އިނގިރޭސި ޕްރިމިއާ ލީގުގައި ޓޮޓެންހަމް އާއި, ޗެލްސީ ވެސް މުހިއްމު މޮޅެއް ހޯދައިފިއެވެ.

ތާވަލްގެ ހަތަރު ވަނާގައި އޮތް ޓޮޓެންހަމް މޮޅުވީ ނޮޓިންގހަމް ފޮރެސްޓާ ވާދަކޮށް 3-1 އިނެވެ. މެޗުގައި ފުރަތަމަ ދެ ލަނޑު ޖަހާ ޓޮޓެންހަމްއަށް ކުރިހޯދައިދިނީ ހެރީ ކޭންއެވެ. އޭނާ ދެވަނަ ގޯލް ޖެހީ ޕެނަލްޓީއަކުންނެވެ. ދެވަނަ ހާފްގެ ކުރީކޮޅު ތިންވަނަ ގޯލް ޖެހީ ރިޗާލިސަން ތަނަވަސްކޮށްދިން ފުރުޞަތަކުން ސޮންއެވެ. ކޯޗު ކޮންޓޭއާއި ރިޗާލިސަންއާ ދެމެދު ޖެހުނު މައްސަލަތަކަށްފަހު މެޗު ފެށީ ރިޗާލިސަން ފުރަތަމަ އެގާރައިގަ ހިމަނައިގެންނެވެ. ދެވަނަ ގޯލް ކޭން ޖެހީވެސް ރިޗާލިސަންއަށް ކުރި ފައުލަކަށް ދިން ޕެނަލްޓީއަކުންނެވެ.

ނޮޓިންގހަމް ފޮރެސްޓުން ހަމައެކަނި ލަނޑު 81 ވަނަ މިނެޓުގައި ޖެހީ ވޯރަލްއެވެ. މެޗުން މޮޅުވެ ޓޮޓެންހަމް ވަނީ ގަދަ ހަތަރެއްގައި ހަ ޕޮއިންޓްގެ ލީޑެއް ހޯދާފައެވެ. އެއީ ފަސްވަނާގައި އޮތް ލިވަޕޫލް މިހަފްތާގައި ބޯންމައުތް އަތުން ބަލިވުމުންނެވެ. ޓޮޓެންހަމް ހަތަރު ވަނާގައި އޮތީ 27 މެޗުން 48 ޕޮއިންޓާއެކުއެވެ. ލިވަޕޫލް ފަސްވަނާގައި އޮތީ 26 މެޗުން 42 ޕޮއިންޓާއެކުއެވެ.