ދެ ދައުރުގައި އިލެކްޝަންސް ކޮމިޝަން (އީސީ)ގެ މެންބަރުކަން ކޮށްފިނަމަ އިނާޔަތާއެކު ރިޓަޔާވެވޭ ގޮތަށް ޤަވާއިދަށް ގެނައި އިސްލާހު އުވާލައިފިއެވެ.
އީސީން މިއަދު ކުރި އިއުލާނުގައި ވިދާޅުވީ މުވައްޒަފުންނާއި ކޮމިޝަންގެ މެމްބަރުންނަށް މުސާރަ އާއި އިނާޔަތްތަކާއި އިތުރުގަޑީގެ ފައިސާ ދެވޭ ގޮތަށް ކޮމިޝަންގެ ގަވާއިދަށް މިދިޔަ ފެބްރުއަރީ މަހު ގެނައި ބަދަލު ބާތިލްކޮށްފައިވާ ކަމަށެވެ. އެ އުސޫލު ބާތިލްކުރީ މާލީ ވުޒާރާއިން އެންގުމުން ކަމަށް އީސީން މައުލޫމާތު ދެއެވެ.
އެ ގަވާއިދުގައި ވަނީ ރިޓަޔާކުރުމުގެ ދަރަޖައާއެކު ވަޒީފާއިން ވަކިކުރެވޭނީ އުމުރުން 55 އަހަރު ފުރި އީސީއަށް މަދުވެގެން 15 އަހަރު ޚިދުމަތްކޮށްފައިވާނަމައެވެ.
ނަމަވެސް، ކޮމިޝަންގެ މެމްބަރަކު ރިޓަޔާވާއިރު އުމުރުން 55 އަހަރުވާކަށް ނުޖެހޭނެއެވެ. އެ ކޮމިޝަނަށް 10 އަހަރު ހިދުމަތް ކޮށްފައިވާ ނަމަ، މުޅި އުމުރަށް ލިބޭ އިނާޔަތްތަކާ އެކު ރިޓަޔާ ކުރެވޭނެ ކަމަށް މިހާރުގެ ގަވާއިދުގައި ވިދާޅުވެފައި ވެއެވެ.
ގަވާއިދުގައިވާ ގޮތުން މަހުން މަހަށް އެ މީހެއްގެ މުޅި އުމުރަށް ދެވޭ އިނާޔަތެއްގެ ގޮތުގައި އެ މީހަކު އެންމެ ފަހުން ހުރި ރޭންކަށް ކަނޑައަޅާފައިވާ މުސާރައިގެ 75 ޕަސެންޓް ރިޓަޔާމަންޓު ޕޭގެ ގޮތުގައި ދޭނެއެވެ.
މިނިވަން މުއައްސަސާތަކުން ވަނީ އެ ކޮމިޝަންތަކުގެ މެމްބަރުންނަށް ރިޓަޔާމަންޓު ޕެކޭޖެއް ހަމަޖައްސައިދިނުމަށް ހުށަހަޅާފައެވެ. ނަމަވެސް، ރައްޔިތުންގެ މަޖިލީހުގެ ތެރެއިން އަދި އެ މަސައްކަތެއް ކުރިއަކަށް ނުދެއެވެ.
ވަޒީފާއިން ވަކި ވެގެން ނުވަތަ އެނޫންގޮތަކުންވެސް ވަޒީފާއަދާކުރަމުންދާ މުވައްޒަފަކަށް އެއޮފީހުންދޭ މުސާރަޔާއުޖޫރައާއި އިނާޔަތްފިޔަވައި އެއްވެސް ފައިސާ އެއް އެވެސް މިހަކަށް އެއްވެސް އޮފީހަކުން ނުދެވޭނެ. މިފަދަ ގަވާއިދެއްވެސް ނުހެދޭނެ. ދަވްލަތުގެ ވަޒީފާއިން ރިޓަޔަރ ކޮށްގެން ވިޔަސް ނުވަތް ޕެންސަން ދީގެން ކަމުގާވިޔަސް ވަޒީފާއިން ވަކިވެފައިވާ އެއްވެސް ފަރާތަކަށް ފައިސާ އެއް ދެވެނީ ގާނޫނުއަސަސީގެ 38 ވަނަ މާއްދާއާއި 97 ވަނަ މާއްދާގަ ބުނާ ގާނޫނު ހެދި އެގާނޫނުތަކުގައިވާގޮތުގެ މަތީން، މިނޫންގޮތަކަށް ފައިސާ ދިނުމުގެ ބާރު އެއްވެސް ފަރާތަކަށް ލިބިގެންނުވޭ.