ދިނުމަށް އެ ކުންފުނިން ވަނީ އައިފޯންގެ ވިޔަފާރި ޗައިނާގައި އިތުރުވެފައިވާކަން ފާހަގަކުރައްވާފައެވެ.
އައިފޯނުގެ މާކެޓުގައި ވާވޭ ފަދަ ވާދަވެރި ކުންފުނިތައް ދަނީ ވަރުގަދަވަމުންނެވެ.
ޑީއޭ ޑޭވިޑްސަންގެ ސީނިއާ ސޮފްޓްވެއާ އެނަލިސްޓް ގިލް ލޫރިއާ ވިދާޅުވީ ވާވޭ ފަދަ ކުންފުނިތަކުން ޗައިނާގައި ރަނގަޅު ނަތީޖާއެއް ނެރެނީ އެއީ ހޯމްގްރޯން ބްރޭންޑެއް ކަމަށް ވާތީ ކަމަށެވެ. އެކަމަކު ފީޗާސްތަކާއި ފަންކްޝަނަލިޓީ އަދި ޕްރެސްޓިޖްގެ ގޮތުން އައިފޯނަށް އަދިވެސް އެހެން ހެންޑްސެޓަކަށް ވުރެ ކުރިއެރުމެއް އެބައޮތް ކަމަށް ބީބީސީގެ ޓުޑޭ ޕްރޮގްރާމްގައި އޭނާ ވަނީ ވިދާޅުވެފައެވެ.
މިދިޔަ ހަ ކުއާޓަރުގެ ތެރެއިން ފަސް ކުއާޓަރުގައި އެޕަލްގެ ސޭލްސް ދަށްވެފައިވާކަމަށް ރިޕޯޓްތައް ބުނެއެވެ. ދުނިޔޭގެ ފެންވަރުގައި ސްމާޓްފޯން ޝިޕްމަންޓް އަހަރުގެ ފުރަތަމަ ތިން މަސް ދުވަހުގެ ތެރޭގައި %10 އިތުރުވެފައިވާއިރު، ދިގު މުއްދަތަކަށް ސްމާޓްފޯން ޝިޕްމަންޓް ފުޅާވެފައިވާ ކަމަށް ރިސާޗް ފަރުމާއެއް ކަމަށްވާ ކެނަލިސް އިން ބުނެއެވެ.
ލޫރިއާ ވިދާޅުވީ އެޕަލްއަށް މީގެ ގާތްގަނޑަކަށް ހަތަރު އަހަރު ކުރިން އައިފޯން 12 ނެރެ، އެޕަލް އިން 5ޖީ ކަނެކްޓިވިޓީ ތައާރަފްކުރި ފަހުން ފޯނު އަޕްގްރޭޑް ކުރަން ގިނަ ކޮންސިއުމަރުންނަށް މަޖުބޫރުވި ކަމަށާއި ފަހުން ހޭންޑްސެޓަށް މާބޮޑު ކުރިއެރުމެއް އައިސްފައި ނުވާ ކަމަށެވެ. އަދި މިވަގުތު ކަސްޓަމަރުން އުންމީދުކުރަނީ މިއަހަރުގެ ފަހުކޮޅު ނެރޭ އައިފޯން 16 އަށް އެކަށީގެންވާ އާ އޭއައި ފީޗާސްތަކެއް ތައާރަފް ކުރެވޭނެ ކަން ކަމަށްވެސް ވިދާޅުވިއެވެ.
