ސްކޫބާ ޑައިވްކުރުމަކީ އެކަމެއް ކުރަން ވަރަށް ގިނަ ބަޔަކު ބޭނުންވާ އަދި އެކަމަށް ވަރަށް ގިނަ ބަޔަކު ލޯބިކުރާ ކަމެކެވެ. ސްކޫބާ ޑައިވް ކުރުމަކީ އެހާމެ ހަށިގަނޑަށް ފައިދާވެސް ހުރި ކަމެކެވެ. އެގޮތުން ސްކޫބާ ޑައިވްކުރުމުން މީހާގެ ސްޓްރެސް ފިލުވައިދޭކަން ދަންނަންތޯ؟
ސްކޫބާ ޑައިވްކުރުމަކީ ވަކި ގޮތަކަށް ނޭވާލާން ޖެހޭ ކަމެކެވެ. އެގޮތުން މަޑު މަޑުން އަދި ފުންކޮށް ނޭވާލާން ސްކޫބާ ޑައިވް ކުރާ ވަގުތުގައި ޖެހޭއިރު އެއީ މީހާ މެޑިޓޭޓްކުރާ ވަގުތުތަކުގައިވެސް ނޭވާލާ ގޮތްކަން ފާހަގަކޮށްލެވެއެވެ. އެގޮތަށް ނޭވާލުމަކީ މީހާ ހިތްހަމަޖައްސައިދޭ ކަމެކެވެ. ސްކޫބާ ޑައިވް ކުރާ ވަގުތުގައި ވަށައިގެންވާ ކަނޑުއަޑީގެ ރީތި މަންޒަރުތަކުން މީހާ އަޖައިބުކޮށްދޭނޭއިރު އެމީހެއްގެ ހަޔާތުގައި ހުންނަ އެހެން ވިސްނުންތައް އެ ހިސާބުންނެއް ހަދާނެއް ނުހުންނާނެއެވެ.
މަސައްކަތް، އާއިލީ، ފައިސާ އަދި އެހެނިހެންވެސް ވިސްނުންތައް މުޅިން ނެތިގެންދާނޭއިރު މިއީ ހަށިގަނޑަށާއި ސިކުނޑިއަށް ލިބިގެންދާ 'ޓައިމް އައުޓް'އެކެވެ. އަދި ޑައިވްއަކަށްފަހު އެ މީހަކަށް ކުރިމަތިވެފައިވާ މައްސަލަތަކާއި ހަމަޖެހިގެން ވިސްނައިގެން ކުރިމަތިލުމުގެ ފުރުސަތުވެސް މީހާއަށް ލިބިގެންދާނެއެވެ.
އޭގެ އިތުރުންވެސް ސްކޫބާ ޑައިވް ކުރުމަކީ މީހާގެ ފިޓްނެސް މިންވަރު އިތުރުކޮށްދީ، ނޭވާ ދިގުކޮށްދީ، ލޭ މައްޗަށްދިޔުން ފަދަ މައްސަލަތަކުންވެސް މީހާ ރައްކާތެރިކޮށްދޭ ކަމެކެވެ. އަދި ސްކޫބާ ޑައިވްކުރުމަކީ މީހާގެ ގައިގައި ވަރުޖައްސައިދީ މީހާ އިތުރަށް ފްލެކްސިބަލްކުރުވާވެސް ކަމެކެވެ. މި ހުރިހާ ފައިދާތަކުގެ އިތުރުންވެސް ސްކޫބާ ޑައިވް ކުރުމަކީ ކަނޑު އަޑިން ފެންނަ ރީތި މަންޒަރުތަކުގެ ސަބަބުން މީހާއަށް އުފާވެރިކަންވެސް ގެނުވައިދޭ ކަމެކެވެ.
ކަލޭމެން ވަރަށް މޮޅު. ދެން ތިބި އެންމެން ތިބީ ގުނބޯހެދިފަ.