އަންނަ އަހަރު ރާއްޖެއަށް ދެ މިލިއަން ފަތުރުވެރިން ގެނައުމަށް އަމާޒު ހިފައިފިއެވެ.

ސަރުކާރުން މި އަހަރު އެންމެ ފުރަތަމަ އަމާޒަކަށް ހެދީ އެއް މިލިއަން ފަތުރުވެރިން ގެނައުމަށެވެ. އޭގެ ފަހުން 1.2 މިލިއަން ފަތުރުވެރިން ރާއްޖެ ގެނައުމަށް ވެސް އަމާޒު ހިފިއެވެ. އެންމެ ފަހުން އަމާޒު ހިފީ 1.3 މިލިއަން ފަތުރުވެރިން ގެނައުމަށެވެ.

މިއަދު ރާއްޖެ އައި މި އަހަރުގެ 1.3 މިލިއަން ވަނަ ފަތުރުވެރިޔާއަށް މަރުހަބާ ކިޔުމަށް ވެލާނާ އެއާޕޯޓްގައި ބޭއްވި ރަސްމިއްޔާތުގައި ޑރ. މައުސޫމް ވިދާޅުވި، ޓޫރިޒަމްގެ މި ކާމިޔާބު އޮތީ އެންމެން އެއްބައިވެގެން ކަމަށެވެ. އަދި ހުރިހާ ފަރާތްތަކުން އިންތަކާއި މިންތަކުގައި ހިފައްޓައިގެން ކުރިއަށް ގޮސްގެން ކާމިޔާބު ވާނެ ކަމަށް މިނިސްޓަރ ވިދާޅުވިއެވެ.

"ވަރަށް ޓަފް ކަމެއް، މިހާރު އަޅުގަނޑުމެން ހިންދަމާލައިގެން އުޅުނަސް ދޮޅު އަހަރު މިދިޔައީ އިންޑަސްޓްރީ ބަނޑުދަމާލައިގެން، ވަރަށް ބޮޑު ގެއްލުންތަކާއި އިންޑަސްޓްރީން ކުރިމަތިލި". ޑރ. މައުސޫމް ވިދާޅުވިއެވެ.

އޭނާ ވިދާޅުވީ އާ އަހަރަށް ކުރިމަތިލައިގެން އަންނައިރު ތަފާތު ކަންކަން އިންޑަސްޓްރީއަށް ކުރިމަތިވިއިރު އެ ހުރިހާ ކަމަކާއެކު ކުރިއަށް ދިއުމަށް މަސައްކަތް ކުރާނެ ކަމަށެވެ.

"ރާއްޖޭގެ ޓޫރިޒަމްގެ ކާމިޔާބަކީ ފަތުުރުވެރިކަމުގެ ދާއިރާގައި މަސައްކަތް ކުރާ މުވައްޒަފުންގެ ވަރަށް ބޮޑު މިންނެތް މަސައްކަތް، އަޅުގަނޑުމެންގެ އިންޑަސްޓްރީގެ ހުރިހާ ބޭފުޅުން އެކަތިގަނޑަކަށް ވެގެން ކުރާ މަސައްކަތް". އޭނާ ވިދާޅުވިއެވެ.

އެމްއެމްޕީއާރްސީގެ މެނޭޖިންގް ޑިރެކްޓަރ ތައްޔިބް މުހައްމަދު ވިދާޅުވީ، މި އަހަރުގެ 1.3 މިލިއަން ވަނަ ފަތުރުވެރިޔާ ރާއްޖެ އައިސްފައިވާއިރު، މިއީ ކާމިޔާބެެއްގެ ގޮތުގައި ސިފަ ކުރެވޭ ކަމަށެވެ.

"އަޅުގަނޑަށް ހީވަނީ މިކަމާއި ވިސްނަވާލަން ޖެހެނީ އެހެން ގައުމުތަކުގެ ނަޒަރަކުން، މިސާލަކަށް އަޅުގަނޑުމެން ބަލާއިރު ފަތުރުވެރިކަމުގެ ދާއިރާގެ ގައުމުތަކަށް ބަލާއިރު، ގިނަ ތަންތަން އަދިވެސް ފަތުރުވެރިކަމަށް ހުޅުވާ ނުލެވޭ، އެއީ ކާމިޔާބެއް ކަމުގައި އަޅުގަނޑު ހަމަގައިމުވެސް ދެކެން". ތައްޔިބް ވިދާޅުވިއެެވެ.

ތައްޔިބް ވިދާޅުވީ، އެ ފެންނަނީ ރާއްޖޭގެ އެންމެން އެއްބައި ވެގެން އިންޑަސްޓްރީ އާއި ސަރުކާރާއި، އަދި އެހެން މުވައްސަސާތައް ގުޅިގެން ކުރެވޭ މަސައްކަތް ކަމަށެވެ.

"މިއީ ވަރަށް ބޮޑު ކާމިޔާބެއް، އެކަމަކު މި ކަމިޔާބު ދެން ދެމެހެއްޓޭނީ އަނެއްކާވެސް މި އަޅަފައި ހުރި ފިޔަަވަޅުތަކަށް ވީހާވެސް ބޮޑަށް ބަލައިގެން،".ތައްޔިބް ވިދާޅުވިއެވެ.

"އެެހެންވީމަ އަޅުގަނޑަށް ހީވަނީ އެއީ ރަނގަޅު ޓާގެޓެއްހެން، ހޯޕް ދެޓް ވީ ވުޑް ގެޓް ދެއާ".

ނަޒީރް ވިދާޅުވީ، ދުނިޔޭގައި މިހާރު ކޮވިޑް-19ގެ ކަންތައް ދަނީ އަޕްއެންޑް ޑައުން ގޮތަކަށް ކަމަށާއި، އޭގެ އަސަރުތައް ކޮންމެވެސް ވަރަކަށް އަންނަ އަހަރު ތެރޭގައިވެސް އުޅޭނެ ކަމަށެވެ.

"މި އޮމިކްރޮން ކަންތައް މިހާ ބޮޑުވެެގެން އުޅޭއިރުވެސް މިހާރުވެސް ރާއްޖޭގެ އޮކިއުޕެންސީ 95% ނޫނީ 90%ގައި މި އުޅޭހެން އަޅުގަނޑަށް ހީވަނީ، އެހެންވީމަ އޭގެ މާނައަކީ ޑެސްޓިނޭޝަނެއްގެ ގޮތަށް ދަތުރު ކުރާ މީހުން އޮތީ ރާއްޖެ ބަލައިގެންފައޭ.ދެން އަޅުގަނޑުމެންގެ ހިތްވަރާއި އެކީގައި އެ މީހުންނަށް ރަނގަަޅަށް ޓްރީޓްކޮށްފައި ފޮނުވާލީމަ އަޅުގަނޑުމެންނަށް ހީވަނީ އެ މީހުން އަނބުރާ އަންނާނެ ހެން". ނަޒީރް ވިދާޅުވިއެވެ.