ކުނި ނައްތާލުމުގެ މަސައްކަތަށް ތިލަފުށި ފަޅުން 15 ހެކްޓަރުގެ ބިން އެމްޓީސީސީ އިން ހިއްކައިފިއެވެ.
އެކަމާ ގުޅޭގޮތުން އެންވަޔަރްމަންޓް މިނިސްޓަރު ތޯރިގު އިބްރާހިމް ކުރެއްވި ޓުވީޓެއްގައި ވިދާޅުވީ ތިލަފުއްޓަކީ ރައްކާތެރި، ސާފު، ދިރިއުޅެވޭނެ ފަދަ މާހައުލަކަށް ހެދުމަށްޓަކައި ކުރެވޭ މަސައްކަތުގެ ދަށުން ކުނި މެނޭޖްކުރުމުގެ 158 މިލިއަން ޑޮލަރުގެ ޕްރޮޖެކްޓެއް މިހާރު ފަށާފައިވާ ކަމަށެވެ. އަދި މި ޕްރޮޖެކްޓަށް ބޭނުންވާ 15 ހެކްޓަރުގެ ބިން ހިއްކައި ނިންމާފައިވާ ކަމަށްވެސް މިނިސްޓަރު ވިދާޅުވިއެވެ.
Thilafutakee rahkaathei, saafu, dhiri uleveyne fadha maahulakah hedumatakaa 158 million dollarge bodu, biya kuni manage kuraane project eh mihaaru vanee fashaafa. Mi project ah beynubaa 15 hectare ge bin hikaa nimijje. @sunbrk @Mihaarunews @PSMnewsmv @VaguthuOnline @avasmv pic.twitter.com/3WwoWlv3eo
— Thoriq Ibrahim (@Thoriqibrahim) July 25, 2018
އެންވަޔަރްމެންޓް މިނުސްޓުރީއިން ކުރިން ހާމަކުރި ގޮތުގައި ރައްކާތެރި ގޮތުގައި ކުނި ނައްތާލުމުގެ މި ބޮޑު މަޝްރޫއަށް ސަރުކާރުގެ ބަޖެޓުން 105 މިލިއަން ރުފިޔާ ހަރަދު ކުރުމަށް ވަނީ ހަމަޖެހިފައެވެ. އެ މަސައްކަތުގެ ދަށުން ކުނި ނައްތާލުމަށް ބޭނުންވާ ވަސީލަތްތައް ގާއިމުކުރުމަށް ބޭނުންވާ ބިން ހިއްކުމުގެ މަސައްކަތް ސަރުކާރުން ހަވާލުކުރީ 240 ދުވަހުގެ ތެރޭގައި ނިންމަން އެމްޓީސީސީއާއެވެ.
ތިލަފުށީގެ ބިން ފިޔަވަހިތަކަކަށް ބަހާލައިން ތަރައްގީ ކުރުމަށް ހަމަޖެހިފައިވާކަމަށް ސަރުކާރުން މީގެ ކުރިން ވަނީ ބުނެފައެވެ. އެގޮތުން ފިޔަވަހިތަކަކަށް ބަހާލައިގެން ކުރިއަށް ގެންދާ އެ މަސައްކަތް ނިމުމުން، ދުވާލަކު 500 ޓަނުގެ ކުނި ނައްތައިލެވޭނެއެވެ.
ތިލަފުށީގައި ކުނީގެ މައްސަލަ ހައްލުކުރަން އޭޝިއަން ޑިވެލޮޕްމަންޓް ބޭންކް (އޭޑީބީ) އެހީގައި 126 މިލިއަން ޑޮލަރުގެ މަޝްރޫއެއް ސަރުކާރުން ހިންގަމުން އަންނަކަން ފާހަގަކޮށްލެވެއެވެ.