ރާއްޖޭގެ އެކިކަންކޮޅުތަކުގައި ކަރަންޓުގެ ހިދުމަތް އެންމެ ނާޒުކު ހާލަތުގައި އޮތް ރަށްތައް ބަލައި ހަތް ރަށެއްގެ ކަރަންޓު ހިދުމަތުގެ ފެންވަރު ރަނގަޅު ކުރުމަށް ޖަނަރޭޓަރުތައް ފޮނުވުމުގެ މަސައްކަތް ފެނަކައިން ފަށައިފިއެވެ.

މި ޖަނަރޭޓަރުތައް ފޮނުވަން ނިންމާފައިވަނީ ށ، ނ، ރ، އަދި ބ.އަތޮޅުގެ ރަށްތަކަށެވެ. އެގޮތުން ބ.ކިހާދޫ، ށ.މަރޮށި، އަދި ނ.ހެނބަދޫއަށް ފޮނުވަން ނިންމަވާފައިވަނީ 250 ކިލޯވޮޓްގެ ޖަނަރޭޓަރެވެ. ނ. މާފަރު، ބ. މާޅޮސް، އަދި ރ. މާކުރަތަށް ފޮނުވަން ނިންމަވާފައިވަނީ 400 ކިލޯވޮޓްގެ ޖަނަރޭޓަރެވެ. އަދި ރ. އަލިފުއްޓަށް ފޮނުވަން ހަމަޖެހިފައިވަނީ 600 ކިލޯވޮޓްގެ ޖަނަރޭޓަރެކެވެ.

 

ފެނަކަ ކޯޕަރޭޝަނުން ބުނީ، މި ޖަނަރޭޓަރުތައް ފޮނުވުމުގައި، ފެނަކަ ކޯޕަރޭޝަނުން އިސްކަންދެނީ، ކަރަންޓު އެންމެ ނާޒުކު ހާލަތުގައި ހުރި ރަށްތަކަށް ކަމަށާއި މިއީ އަލަށް ގެނެވުނު ޖަނަރޭޓަރުތަކެއް ކަމަށެވެ.

މި ޖަނަރޭޓަރުތައް އިންސްޓޯލްކުރުމުން އެ ރަށްރަށުގައި ދިމާވާ ކަރަންޓުގެ މައްސަލައަށް ދާއިމީ ހައްލެއް ލިބޭނެ ކަމަށް ފެނަކަ އިން ބުނެއެވެ. އަދި މިފަހަކަށް އައިސް ބައެއް ރަށްރަށުގެ ކަރަންޓު ކެނޑޭ މައްސަލަ ބޮޑުވެފައިވަނީ އިންޖީނުތައް މަރާމާތުނުކޮށް ގިނަ ދުވަސްވެގެންކަމަށް އެ ކޯޕަރޭޝަނުން ބުނެއެވެ.

ރަށްރަށަށް ކަރަންޓުގެ ހިދުމަތް ދިނުމަށް ބޭނުންކުރާ ޖަނެރޭޓަރު ސެޓުތަކާއި ޖެނެރޭޓަރުތަކުގެ މެއިންޓެނަންސްގެ ކަންކަން ކުރީ ސަރުކާރުން އެންމެ އެދެވޭ ގޮތެއްގައި ބަލަހައްޓާފައި ނުވުމުން އޭގެ ސަބަބުން ޖަނަރޭޓަރު ސެޓުތައް މިހާރު ތިބީ ބަދަލު ކުރަން ޖެހޭ ހާލަތުގައި ފެނަކަ އިން ކުރިން ވަނީ ބުނެފައެވެ.

ގުޅުންހުރި

ކިޔުންތެރިންގެ ހިޔާލު

1 ކޮމެންޓް

  1. ތަރަފަނަ
    އޭޕްރިލް 18, 2024 15:55

    ތިޔަ ތަކެތިބެސް ދުވަސްކޮޅެއް ވާއިރު ހުންނާނީ ހަލާކު ކޮށްލާފަ.
    މިހެން މިބުނީ ފެނަކައަށް ވަޒީފާއަށް ލަނީ ނާގްބިލް މީހުން.

    1
    Reply