އިގްތިސާދީ ތަރައްގީ އާއި ވިޔަފާރި އާ ބެހޭ ވުޒާރާގެ ދަށުން ހިންގާ މޯލްޑިވްސް އިންޓަނޭޝަނަލް ފައިނޭންޝިއަލް ސާވިސް އޮތޯރިޓީ (އެމްއައިއެފްއެސްއޭ) ހިންގުމަށް ފަސް އަހަރު ދުވަހުގެ މުއްދަތަށް ތަނެއް ހޯދަން އަނެއްކާ ވެސް އިއުލާންކޮށްފިއެވެ.
އިކޮނޮމިކް މިނިސްޓްރީން މީގެކުރިން ކުރި އިއުލާނެއްގައި އަންދާސީ ހިސާބު ހުށަހެޅުމަށް ދީފައިވާ މުއްދަތަކީ މެއި 20 އެވެ. ނަމަވެސް މިއަދު ކުރި އިއުލާންގައި ވަނީ އިމާރާތެއް ކުއްޔަށް ދޫކުރުމަށް ޝައުގުވެރިވާ މީހުން ޖޫން 3 ވާ ހޯމަ ދުވަހުގެ މެންދުރު 12:00 ގައި ވެލާނާގެ 11 ވަނަ ފަންގިފިލާގައި ހުންނަ މިނިސްޓްރީ އަށް ހާޒިރުވެ އަންދާސީ ހިސާބު ހުށަހެޅުމަށް އެދިފައެވެ.
އިގްތިސާދީ ވުޒާރާއިން ކުރި އިއުލާނެއްގައި ބުނީ އެ އޮތޯރިޓީއަށް 700 އަކަފޫޓާއި 1000 އަކަފޫޓުގެ ދެމެދުގެ ޖާގައިގެ ތަނެއް ކުއްޔަށް ހިފުމަށް ބޭނުންވާ ކަަމަށެވެ.
އެމްއައިއެފްއެސްއޭ އަކީ ރާއްޖޭގައި ޑިވެލޮޕްމަންޓް ބޭންކެއް ގާއިމްކުރުމަށްޓަކައި ރައީސް ޑރ. މުއިއްޒު މި އަހަރު ތެރޭގައި އުފައްދަން ނިންމެވި އިދާރާއެކެވެ.
އެ އިދާރާގެ ޗެއާޕާސަންގެ މަގާމަށް ކުރީގެ ނައިބު ރައީސް އަބްދުﷲ ޖިހާދު ވަނީ އައްޔަން ކުރައްވާފައެވެ.
ރާއްޖޭގައި ޑިވެލޮޕްމަންޓް ބޭންކެއް ތައާރަފްކުރުމަކީ ރައީސް މުއިއްޒުގެ ހަފްތާ 14 ގައި ހިމެނޭ ކަމެކެވެ. ޑިވެލޮޕްމަންޓް ބޭންކެއް ގާއިމުކުރުމަށް ބޭނުންވާ ގާނޫނާއި ގަވައިދުތައް އެކުލަވައިލުމަށް ހާއްސަ އޮތޯރިޓީއެއް ވެސް މިދިޔަ މަހުގައި ވަނީ އުފައްދާފައެވެ.
މި އަހަރުތެރޭގައި ރާއްޖޭގައި ޑިވެލޮޕްމަންޓު ބޭންކެއް އެޅުމަށްފަހު ޚިދުމަތް ފަށާނެ ކަމަށް ވަޒީރު ސައީދު ވަނީ މީގެ ދެ މަސް ކުރިން ވިދާޅުވެފައެވެ.
ވަޒީރު ވިދާޅުވި ގޮތުގައި މިހާރު ކުރިއަށް ދަނީ އެ ބޭންކް ވުޖޫދަށް ގެންނަން ބޭނުންވާ ގަވައިދުތައް އެކުލަވައިލުމުގެ މަސައްކަތްތެވެ. މި ބޭންކުން ރާއްޖޭގެ ވިޔަފާރިތަކާއި އިންވެސްޓަރުންނާއި ބޭރުގެ އިންވެސްޓަރުންނަށް ވެސް ބައިވެރިވުމުގެ ފުރުސަތު ލިބޭނެ ކަމަށާއި މީގެ ސަބަބުން މަޝްރޫއުތައް ހިންގަން ބޭނުންވާ ފަންޑް ކުޑަ އިންޓްރެސްޓް ރޭޓެއްގައި އިންވެސްޓަރުންނަށް ލިބޭނެ ކަމަށެވެ.
އެ އޮތޯރިޓީއަށް ބޭނުންވާ ފަންނީ އެހީތެރިކަން ހޯދުމަށް ބޭރުގެ ފަރާތްތަކާއި އެކު ވެސް ސަރުކާރުން އަންނަނީ މަޝްވަރާ ކުރަމުންނެވެ.