އަންނަ އަހަރަށް ލަފާކޮށް ރައްޔިތުންގެ މަޖިލިހަށް ހުށަހެޅި 42.6 ބިލިއަން ރުފިޔާގެ ބަޖެޓަކީ އުންމީދެއް ނެތް "ފޮޅި ބަޖެޓެއް" ކަމަށް މާލެ ސިޓީގެ ހުޅުމާލެ ދާއިރާގެ ކައުންސިލަރު އިބްރާހިމް ޝުޖާއު ވިދާޅުވެއްޖެއެވެ.

ފިނޭންސް މިނިސްޓްރީން ރައްޔިތުންގެ މަޖިލިހަށް މިފަހަރު ހުށަހެޅި ބަޖެޓަށް އިދިކޮޅު މެމްބަރުންނާއި ރައްޔިތުންގެ މަޖިލިހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދަށް ތާއީދު ކުރައްވާ މެމްބަރުން ވަނީ ވަރަށް ބޮޑަށް ފާޑު ވިދާޅުވެފައެވެ. އެ މެމްބަރުން ވެސް ފާހަގަ ކުރެއްވި ގޮތުގައި ބަޖެޓުގައި ޖަހާފައި ހުރީ އަދަދުތަކެކެވެ. އަދި މިއީ ފޭކް ބަޖެޓެއްގެ ގޮތުގައި އެ މެމްބަރުން ސިފަ ކުރައްވާފައިވެއެވެ.

ޝުޖާއު ކުރެއްވި ޓުވީޓެއްގައި ވިދާޅުވީ ބަޖެޓު ބަހުސްގައި ދެ ފެކްޝަންގެ މެމްބަރުން ދައްކަވާ ވާހަކަ ރައްޔިތުން އަޑު ނޭހުމަށް އެދިވަޑައިގަންނަވާ ކަމަށެވެ. ދެބައި މީހުން، އެއް ބަޔަކު އަނެއް ބަޔަކަށް ވަގަށް ގޮވާފައި ވޯޓު ދޭނީ ފޮޅި ބަޖެޓު ފާސް ކުރަން ކަމަށް ވެސް ޝުޖާއު ވިދާޅުވިއެވެ.

ބަޖެޓް ބަހުސްގައި @MDPSecretariat ދެ ފެކްޝަނުން ދައްކާވާހަކަ ނާހާތި.ދެބައި މީހުން އެއްބަޔަކު އަނެއް ބަޔަކަށް ވަގަށް ގޮވާފަ ވޯޓް ދޭނީ ތިޔަ #ފޮޅިބަޖެޓް ފާސް ކުރަން.މާޒީގައި ކަންކަން ހިނގާފައިވާނީ މިހެން.ފައިސާ ޗާޕް ކުރަން ރުހުންދިނީ ވެސް ހަޅޭ ލަވަލަވާފަ ގުޅިގެން.1/2

— Ibrahim Shujau (@IbrahimShujaau) November 12, 2022

"މާޒީގައި ކަންކަން ހިނގާފައި ވަނީ މިހެން. ފައިސާ ޗާޕް ކުރަން ރުހުން ދިނީ ވެސް ހަޅޭއްލަވަ ލަވާފައި ގުޅިގެން،" މަޖިލިހުގެ ބާރަށު ދާއިރާގެ މެމްބަރު ކަން ވެސް ކުރިން ކުރެއްވި ޝުޖާއު ވިދާޅުވިއެވެ.

އިންޑިޔާ ސިފައިން ރާއްޖޭގައި ޤާއިމްވެ ތިބެވޭގޮތް ހެއްދެވީވެސް ގުޅިގެން ”ނޭނގޭ ކަމަކަށް“ހަދައިގެން ތިބެ.ރައްޔިތުންގެ އަތުން ނަގާ ޓެކްސް ބޮޑުކުރަންވެސް އެއުޅެނީ ހަމަ ގުޅިގެން.ތިޔަ #ފޮޅިބަޖެޓް ބަހުސް ގައި ޕީ.ޕީ.އެމް/ޕީ.އެން.ސީގެ މެމްބަރުންގެ ވާހަކަފުޅު އަޑުަ އައްސަވާ!2/2

— Ibrahim Shujau (@IbrahimShujaau) November 12, 2022

ޝުޖާއު ވިދާޅުވި ގޮތުގައި އިންޑިއާ ސިފައިން ރާއްޖޭގައި ގާއިމުވެ ތިބެވޭ ގޮތް ހެދީ ވެސް ގުޅިގެން ނޭނގޭ ކަމަކަށް ހަދައިގެން ތިބެ ކަމަށެވެ. ރައްޔިތުންގެ އަތުން ނަގާ ޓެކްސް ބޮޑު ކުރަން ވެސް އެ އުޅެނީ ހަމަ ގުޅިގެން ކަމަށް ވިދާޅުވެ، ޝުޖާއު ވަނީ ބަޖެޓު ބަހުސްގައި ޕީޕީއެމް/ޕީއެންސީގެ މެމްބަރުންގެ ވާހަކަ އަޑު އެހުމަށް ރައްޔިތުންގެ ކިބައިން އެދިވަޑައިގެންފައެވެ.

އަންނަ އަހަރަށް ހުށަހެޅި ބަޖެޓަކީ މި އަހަރުގެ ބަޖެޓަށް ވުރެ ގާތްގަނޑަކަށް 170 މިލިއަން ރުފިިޔާ މަދު އަދަދެކެވެ. މި އަހަރު ހުށަހަޅަން ނިންމާފައިވާ ސަޕްލިމެންޓަރީ ބަޖެޓާ އެކު މި އަހަރުގެ ބަޖެޓް 42.8 ބިލިއަން ރުފިޔާ އަށް އަރާނެއެވެ.

އަންނަ އަހަރަށް ލަފާ ކުރާ ބަޖެޓުގައި 29 ބިލިއަން ރުފިޔާ ހޭދަ ކުރާނީ މުވައްޒަފުންނަށް މުސާރަ ދިނުމަށެވެ. އެއީ ބަޖެޓްގެ 70 އިންސައްތައެވެ. މީގެ އިތުރުން ޕީއެސްއައިޕީ އާއި ތަރައްގީގެ މަޝްރޫއުތައް ހިންގުމަށާއި އެހެން މަޝްރޫއުތަކަށް ބަޖެޓުން ވަނީ 14 ބިލިއަން ރުފިޔާ ކަނޑައަޅައިފައެވެ.

އަންނަ އަހަރަށް ލަފާކުރާ އާމްދަނީ ނުލިބި އަދި ހަރަދުތައް ކުޑަނުކޮށްފި ނަމަ އަންނަ އަހަރުގެ ބަޖެޓް ދަރަނި 14 ބިލިއަން ރުފިޔާއަށް އަރާފާނެކަމުގެ ބިރު އެބައޮތެވެ.

އަންނަ އަހަރަށް ލިބޭނެ ކަމަށް ލަފާކޮށްފައި ވަނީ 32.1 ބިލިއަން ރުފިޔާއެވެ. އަދި ހަރަދުގެ ގޮތުގައި ލަފާކޮށްފައި ވަނީ 32.1 ބިލިއަން ރުފިޔާ އެވެ. އަންނަ އަަހަރު ޓެކުހުގެ ގޮތުގައި ލިބޭނެކަމަށް ބަލާފައި ވަނީ 23.5 ބިލިއަން ރުފިޔާއެވެ. އަދި ޓެކްސް ނޫން ގޮތުގައި 6.5 ބިލިއަން ރުފިޔާއެވެ. އެއާއެކު ބަޖެޓުގެ ދަރަންޏަކީ އަށް ބިލިއަން ރުފިޔާއެވެ.