މިއަދަކީ ދައުލަތުގެ މީޑިއާ ޕީއެސްއެމްގެ ދަށުން ހިންގަމުން އަންނަ ނިއުސް ޗެނަލް ޕީއެސްއެމް ނިއުސްއަށް ހަތް އަހަރު ފުރުނު ދުވަހެވެ. ދުނިޔޭގެ ނޫސްވެރިކަމުގެ މިނިވަންކަމުގެ ދުވަހުގެ ގޮތުގައިވެސް ފާހަގަކޮށްލެވޭ މި ދުވަސް ޕީއެސްއެމް ނިއުސް އިތުރަށް ހާއްސަ ވެެގެން ދިޔަ ކަމަކީ ޓީވީއެމްގައި އަހަރުތަކެއް ކުރިން މަސައްކަތް ކުރަމުން ދިޔަ މަޝްހޫރު މޫނުތައް މިއަދު ހަބަރުތަކުން ފެނިގެން ދިއުމެވެ.
އެގޮތުން މިއަދު ހެނދުނު 10:00ގެ ހަބަރުން ފެނިގެން ދިޔައީ ތަޖުރިބާކާރު ނޫސްވެރިޔާ އަލީ ސުލައިމާނެވެ. މިހާރު އަމިއްލަ ސްޓޫޑިއޯއެއް ހިންގަމުންދާ ސުލައިމާނަކީ މީގެ 16 އަހަރު ކުރިން ޓީވީއެމްގައި މަސަައްކަތް ކުރަމުންދިޔަ މަޝްހޫރު އެއް ނޫސްވެރިޔާއެވެ. ގިނަ އަހަރުތަކެއް ވަންދެން ވީޓީވީގައިވެސް މަސައްކަތް ކޮށްފައިވާ ސުލައިމާން 16 އަހަރު ފަހުން ޓީވީއެމްގެ ސްކްރީނަށް އައިސްފައި ވަނީ ޕީއެސްއެމް ނިއުސްގެ މި ހާއްސަ ދުވަހާއި ގުޅުވައިގެންނެވެ.
މިއަދު މެންދުރު ޕީއެސްއެމްގެ އިނގިރޭސި ހަބަރު ކިޔާފައި ވަނީ ޑރ.އައިޝަތު ސިޔާދާ ސައީދެވެ. މިހާރު ޓްރީޓޮޕް ހޮސްޕިޓަލްގައި ޑޮކްޓަރެއްގެ ގޮތުގައި މަސައްކަތް ކުރައްވަމުން ގެންދެވާ ޑރ. ސިޔާދާ މީގެ ކުރިން ވަނީ ޓީވީއެމްގެ ހަބަރު ގަޑިތަކާއި ޝޯވތަކުން ފެނިގެން ގޮސްފައެވެ.
މިއަދު 13:30 ގައި ގެނެެސްދިން ޕީއެސްއެމް ނިއުސްގެ ކުޅިވަރު ހަބަރުތަކާއެކު ބައްދަލު ކުރީ ކުރީގެ ކުޅިވަރު ނޫސްވެރިޔާ އަބްދުﷲ އަަޒްމީންއެވެ. 2005 ވަނަ އަހަރު އަދި 2006 ވަނަ އަހަރު ރާއްޖޭގެ އެންމެ މޮޅު ކުޅިވަރު ނޫސްވެރިޔާގެ އެވޯޑް ހާސިލްކޮށްފައިވާ މި ނޫސްވެރިޔާ މިއަދު ޕީއެސްއެމްގެ ނިއުސްގެ ހަބަރުތަކުން ފެނިގެން ދިއުން ވާނީ ގިނަބަޔަކު ޝައުގުވެރިވާނެ ކަމަކަށެވެ.
މިއަދު ޕީއެސްއެމްގެ 2:00ގެ ހަބަރުން ފެނިގެން ދިޔައީ މަރިޔަމް ވަހީދާއެވެ. މޯލްޑިވްސް ބްރޯޑްކާސްޓިންގް ކޮމިޝަންގެ ރައީސް މަރިޔަމް ވަހީދާ ޓީވީއެމްގެ ހަބަރުން ފެނިގެން ދިއުމަކީ އެތައް ބަޔަކަށް އުފާވެރިކަން ގެނެސްދޭނެ ކަމެކެވެ. 13 އަހަރު ފަހުން އޭނާ ޕީއެސްއެމްގެ ނިއުސްގެ 2:00ގެ ހަބަރުގެ އިތުރުން، 7:00 ޖަހާއިރު ގެނެސްދިން އިނގިރޭސި ހަބަރު ހުށަހަޅައިދިން އެންކަރަކީވެސް މަރިޔަމް ވަހީދާއެވެ. އޭނާގެ އަޑަކީ މިހާރުވެސް އެތަައް ދިވެހިން ބަލައިގަނެފައިވާ އަޑެކެވެ.
ޕީއެސްއެމް ނިއުސްގެ ހަވީރު 16:00ގައި ހަބަރުން ފެނިގެން ދިޔައީ ހަސަން ޒިޔާއުއެވެ. ރައްޔިތުންގެ މަޖިލީހުގެ ކޮމިއުނިކޭޝަން ޑިރެކްޓަރު މަގާމުވެސް ފުރުއްވަމުން ގެންދަވާ ހަސަން ޒިޔާއު މިއަދު ހަބަރުން ފެށިގެން ދިޔައީ ހަތް އަހަރު ފަހުންނެވެ. އޭނާއަކީ ކުރިން ޓީވީއެމްގެ އިސް މަގާމުތަކެއް ފުރުއްވާފައިވާ ބޭފުޅެކެވެ.
ޕީއެސްއެމް ނިއުސްގެ މިރޭގެ 8:00ގެ ހަބަރުން ފެނިގެން ދިޔައީ އަހްމަދު ޝަކީބް (ޝަކީބެ)އެވެ. މީގެ 15 އަހަރު ކުރިން ޓީވީއެމްގެ ހަބަރުތަކުންނާއި ޝޯވތަކުން ފެނިގެން ދިޔަ ޝަކީބެގެ އަޑަކީ ގިނަބަޔަކަށް ކަމުދާ އަޑެކެވެ.
މިއަދު ޕީއެސްއެމްގެ ހަބަރުތަކުން ކުރީގެ މޫނުތައް ފެނިގެން ދިޔައިރު، ޕީއެސްއެމްގެ ނިއުސް ހެޑް އަމީން ވިދާޅުވީ، ބޭނުމަކީ މީގެ އެތައް އަހަރެއް ކުރިން ޓީވީއެމްއަށް ހިިދުމަތް ކުރި މި ޕްރެޒެންޓަރުންނަކީ އަދިވެސް ދިވެހިން ބަލައިގަންނަ ބައެއްކަން ސާބިތުކޮށްދިނުން ކަމަށެވެ. އެގޮތުން މިކަން ކާމިޔާބުވިކަން އޭނާ ފާހަގަކުރެއްވިއެވެ.
"ވަރަށް ޕޮޓިވްކޮށް މިކަން ވެގެން ދިޔައީ، ގިނަބަޔަކު އަޅުގަނޑުމެންނަށް ގުޅާފައި ބުނެފައިވެސް އެބަހުރި އެ މީހުން އަދިވެސް ހަބަރުތަކަށް އަރުވަން ބޭނުންވާ ވާހަކަ،".
އޭނާ ވިދާޅުވީ، މި ކުރެވެނީ ވަަރަށް ރަނގަޅު ކަމެއް ކަމަށް ގަބޫލު ކުރެވޭ ކަމަށެވެ. އަދި މިއީ ކުރަން ޖެހޭ ކަމެއް ކަމަށްވެސް އޭނާ ވިދާޅުވިއެވެ.
"އެ ބޭފުޅުންގެ ހިދުމަތަކީ ބަލައިގަންނަން ޖެހޭ ކަމެއް، ރައްޔިތުންނަށްވެސް މިކަން މިވީ ބަލައިގަންނަ ކަމަކަށް،".
އޯކޭ މާޒިވެ ނިމިފަ ހުރި ސައްފާތައް އަލުން އަނބުރާ ނުގެނެވޭނެ
މުސްލިމު ގައުމެއްގަ އަންހެނުން ހަބަރު ކިޔުމަކީ ކޮން ކަހަލަ ކަމެއް
މާމޮޅުކަމެއްތަ ތިކުރެވުނީ. 1 އަހަރުވާން ކައިރިވެފައިހުރި ބިލްތަކަށް ފައިސާ ދީބަލަ.
ޝަކީބު އަދި މަރިޔަމް ވަހީދާ ފެނުނީމާ ވަރަށް އުފާވި !
ޝަކީއްބެ! ހަބޭސް އެވަރެއްނެތް
އަސްލު ކުރީގެ އެންމެ މަޝްހޫރު އަދި ޚިދުމަތްތެރި މޫނު ތަކެއް ނުފެނޭ! ތިކަންވެސް ސްޓަންޓަކަށް ވެގެން ތި ދިޔައީ!!!!!!
ބަދިގޭގައި ހުއްޓާ ޝަކީއްބެ ޚަބަރު ކިޔާ އަޑު އިވިގެން އައިސް ބަލާލީ، ހިތަށް އެރި ޝަކީއްބެ ދެން މިހާރު ޚަބަރެއް ނުކިޔާނޭ. އެކަމަކު ޝަކީއްބެ ޚަބަރު ކިޔަން އިންދާ ފެނުނީމަ ވަރަށް އުފާވި. ޙަމަ ޅަދުވަސް ހަނދާންވީ.
ވަރަށް ފައްކާ ކަމެއް މީ. ޝުކުރިއްޔާ ޕީއެސްއެމް.
ތަފާތު ވަރަށްވެސް ބޮޑު. އަޑު އަހާލަން ފަސޭހަ ބަސްތައްރީތި ކޮލިޓީ. މިހާރުގެ ކުދިންނަށް ގިނަ ޓްރެއިނިންގ ބޭނުންވާ ކަމަށް އިހްސާސްވޭ