އާއިލީ ގުޅުމަކީ ވަރަށް ވެސް ބާރުގަދަ ގުޅުމެކެވެ. އާއިލާގެ އެކަކަށް ދެރައެއް ލިބިއްޖެނަމަ، އެ ދެރަ މުޅި އާއިލާއިން އުފުލަން ޖެހޭނެއެވެ. އަދި އާއިލާގެ މީހަކަށް ބޮޑު އަނިޔާއެއް ނުވަތަ އުމުރު ދުވަހު ހިތާމަ ކުރަން ޖެހޭ ފަދަ ހާލަތެއް މެދުވެރިވެއްޖެނަމަ، އެކަން ހައްލުކޮށްދިނުމަށާއި އެކަމުގައި އެހީވުމަށް ތިބޭނީ އާއިލާ މީހުންނެވެ. މަދު އާއިލާއެއްގައި މިކަން މިގޮތަށް ނުހިނގި ނަމަވެސް ގިނަ އާއިލާތަކުގައި މިކަން ހިނގަނީ މިގޮތަށެވެ.
އެކަމުގެ ހެއްކެއްގެ ގޮތުގައި ފާހަގަ ކޮށްލެވެނީ މިހާރު މީސްމީޑިއާގައި ދައުރުވަމުން އަންނަ ވީޑިއޯއެކެވެ. އެއީ ކިޑްނީއަކަށް ބޭނުންވެފައިވާ ބައްޕައަކަށް ކިޑްނީ ލިބި ރަނގަޅުވަމުން އައި ވަގުތެއްގައި އެބައްޕައަށް ކިޑްނީ ހަދިޔާ ކުރީ އޭނާގެ އަންހެން ދަރިފުޅުކަން އެނގުނު މަންޒަރު ދައްކުވައިދޭ ވީޑިއޯއެކެވެ.
ޓުވިޓާގައި ފިގެން ނަމަކަށް ކިޔާ އެކައުންޓަކުން ހިއްސާ ކޮށްފައިވާ ވީޑިއޯއިން ފެނިގެން ދަނީ އެފިރިހެން މީހާ އެނދުމަތި ކޮށްފައިވާ ކޮޓަރި ތެރެއަށް އޭނާގެ ދަރިފުޅު ވަންނަ މަންޒަރެވެ. ދަރިފުޅު ކޮޓަރިއަށް ވަދެގެން އައިއިރު، އޭނާގެ ގަޔަށް އައިވީއާއި އެހެން ކެނިއުލާތައް ގުޅާފައި ހުރި މަންޒަރު ވެސް ފެނެއެވެ.
She is one of the most wonderful daughters in the world. ❤️
Dad finds out that the anonymous kidney donor was his own daughter...https://t.co/BNqQU4r5BZ— Figen (@TheFigen_) February 27, 2023
ފިރިހެން މީހާއަށް އޭނާގެ ދަރިފުޅު ފެނުމާއި އެކީ ވަނީ އޭނާއަށް ކިޑްނީ ހަދިޔާ ކުރި ދަރިފުޅުކަން އެނގިފައެވެ. އަދި އެހިސާބުން ކިޔާނެ އެއްޗެއް ނޭނގި ފިރިހެން މީހާގެ ލޮލުން ކަރުނަ ފައިބާ، ބާރަށް ރޯން ފަށައެވެ.
ފިރިހެން މީހާ ރޯން ފެށުމާއި އެކީ އޭނާގެ ދަރިފުޅު ވަނީ މިހާރު ހުރިހާ ކަމެއް ވެސް ރަނގަޅު ކަމަށް ބުނެ ފިރިހެން މީހާ ހުއްޓުވައި ހަމަޖައްސަން މަސައްކަތް ކޮށްފައެވެ.
ވީޑިއޯ ހިއްސާ ކުރި މީހާ ބުނެފައިވަނީ އެއަންހެން މީހާ އަކީ ބައްޕައަކަށް ދުނިޔެމަތިން ލިބޭނެ އެންމެ ރަނގަޅު އަންހެން ދަރިފުޅު ކަމަށެވެ.
މިވީޑިއޯ ޓުވިޓާގައި އާންމު ކުރިތާ ގިނަ އިރުތަކެއް ނުވެ، ހަތަރު ލައްކައަށްވުރެ ގިނަ މީހުންގެ ސަމާލުކަން ވީޑިއޯއަށް ވަނީ ލިބިފައެވެ. އަދި ވީޑިއޯ ބެލި ގިނަ ބަޔަކު ވަނީ ފެންކަޅި ވެސް ވެފައެވެ.
