ހުޅުމާލެ ސަހަރާގައި ޣައިރު މުސްލިމުން ވަޅުލަން ވަކި ސަރަހައްދެއް ކަނޑައެޅުމުގެ މަސައްކަތް ހުޅުމާލު ކައުންސިލުން ފަށައިިފިއެވެ.

ކޮވިޑް-19 ބަލީގައި މަރުވާ މީހުންވެސް މި ވަގުތު ވަޅުލަމުން ދަނީ ހުޅުމާލެ ސަހަރާގައެވެ.

މާލެ ސިޓީގެ ހުޅުމާލެ ދާއިރާގެ ކައުންސިލަރު އިބްރާހިމް ޝުޖާއު "ވަގުތު" އަށް ވިދާޅުވީ ކައުންސިލާ ހަވާލުވެވަޑައިގަތް ފަހުން މިސްކިތްތަކުގައި މަސައްކަތްކުރާ ޖަމާއަތް ތެރިންނާއެކު ބޭއްވި ބައްދަލުވުމުގެ ތެރެއިން އެ ފަރާތްތަކުން އެންމެ ބޮޑު އެއް ކަންބޮޑުވުމުގެ ގޮތުގައި ފާހަގަކޮށްފައިވަނީ މުސްލިމުންގެ ތެރޭގައި ޣައިރު މުސްލިމުން ވަޅުލާ މައްސަލަ ކަމަށެވެ.

ހުޅުމާލެ ސަހަރާގައި ޣައިރު މުސްލިމުން ވަޅުލާ ސަރަހައްދު ވަކި ކުރާ ފާރުގެ ސަރވޭ ކުރިއަށް ދަނީ.ވަރަށް އަވަހަށް މިމަސައްކަތް ފެށިގެން ދާނެ.މިހާރު މުސްލިމުންނާއި ޣައިރު މުސްލިމުން ވަޅުލަމުން ގެންދަނީ އެއްވެސް އިމެއް،ހުރަހެއް ނެތި.#TeamMCC@MMuizzu @MaleCitymv pic.twitter.com/gjhfO3Pbj1

— Ibrahim Shujau (@IbrahimShujaau) June 9, 2021

ނިމިގެން ދިޔަ ކައުންސިލްގެ ދައުރުގައިވެސް ޖަމާއަތްތެރިން އެ ވާހަކަތައް ކައުންސިލްގެ ސަމާލުކަމަށް ގެންދިޔަ ނަމަވެސް އެއްވެސް ހައްލެއް ލިބިފައިނުވާ ކަމަށް ޝުޖާއު ވިދާޅުވިއެވެ.

"މިދިޔަ ކައުންސިލް ގައިވެސް އެދުނު، އެކަމަކު އެކަން ނުވެފައި އޮތީ" ޝުޖާއު ވިދާޅުވިއެވެ.

މުސްލިމުން ފިޔަވާ އެހެން ދީންތަކުގެ މީހުން ވަޅުލާތަން އިން ވަކި ކުރަނީ ފާރެއް ރާނާ ގެންނެވެ. އެތަނުގެ ޑިޒައިން ތައްޔާރުކޮށް އެކަން ކޮށްދޭނެ ބަޔަކު ހޯދުމަށް މި ހަފްތާ ތެރޭގައި އިއުލާނު ކުރާނެ ކަމަށް އޭނާ ވިދާޅުވިއެވެ.

ހުޅުމާލެ ސަހަރާގައި ހިނަވާގެ އާއި އިންވެގެން ހަތަރު ފާހާނަ އެޅުމަށް ނިންމައި އެ މަސައްކަތް ކުރިޔަށް އެބަދެއެވެ. އަދި ވިއްސާރަ ދުވަސްތަކުގައި ހުޅުމާލެ ސަހަރާ މިސްކިތް ގޯތިތެރޭގައި ފެންބޮޑުވާ މައްސަލަ ހައްލުކުރުމަށް ކާނު ސިސްޓަމްތަކެއް ހަރުކުރުމުގެ މަސައްކަތްވެސް ކުރަމުންދާ ކަމަށް ހުޅުމާލެ ކައުންސިލަރު ވަނީ މީގެ ކުރިން ވިދާޅުވެފައެވެ.