ރައްޔިތުންގެ މަޖިލީހުގެ ފޭދޫ ދާއިރާގެ ކުރީގެ މެމްބަރު އަލްހާން ފަހުމީގެ މައްޗަށް މަނީ ލޯންޑަރިންގެ ތުހުމަތުކޮށް ފުލުހަށް ހާޒިރުވުމަށް އަންގައިފިއެވެ.
އަންގާރަ ދުވަހުގެ ރޭގަނޑު 20:00 އަށް ފުލުހަށް ހާޒިރުވުމަށް އަންގައި ހަވާލުކުރި ޗިޓުގައި ބުނެފައިވަނީ އޭނާ ހާޒިރުކުރަނީ ކިންގްސް ކެޕިޓަލް ހޯލްޑިންގްސް ޕްރައިވެޓް ލިމިޓެޑުން އާންމުކޮށް ހުޅުވާލައިގެން ރާއްޖޭގެ މާލީ ސެކިއުރިޓީޒްގެ ގާނޫނާއި ގަވާއިދާ އުސޫލުތަކާ ހިލާފަށް އިންވެސްޓްމެންޓް ސްކީމެއް ތައާރަފްކޮށް އިންވެސްޓަރުންނަށް މަންފާ ލިބޭނެ ކަމަށް ދައްކައި މަކަރާ ހީލަތުން ގިނަ އަދަދެއްގެ ފައިސާ ހޯދައި އެ ފައިސާ ލޯންޑަރކޮށްފައިވާ ކަމަށް ތުހުމަތު ކުރެވޭ މައްސަލައިގެ ތަހުގީގަށް ސުވާލުކޮށް ބަޔާން ނެގުމަށް ކަމަށެވެ.
އަލްހާން ފަހުމީ އިސްވެ ހުންނަވައިގެން އާންމުންނަށް ފަސޭހައިން ފައިސާ ލިބޭނެ ގޮތަށް ކުރިއަށް ގެންދާ "ކިންގް ފޮރެކްސް އިންވެސްޓްމެންޓް" އަށް ގިނަ ބަޔަކު އިންވެސްޓް ކޮށްފައިވާއިރު، ބީއެމްއެލް އާއި މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފައި ވަނީ އެއީ ޕޮންޒީ ސްކީމެއް ކަމަށެވެ.
އެހެން ނަމަވެސް އަލްހާން ވިދާޅުވީ، ކިންގްސް ކެޕިޓަލް ހޯލްޑިންގްސް ޕްރައިވެޓް ލިމިޓެޑުން އާންމު ފަރާތްތައް ބައިވެރިކޮށްގެން ކުރިއަށް ގެންދާ އޮންލައިން ފޮރެކްސް ޓްރޭޑިންގގެ މަދަނީ މުއާމަލާތާއި ގުޅިގެން އެމްއެމްއޭއިން އެކުންފުނިން މަނީ ލޯންޑަރ ކުރާ ކަމަށް ތުހުމަތުކޮށް ނުސީދާ ބަޔާން ނެރެ އަޅުވަމުން ދަނީ ދޮގު އިލްޒާމުތައް ކަމަށާއި މަކަރާއި ހީލަތުން މީހެއްގެ އަތުން ފައިސާ ނަގާފައި ނުވާނެ ކަމަށެވެ.
