މޫސުމާއި ބެހޭ ގައުމީ އިދާރާ (މެޓް) އިން މީގެ ހަތަރު ވަރަކަށް ގަޑިއިރު ކުރިން ހުދު ސަމާލު ނެރެފައިވަނީ ހއ. އަތޮޅުން ފެށިގެން ފ. އަތޮޅާއި ހަމައަށް ހަވީރު 16:15 އިން ފެށިގެން 20:15 އާއި ހަމައަށެވެ. މި ހުދު ސަމާލުގައި ބުނެފައިވަނީ ބޯކޮށް ވާރޭވެހުމާއެކު ގުގުރާނެ ކަމަށް ލަފާ ކުރެވޭ ކަމަށެވެ.
މި ސަމާލުގެ ފަހުން މެޓުން ނެރެނު ސަމާލުގައި ވަނީ ހއ. އަތޮޅުން ފެށިގެން ލ. އަތޮޅާއި ހަމައަށް މިރޭ 20:00 އިން ފެށިގެން 00:00 އަށެވެ.
މޫސުމާބެހޭ ގައުމީ އިދާރާގެ އޮފިޝަލަކު "ވަގުތު" އަށް ވިދާޅުވީ މުޅި ރާއްޖެއަށް މިއަދުވެސް އަދި މާދަމާވެސް ވަރަށް ބޮޑަށް ވިއްސާރަކުރާނެ ކަމަށެވެ. އެކަމަކު އުތުރުގެ ބައެއް އަތޮޅުތަކަށް މާދަމާގެ މެންދުރުފަހުން މޫސުން ރަނގަޅުވާނެ ކަމަށް ބެލެވޭ ކަމަށްވެސް ވިދާޅުވިއެވެ.
އޮފިޝަލު ވިދާޅުވީ މިހާރު ރާއްޖެއަށް ކުރަމުންދާ ވިއްސާރައަކީ ރާއްޖޭޣެ ސަރަހައްދުގައި ބޯ ވިލާތަކެއް އުފެދުމުގެ ސަބަބުން ކުރަމުންދާ ވިއްސާރައެއް ކަމަށެވެ. ނަމަވެސް މި ވިއްސާރައާޢި ގުޅިގެން ވައި ގަދަވެ ކަނޑުތައް ގަދަ ނުވާނެ ކަމަށް ވެސް ވިދާޅުވިއެވެ.