ފަތުވެރިން ގޮވައިގެން ދަތުރުކުވޭ ފެންވަރުގެ ލަގްޒަރީ ލޯންޗެއް އަލް ޝާލި މެރިން އިން ފަރާތުން ރާއްޖޭގެ މާކެޓަށް ތައާރަފްކޮށްފިއެވެ.

"މެގްލާން 45" ނަމުން ނަން ދީފައިވާ ލޯންޗަކީ ޒަމާނީ ވަސީލަތްތައް ބޭނުންކޮށްގެން ފަރުމާކޮށްފައިވާ ލޯންޗެކެވެ. 12 ޝީޓުގެ މި ލޯންޗަކީ ރާއްޖޭގެ ކަނޑުތަކަށް ހާއްސަ ލޯންޗެކެވެ. މި ލޯންޗް ބަދެފައި ވަނީ އަލް ޝާލީ މެރިން ދުބާއިންނެވެ.

އަލް ޝާލް މެރިން މޯލްޑިވްސްގެ އޮޕަރޭޝަން މެނޭޖަރ ޝަރީފް ވިދާޅުވީ، މި ލޯންޗަކީ ރިޒޯޓްތަކުގެ ހައި އެންޑް ކާލްސްގެ ޓްރާންސްފާތައް ކުރުމަށްޓަކައި ތައްޔާރުކުރި ލޯންޗެއް ކަަމަށެވެ. ޝަރީފް ވިދާޅުވި ގޮތުގައި، މި ލޯންޗް ޑިޒައިންކޮށްފައި ވަނީ މަދު ގެސްޓުންނަށް ބޭނުން ކުރެވޭ ކަހަލަ ގޮތަކަށެެވެ.

"މީގެ ޕެސެންޖާ ބޯޓެއް އަޅުގަނޑުމެން މިހާރު މި ދަނީ ޑިޒައިންކޮށް ބޭލުމުގެ މަސައްކަތް ކުރަމުން މިދަނީ. އިރާދަކުރެއްވިއްޔާ ވަރަށް އަވަހަށް މީގެ ގިނަ މޮޑެލްތަކެއް ރާއްޖޭގެ މާކެޓަށް ނެރެ ބަންނަމުން ދާނަން". ޝަރީފް ވިދާޅުވިއެވެ.

ޝަރީފް ވިދާޅުވިގޮތުގައި، އެ ކުންފުނީގެ ފަރާތުން އަބަދުވެސް އާ ވައްތަރުގެ ތަކުގެ ލޯންޗްތަކާއި ބޯޓުތައް ނެރެމުން އަންނައިރު، މިފަަހަރު ތައާރަފްކުރި މި ލޯންޗަކީ ވަަރަށް ސްޓޭބަލްކޮށް ރާއްޖޭގެ ކަނޑަށް ހާއްސަކޮށް ފަރުމާކޮށްފައިވާ ލޯންޗެެކެވެ. މިއީ އިޓަލީ ޑިޒައިންގެ ލޯންޗެކެވެ. އަދި މިއީ ވަރަށް ބޮޑަށް ސްޓެބިލިޓީއަށް ބަލައިގެން ފަރުމާކޮށްފައިވާ ބޯޓެއްކަމަށް ވެސް ޝަރީފް ވިދާޅުވިއެވެ.

މި ލޯންޗްގައި ތިބޭއިރު، އެއްވެސް ވަރަކަށް ކަނޑަށް ބަލިވިމުގެ މައްސަލައެއް ދިމައެއް ނުވާނެއެވެ. އޭސީކޮށްފައިވާ މި ލޯންޗްގައި ދަތުރުކުރާއިރު، މީހާއަށް ވަރަށް އަރާމުކޮށް އިށީންދެލައިގެން އިނދެވޭނެއެވެ.

މި މޮޑެލްގެ ފުރަތަމަ ލޯންްޗް ގެނެސްފައި ވަނީ ހުވަފެން ފުށި ރިސޯޓަށެވެ. އަދި އަމިއްލަ ފުއްޓަށްވެސް ތަފާތު ވައްތަރެއްގެ ލޯންޗެއް ގެނައުމުގެ މަސައްކަތްތައް ކުރަމުން އަންނަ ކަމަށް ޝަރީފް ވިދާޅުވިއެވެ.

މި ލޯންޗް ހެދުމަށް ގާތްގަނޑަކަށް ހަތަރު މަސް ވަރު ޙޭދަވިކަމަށް އަލްޝާލް މެރިންއިން ބުންޏެވެ. އަދި ކުރިއަށް އޮތްތަނުގައި ޕްރޮޑަކްޝަން މިއަށްވުރެ އަވަސްވާނެ ކަމަށްވެސް އެ ކުންފުނިން ބުނެއެވެ.

"އިރާދަކުރެއްވިއްޔާ އަޅުގަނޑުމެންގެ މައިގަނޑު ޓާގެޓަކީ އަބަދުވެސް ބޭނުންވާ ފަރާތްތަކަށް ވީއެންމެ އަވަަހަަކަށް ޑެލިވަރީކޮށްދިނުން. އެގޮތުން މަދުވެގެން ތިން މަހާއި ހަަތަރު މަސް ތެރޭގައި ޑެލިވަރީކޮށްދެވޭތޯ މި ބަލަނީ". ޝަރީފް ވިދާޅުވިއެވެ.

އަލް ޝާލީ މެރިން އިން މައުލޫމާތު ދިންގޮތުގައި، ރާއްޖޭގައި ވަަރަށް އަވަހަށް ޔޮޓް ފަަހަރުތައް ބަނުމުގެ މަސައްކަތް ދަނީ ކުރަމުންނެވެ.

އަލް ޝާލީ މެރިންއަކީ ރާއްޖޭގައި އެންމެ ކުރިއަރަމުން އަންނަ ދޯނިފަހަރު ބަންނަ އެއް ކުންފުންޏެކެވެ. އެ ކުންފުނިން އެކި ރޭންޖްތަކުގެ ލޯންޗާއި، ދޯނި ބަނުމުގެ އިތުރުން އެ ދާއިރާގެ ހުރިހާ ހިދުމަތްތަކެއް ދެމުން ގެންދެއެވެ. އަދި މިދިޔަ އަހަރަކީ އެ ކުންފުނިން ހުރިހާ ކެޓަގަރީތަކަކުން އެވޯޑް ލިބިގެންދިޔަ އަހަރެކެެވެ. އަދި މި އަހަރު ވެގެން ދާނީ އެ ކުންފުނިން ގިނަ ޑިޒައިންތަކެއްގެ ލޯންޗްތަކެއް ތައާރަފްކުރެވިގެންދާނެ އަހަރެއްކަމަށް އަލް ޝާލީ މެރިން އިން މައުލޫމާތު ދެއެވެ.