އިނގިރޭސި ޕްރިމިއާ ލީގުގައި ރޭ ކުޅުނު މެޗުން އެވަޓަން ބަލިކޮށް، ޓޮޓެންހަމް ހޮޓްސްޕާސް އިން ލީގުގެ އެއް ވަނައިގައި އޮތް އާސެނަލާ އެއް ޕޮއިންޓް ގާތަށް ޖެހިލައިފި އެވެ.
ޓޮޓެންހަމްގެ އަމިއްލަ ދަނޑުގައި ރޭ ކުޅުނު މެޗު އެޓީމުން ކާމިޔާބު ކުރީ 2-0 ގެ ނަތީޖާއިންނެވެ. މި މޮޅާއެކު ޓޮޓެންހަމް އޮތީ ޖުމުލަ 23 ޕޮއިންޓާއެކު ތާވަލުގެ ތިން ވަނައިގައެވެ. ދެވަނައިގައި ސިޓީ އޮތީ 23 ޕޮއިންޓާއެކު ގޯލުގެ ތަފާތުންނެވެ. ލީގުގެ އެއްވަނައިގައި އެއް ޕޮއިންޓެއްގެ ފަރަގެއްގައި އޮތީ އާސެނަލެވެ.
ރޭ މެޗުގެ ފުރަތަމަ ހާފުގައި ދެ ޓީމުން ވެސް އައީ ބޯޅަ ހިފެހެއްޓުމުގެ ބަދަލުގައި އެޓޭކްކުރެވޭތޯ މަސައްކަތް ކޮށްގެންނެވެ. މި މެޗުގެ ފަސްވަނަ މިނެޓުގައި ޓޮޓެންހަމްގެ ހިއު މިން ސަން ހެރީ ކޭންގެ ބޮލަށް އާމާޒުކޮށް އޭރިއާ ތެރެއަށް ރީތި ބޯޅައެއް ނަގައިދިނެވެ. އިންގްލެންޑްގެ ތަރި ކޭން އެ ބޯޅަ ބޮލުން ފޮނުވާލި ނަމަވެސް އެވަޓަންގެ ޖޭމްސް ޓާކޯސްކީ ވަނީ އެބޯޅަ މަތަކޮށްފައެވެ. އޭގެ ފަހުން ވެސް ފުރަތަމަ ހާފުގައި ކޭން އުފެއްދި ގިނަ ހަމަލާތަކަކަށް ޓާކޯސްކީ ވަނީ ހުރަސް އުޅާފައެވެ. އެ ހާފުގައި އެވަޓަން އަށް ވެސް ގޯލު ޖެހުމަށް ރަނުގެ ފުރުސަތުތަކެއް ލިބިގެންދިޔައެވެ.
މި މެޗުގެ ދެވަނަ ހާފު ފަށައިގެން ޓޮޓެންހަމްގެ ކުޅުން އިތުރަށް ވަރުގަދަ ކުރިއެވެ. މި މެޗުގެ 57 ވަނަ މިނެޓުގައި ކޭން އަށް ގޯލު ޖަހަން ހުސް ފުރުސަތެއް ލިބުމާއެކު އެވަޓަންގެ ކީޕަރު ޖޯޑަން ޕިކްފޯޑަށް ކޭން ހިފަހައްޓަން މަޖުބޫރުވިއެވެ. ޕިކްފޯޑް ކުރި ފައުލާ ގުޅިގެން ޓޮޓެންހަމަށް ޕެނަލްޓީއެއް ލިބުނެވެ.
ކޭން ފޮނުވާލި ޕެނަލްޓީއާއެކު ޓޮޓެންހަމް އިން އެޓީމުގެ ފުރަތަމަ ގޯލު ޖެހިއެވެ. މިއީ ޓޮޓެންހަމް ޖޯޒީގައި ކޭން ކުޅުނު 400 ވަނަ މެޗަށް ވާއިރު މިއީ ހަމަގައިމުވެސް އޭނާއަށް ހާއްްސަ މެޗެކެވެ. ލީގުގައި އެންމެ ފަހުން ޓޮޓެންހަމް ކުޅުނު ފަސް މެޗުގައި ވެސް ކޭން ވަނީ ގޯލު ޖަހައިފަ އެވެ. މިއީ ލީގު ކެރިއަރުގައި ޖެހިޖެހިގެން ފަސް މެޗުގައި ކޭން ގޯލު ޖެހި ފުރަތަމަ ފަހަރެވެ.
ޓޮޓެންހަމަށް ލީޑު ފުޅާކޮށްދިނީ މެޗު ނިމެން ހަތަރު މިނެޓަށް ވެފައި ވަނިކޮށް ޕިއާ އެމިލް ހޮއެބާގްއެވެ. މިއީ ޓޮޓެންހަމުން ހެދި ކައުންޓާ އެޓޭކެއްގައި ޓޮޓެންހަމްގެ ރޮޑްރިގޯ ބެންޓެންކޯގެ އެހީތެރިކާއެކު ހޮއެބާގް ޖެހި އަދި މި މެޗުގައި ތަފާތު ކުޅުމެއް ދެއްކި ކޭންގެ އެހީތެރިކަމާއެކު ޖެހި ގޯލެކެވެ. މި މެޗުން ލިބުނު މޮޅާ އެކު ޓޮޓެންހަމުން މި ވަނީ ކޯޗު އެންޓޯނިއޯ ކޮންޓޭގެ އިރުޝާދުގެ ދަށުން ބޮޑު ކުރިއެރުމެއް ހާސިލްކޮށްފަ އެވެ.
ލީގުގެ ދެން ކުޅުނު މެޗުތަކުން މޮޅުވީ ވުލްވްސް އާއި ބްރެންޓްފޯޑެވެ. ލެސްޓާސިޓީއާއި ކްރީސްޓަލް ޕެލެސް ކުޅުނު މެޗު ނިމުނީ އެއްވެސް ޓީމަކަށް ގޯލެއް ނުޖެހިއެވެ. ފުލްހަމް އާއި ބޯންމައުތު ކުޅުނު މެޗު ނިމުނީ 2-2 ގެ ނަތީޖާއިން އެއްވަރު ވެގެންނެވެ.
