ތަފާތުކުރުމާއި އަނިޔާވެރިކަމާ ދެކޮޅަށް ކުރިމަތިލައި، އެކަންކަން، މަސައްކަތުގެ މާހައުލުން ނައްތާލުމަށް މަސައްކަތް ކުރުމަކީ އެންމެންގެ ވާޖިބަކަށް ހެދުމަށް ތައުލީމާއި މަސައްކަތްތެރިކަމާއި ހުނަރުތައް ތަރައްގީކުރުމާ ބެހޭ ވަޒީރު ޑރ. މަރިޔަމް މާރިޔާ ގޮވާލައްވައިފިއެވެ.

މަސައްކަތްތެރިންގެ ދުވަހުގެ މުނާސަބަތުގައި ދެއްވި ބަސްދީގަތުމެއްގައި ވަޒީރު ވިދާޅުވީ، ވޭތުވެދިޔަ 15 އަހަރު ދުވަހު މަސައްކަތްތެރިކަމަށް ނަޒަރު ހިންގާލާއިރު، މަސައްކަތުގެ މާހައުލުގެ ރައްކާތެރިކަމާއި ސިއްހަތު ކަށަވަރުކުރުމަށް ވަނީ ކުރިއެރުންތަކެއް ލިބިފައި ކަމަށެވެ. އެގޮތުން ގާނޫނީ އޮނިގަނޑުގެ ތެރެއިން މަސައްކަތުގެ މާހައުލުގެ ރައްކާތެރިކަމާއި ސިއްހަތު ކަށަވަރުކުރުމުގެ ހައްގު މިހާރު ލިބިފައިވާ ކަމަށް ވިދާޅުވިއެވެ. އެ ގާނޫނުގެ ފޮނިމީރުކަން ދިވެހި މަސައްކަތްތެރިންނަށް ވަރަށް އަވަހަށް ލިބިގެންދާނެ ކަމަށް އޭނާ ވިދާޅުވިއެވެ.

"މަސައްކަތްތެރިންގެ ދުވަހު، އަޅުގަނޑުމެން ހަނދާނަށް ގެންނަން އެބަޖެހޭ އިންސާފުވެރި އުޖޫރައާ ދޭތެރޭ. ރައްކާތެރި މަސައްކަތުގެ މާހައުލާ ދޭތެރޭ. އަބުރުވެރި ވަޒީފާއެއް ހޯދުމުގެ ފުރުސަތު ހިމެނޭ ގޮތަށް، މަސައްކަތްތެރިންގެ އަސާސީ ހައްގުތައް ހިމާޔަތް ކުރުމާ މެދު. ރާއްޖޭގައި، މަސައްކަތުގެ އިޖްތިމާއީ އަދުލުވެރިކަމާއި، އިގްތިސޯދީ ކުރިއެރުމާއި، ދެމެހެއްޓެނިވި ތަރައްގީ އާލާކުރުމުގައި، އަބުރުވެރި މަސައްކަތްތައް އަދާކުރާ ވަރަށް މުހިންމު ދައުރެއްވާކަމަށް އަޅުގަނޑުމެން ގަބޫލުކޮށް، ދެނެގަންނަން އެބަޖެހޭ." ވަޒީރު މާރިޔާ ވިދާޅުވިއެވެ.

ރާއްޖޭގެ ކޮންމެ މަސައްކަތްތެރިއަކަށްވެސް، އެމީހަކަށް ހައްގުވާ ކަރާމާތާއި އިހްތިރާމް ލިބިދިނުމަކީ ސަރުކާރުގެ ވަރަށް ބޮޑު އަމާޒެއް ކަމަށް ވަޒީރު ވިދާޅުވިއެވެ. އެހެންކަމުން، މިއަދު އެންމެ ބޮޑު އިލްތިމާސަކީ މަސައްކަތްތެރިންނަށް ހައްގުވާ އިހްތިރާމް، އޭގެ ފުރިހަމަ މާނާގައި، އެފަރާތްތަކަށް ލިބިދެވޭނެ ގޮތަށް، ސިޔާސަތުތަކާއި އުސޫލުތައް ބައްޓަންކޮށް، އެކަންކަން، އަމަލުން ދެއްކުން ކަމަށެވެ.

މިއަދު ފާހަގަކުރަނީ މަސައްކަތްތެރިންގެ ބުރަ މަސައްކަތާއި އެފަރާތްތަކުގެ ހިދުމަތް ކަމަށާއި މާލޭގެ ހަލަބޮލި މަގުތަކުން ފެށިގެން، ރީތި ޖަޒީރާ ގޮޑުދޮށްތަކާ ހަމައަށްް ފެންނަ ތަރައްގީއާއި ކުރިއެރުމާއި ތަމައްދުނުގެ މައި މޭސްތިރިންނަކީ މަސައްކަތްތެރިން ކަމަށް ވިދާޅުވިއެވެ.

"މަސައްކަތުގެ މާހައުލާއި އެންމެންނަށް އަބުރުވެރި މަސައްކަތެއް ހޯދުމުގައި ދެމިއޮތް ގޮންޖެހުންތައް، އަދިވެސް ވާކަމަށް، އަޅުގަނޑުމެން އެބަ ގަބޫލުކުރަން ޖެހޭ. މަސައްކަތުގެ މާހައުލުގައި ހިތްހަމަނުޖެހޭ ކަންކަން އެބަ ހިނގާ. ތަފާތުކުރުމާއި، ގަނާކުރުމާއި ނުތަނަވަސްކަމުގެ ހާދިސާތަކުގެ ވާހަކަތައް އެބަ އަޑުއިވޭ. މަސައްކަތްތެރިންގެ ހައްގުގައި، މި ފަދަ ތަފާތުކުރުމާއި އަނިޔާވެރިކަމާ ދެކޮޅަށް ކުރިމަތިލައި، އެކަންކަން، މަސައްކަތުގެ މާހައުލުން ނައްތާލުމަށް މަސައްކަތް ކުރުމަކީ، އަޅުގަނޑުމެން އެންމެންގެ ވާޖިބެއްކަމަށް ހައްދަވާ." ވަޒީރު ވިދާޅުވިއެވެ.

ވަޒީރު ވިދާޅުވީ، އެއްބައިވަންތަކަމާއި އެއްބާރުލުމުގެ ރޫހެއްގައި، ސަރުކާރުގެ އިދާރާތަކާއި، ވަޒީފާދޭ ފަރާތްތަކާއި، ޓްރޭޑް ޔޫނިއަންތަކާއި، މަދަނީ ޖަމްއިއްޔާތައް ގުޅިގެން ރާއްޖޭގައި މަސައްކަތުގެ މާހައުލުގެ ރައްކާތެރިކަމާއި ސިއްހީ ކަންކަން ކަށަވަރުކޮށް، އަބުރުވެރިކަމުގެ މަސައްކަތުގެ މަގްސަދުތައް ކުރިއަށް ގެންދިއުމަށެވެ. އެންމެން އެކުގައި ގައުމު ބިނާކުރެވޭނީ، ކޮންމެ މަސައްކަތްތެރިއަކަށްވެސް، އެމީހެއްގެ ފުރިހަމަ ގާބިލްކަން ހަގީގަތަކަށް ހަދައި، ކަރާމާތާއި ފުރިހަމަ ދިރިއުޅުމެއް އުޅުމަށް، ބާރުވެރިކުރެވޭ މުޖުތަމައެއް ގާއިމުކޮށްގެން ކަމަށް މާރިޔާ ވިދާޅުވިއެވެ.