މާލެ އަށް މިހާރު ކުރަމުންދާ ވިއްސާރައިގެ ސަބަބުން މާލޭގެ ބައެއް މަގުތައް ބަންދުކޮށްފިއެވެ.
ފުލުހުން ވިދާޅުވީ މިހާރު ކުރަމުންދާ ވިއްސާރައިގައި، މާފަންނު ސްޓޭޑިއަމްގައި ހަރުކޮށްފައިހުރި ފެންސުތަކަށް ގެއްލުންތަކެއް ލިބިފައިވާ ކަމަށާއި ރައްކާތެރިކަމުގެ ގޮތުން ބައެއް މަގުތައް ބަންދު ކުރެވިފައިވާ ކަމަށެވެ. އެގޮތުން ބަންދުކުރީ އަމީނީމަގުގެ ދެކުނުފަޅިން ހިލާލީ މަގުން ފެށިގެން މާފަތްތަކުރުފާނު މަގާ ހަމައަށެވެ.
މި ދުވަސްވަރު ރާއްޖެއަށް ކުރަމުންދާ ވިއްސާރައިގައި ވައި ގަދަވެ ކަނޑު ގަދަވާނެ ކަމަށް ލަފާކޮށްފައިވާތީ ދަތުރުތައްވެސް ކޮންމެހެން ކުރަން ޖެހިއްޖެ ހާލަތުގައި މެނުވީ ނުކުރުމަށް ފުލުހުން ވަނީ އިލްތިމާސްކޮށްފައެވެ. ދަތުރުކުރަން ޖެހިއްޖެ ހާލަތުގައި ވެސް ރައްކާތެރިކަމުގެ ފިޔަވަޅު އެޅުމަށާއި ކުދި އުޅަނދުގައި ދަތުރުނުކުރުމަށްވެސް ވަނީ އިލްތިމާސްކޮށްފައެވެ. ވަކިން ހާއްސަކޮށް ފަޅު ރަށްރަށާއި ފިނޮޅު ފަދަ ތަންތަނަށް ދަތުރު ނުދިއުމަށާއި މޫދަށް ނޭރުމަށް ވެސް ވަނީ އިލްތިމާސްކޮށްފައެވެ.
މާދަމާ ހެނދުނު 6:00 އަށް މެޓްއިން މޫސުން ލަފާކޮށްފައިވާ ގޮތަށް ބަލާއިރު އުތުރާއި މެދުރާއްޖެތެރޭގެ އެކި ހިސާބުތަކަށް ވިއްސާރަ ކުރުމާއެކު ގުގުރާނެއެވެ. އަދި ބައެއް ރަށްތަކަށް ގަދަވަޔާއެކު ބޯކޮށް ވާރޭވެހުން އެކަށީގެންވާ ކަމަށާއި ދެކުނުގެ އަތޮޅުތަކަށް ކެރީގެ އަސަރު ފޯރާނެ ކަމަށް ލަފާކޮށްފައިވެއެވެ.
މެޓުން ލަފާ ކުރާ ގޮތުގައި ވިލާގަނޑުގައި ގަޑިއަކު 55 މޭލާއި 60 މޭލާ ދެމެދުގެ ބާރުމިނަށް ވައިގަދަވުން އެކަށީގެންވެއެވެ. އެހެންކަމުން ސިނަމާލޭ ބުރިޖުން ދަތުރުކުރާއިރުވެސް ރައްކާތެރިކަމުގެ ފިޔަވަޅު އެޅުމަށާއި ކޮންމެހެން ދާންޖެހިއްޖެ ހާލަތެއްގައި ނޫނީ ބުރިޖަށް ނޭރުމަށްވެސް ފުލުހުން އިލްތިމާސްކުރެއެވެ.
