މަޝްހޫރު ބަތަލު ޓައިގާ ޝްރޮފާއި އޭނާގެ ކޮއްކޮ ކްރިޝްނާ ގުޅިގެން ފިޓްނެސް ޖިމެއް ހުޅުވަން އުޅޭކަން ޓައިގާ ކަށަވަރު ކޮށްދީފިއެވެ.
މިކްސްޑް މާޝަލް އާޓްސް މެޓްރިކްސް (އެމްއެމްއޭއެމް) ގެ ނަމުގައި ހުޅުވާ އެ ޖިމަކީ މިކްސްޑް މާޝަލް އާޓްސްއަށް ހާއްސަ ޖިމެކެވެ.
އިންޑިއާގެ ބަންޑްރާގައި އަންނަ މަހުގެ އެއްވަނަ ދުވަހު ހުޅުވާ ޖިމާ ބެހޭ ގޮތުން ވާހަކަ ދައްކަމުން ޓައިގާ ބުނީ، އޭނާއަކީ ފިޓްނެސް އާއި މާޝަލް އާޓްސްގެ ހަރަކާތްތަކަށް އެންމެ ކުޑައިރުއްސުރެއް ވަރައް ބޮޑަށް ލޯބި ޖެހިފައިވާ މީހެއް ކަމަށެވެ. އަދި އޭނާ އެކޭ އެއްފަދައިން އޭނާގެ ކޮއްކޮ ކްރިޝްނާއަކީ ވެސް މިކްސްޑް މާޝަލް އާޓްސްއަށް ލޯބިކުރާ ފަރާތެއް ކަމަށް ޓައިގާ ބުނެފައިވެއެވެ. ވުމާއި އެކު އެ ފިޓްނެސް ސެންޓަރު ހުޅުވުމުގެ އެންމެ ބޮޑު ބޭނުމަކީ ވެސް މިކްސްޑް މާޝަލް އާޓްސް ދިރުވާ އާލާކުރުން ކަމުގައި ޓައިގާ ބުނެފައިވެއެވެ.
ޓައިގާއަކީ މާޝަލް އާޓްސްގެ ދާއިރާއިން ފުންނާބު އުސް ފަރާތެކެވެ. އެގޮތުން ޓައިގާ ވަނީ މާޝަލް އާޓްސްގެ ދާއިރާއިން ލިބޭ އެންމެ މަތީ ދަރަޖަ ކަމަށްވާ ބްލެކް ބެލްޓެއް ހޯދާފައެވެ.
އުމުރުން 28 އަހަރުގެ ޓައިގާ ބޮލީވުޑަށް ތައާރަފްވެފައިވަނީ 2014 ވަނަ އަހަރު ރިލީސް ކުރި ފިލްމު "ހީރޯޕަންތީ" އިންނެވެ. އޭގެ ފަހުން އޭނާ ވަނީ "ބާގީ" އާއި "ބާގީ2" ކުޅެދީ ގިނަ ބައެއްގެ ސަމާލުކަން ހޯދައިފައެވެ. ނަތީޖާއެއްގެ ގޮތުން "ބާގީ3" އިންވެސް ޓައިގާ އަށް މިވަނީ ފުރުސަތު ލިބިފައެވެ.
