އިންޑިއާ އިން ފަލަސްތީނުގެ ރެފިއުޖީންނަށް 2.5 މިލިއަން ޑޮލަރު ދީފިއެވެ.

ފަލަސްތީނުގެ ހާލުގައި ޖެހިފައިވާ ރައްޔިތުންނަށް ބޭނުންވެފައިވާ މި އެހީ އިންޑިއާ އިން ހަވާލުކޮށްފައި ވަނީ އދ. ގެ ޔޫއެންއާރުޑަބްލިއުއޭއާ އެވެ. މިދިޔަ މަހުގެ 7 އިން ފެށިގެން އިސްރާއީލުން ފަލަސްތީނުގެ ޣައްޒާގެ އެކި ހިސާބުތަކަށް ބޮން އެޅުމުގެ ސަބަބުން އެތައް ބަޔަކު ވަނީ ގެދޮރު ގެއްލި ހާލުގައި ޖެހިފައެވެ.

2nd tranche of 🇮🇳’s humanitarian assistance for the people of Palestine arrives in Egypt.

Relief material handed over to Egyptian Red Crescent for further transmission to Palestine. pic.twitter.com/FX2pFwtpIw

— Arindam Bagchi (@MEAIndia) November 19, 2023

ހާލުގައި ޖެހިފައިވާ ފަލަސްތީނުގެ ރައްޔިތުންނަށް އެހީވުމަށްޓަކައި މީގެކުރިން ދެ ފަހަރެއްގެ މަތިން އިންޑިއާ އިން ވަނީ އިންސާނީ އެހީ މިސްރަށް ފޮނުވައިފައެވެ. އެގޮތުން އެންމެ ފަހުން މިސްރުގެ ރެޑް ކްރެސެންޓަށް އިންސާނީ އެހީ ހަވާލުކޮށްފައި ވަނީ މިދިޔަ އާދިއްތަ ދުވަހުއެވެ.

އިންޑިއާގެ ބޮޑުވަޒީރު ނަރެންދުރަ މޯދީ މީގެކުރިން ވިދާޅުވެފައި ވަނީ އޮކްޓޯބަރު 7 ވަނަ ދުވަހު ހަމާސް އިން އިސްރާއީލަށް އަމާޒުކޮށް ދިނީ "ޓެރަރިސްޓް" ހަމަލާތަކެއް ކަމަށާއި އެކަން ކުށްވެރި ކުރައްވާފައި ވާނެ ކަމަށެވެ. ހަމައެގޮތަށް އިސްރާއީލް އާއި ހަމާސްއާ ދެމެދުގައި ކުރިއަށްދާ ހަނގުރާމައިގެ ތެރޭގައި ކުށެއް ނެތް އެތައް އާންމުންނެއް މަރުވަމުންދާތީވެ، އެކަން ވެސް ކުށްވެރި ކުރައްވާ ކަމަށް މޯދީ ވިދާޅުވިއެވެ.

މޯދީ ވިދާޅުވީ ފަލަސްތީނުގެ ރައީސް މަހްމޫދު އައްބާސްއާ އެކީގައި ކުރެއްވުނު މަޝްވަރާތަކުގެ އަލީގައި ފަލަސްތީނަށް އިންސާނީ އެހީ ފޯރުކޮށްދެއްވާނެ ކަމަށެވެ. އަދި މިއީ އެހެން ގައުމުތަކުން ވެސް ފަލަސްތީނަށް އެހީވާންވީ ވަގުތު ކަމުގައި މޯދީ ވިދާޅުވިއެވެ.

އިންޑިއާ އިން ބުނާ ގޮތުގައި ހަމާސް އާއި އިސްރާއީލްއާ ދެމެދު ހަނގުރާމަ ފެށުނު ފަހުން މިހާތަނަށް އައިއިރު 70 ޓަނުގެ އިންސާނީ އެހީ ޣައްޒާ އަށް ފޮނުވާފައިވާނެއެވެ. އޭގެ ތެރޭގައި 16.5 ޓަނުގެ ބޭހާއި ސިއްހީ ސާމާނު ހިމެނޭ ކަމަށް ވެސް އިންޑިއާ އިން ބުނެއެވެ. އިންޑިއާ އިން ބުނީ މި އެހީ ފަލަސްތީނުގެ ރައްޔިތުންނަށް ފޯރުކޮށްދިނުމުގައި މިސްރުން އަދާކުރާ ދައުަރަށް ޝުކުރު އަދާކުރާ ކަމަށާއި ކުރިއަށް އޮތް ތަނުގައި ވެސް އެހީ ދިނުމުގައި ދެމިތިބޭނެ ކަމަށެވެ.