ކޮވިޑް-19 އަށް އިއްޔެ ރެކޯޑް އަދަދަކަށް މީހުން ފައްސިވެ އަދި ކޮވިޑް-19 ޖެހިގެން އިއްޔެ ދުނިޔެ އިން ރެކޯޑް އަދަދަކަށް މީހުން މަރުވެއްޖެއެވެ.

ތަފާސް ހިސާބުތައް ދައްކާ ގޮތުގައި އިއްޔެ ވަނީ 678713 މީހަކު ކޮވިޑް-19 އަށް ފައްސިވެ އަދި ކޮވިޑް-19 ޖެހިގެން 12678 އަށް މީހުން މަރުވެފައެވެ. އިއްޔެ އަކީ މިހާތަނަށް ކޮވިޑް-19 އަށް އެއްދުވަސް ތެރޭގައި އެންމެ ގިނަ މީހުން ފައްސިވި، އަދި އެންމެ ގިނަ މީހުން ކޮވިޑް-19 ޖެހިގެން މަރުވި ދުވަހެވެ.

މީގެ ކުރިން އެންމެ ގިނަ މީހުން ކޮވިޑް-19 ޖެހިގެން މަރުވެފައި ވަނީ ބުދަ ދުވަހު އެވެ. ބުދަ ދުވަހު 12396 މީހުން ވަނީ ކޮވިޑް-19 ޖެހިގެން މަރުވެފައެވެ. އޭގެ ކުރިން އެންމެ ގިނަ މީހުން މަރުވެފައި ވަނީ ނޮވެމްބަރ 24 ވަނަ ދުވަހު އެވެ. އެދުވަހު 12276 މީހުން ވަނީ މަރުވެފައެވެ.

މީގެ ކުރިން އެންމެ ގިނަ މީހުން ކޮވިޑް-19 އަށް ފައްސިވެފައި ވަނީ ނޮވެމްބަރ މަހުގެ 20 ވަނަ ދުވަހާއި ނޮވެމްބަރ މަހުގެ 13 ވަނަ ދުވަހު އެވެ.

އިއްޔެ އެންމެ ގިނަ މީހުން ކޮވިޑް-19 އަށް ފައްސިވީ އުތުރު އެމެރިކާ ބައްރުންނެވެ. އުތުރު އެމެރިކާ ބައްރުން އިއްޔެ 242,963 މީހުން ކޮވިޑް-19 އަށް ފައްސިވިއިރު އޭގެތެރެއިން 218,576 މީހުން ކޮވިޑް-19 އަށް ފައްސިވީ އެމެރިކާ އިންނެވެ. އުތުރު އެމެރިކާ އިން އިއްޔެ 3,889 މީހުން ކޮވިޑް-19 ޖެހިގެން އިއްޔެ މަރުވިއިރު އޭގެތެރެއިން 2,918 މީހުން މަރުވީ އެމެރިކާ އިންނެވެ.

އިއްޔެ ވެސް އެންމެ ގިނަ މީހުން މަރުވެފައި ވަނީ ޔޫރަޕުންނެވެ. ޔޫރަޕުން އިއްޔެ 5,489 މީހަކު ވަނީ ކޮވިޑް-19 ޖެހިގެން މަރުވެފައެވެ. ޔޫރަޕުން އިއްުޔެ ކޮވިޑް-19 އަށް ފައްސިވީ 213,071 މީހުންނެވެ. ޔޫރަޕްގެ ގައުމުތަކަށް ބަލާއިރު އިއްޔެ އެންމެ ގިނަ މީހުން މަރުވެފައި ވަނީ އިޓަލީވިލާތުންނެވެ. އިޓަލީވިލާތުން އިއްޔެ 993 މީހުން މަރުވިއެވެ.

ޔޫރަޕާއި ހުޅަނގުގެ ގައުމުތަކުގައި މިހާރު ކޮވިޑް-19 އަށް ފައްސިވާ މީހުންގެ އަދަދު ވަރަށް ބޮޑަށް އިތުރުވެފައިވާ އެއްސަބަބަކީ އެގައުމުތަކަށް ފިނި މޫސުން އައުން ކަމަށް ސިއްހީ ދާއިރާގެ ތަޖުރިބާކާރުން ވިދާޅުވެއެވެ.