ގދ. ގައްދޫ ބަނދަރު ތަރައްޤީ ކުރުމުގެ މަޝްރޫޢުގެ މަސައްކަތުގެ 57 އިންސައްތަ ނިމިއްޖެ ކަމަށް އެމްޓީސީސީން ހާމަކޮށްފިއެވެ.
މި މަސައްކަތުގެ އެންމެ ފަހުގެ އަދާހަމަ ހާމަކުރަމުން، އެމްޓީސީސީން ބުނީ އެއްގަމު ތޮށި ލުމުގެ މަސައްކަތް މިހާރު ނިމިފައިވާ ކަމަށެވެ. އަދި ސައިޓުގައި މިހާރު ކުރިއަށްދަނީ އެއްގަމު ތޮށީގެ ކޮންކްރީޓް މަސައްކަތް ކަމުގައި އެމްޓީސީސީން ބުންޏެވެ.
ޑިޒައިން އެންޑް ބިލްޑް އުސޫލުން ޕްލޭނިން މިނިސްޓްރީއިން އެމްޓީސީސީއާއި ހަވާލުކުރި އެ މަސައްކަތް ނިންމަން ހަމަޖައްސާފައި ވަނީ އެއް އަހަރު ދުވަހުގެ ތެރޭގައެވެ.
އެ މަސައްކަތުގެ ދަށުން ގައްދޫ ބަނދަރުގެ 13،498 ކިއުބިކް މީޓަރު ސަރަހައްދަކާއި ބަނދަރަށް އިތުރު ކުރެވޭ ބައިގެ 9،519.20 ކިއުބިކް މީޓަރުގެ ސަރަހައްދު ފުންކުރަން ވަނީ ހަމަޖެހިފައެވެ.
ގައްދޫ ބަނދަރު މަރާމާތު ކުރުމުގެ ތެރެއިން، ބޮޑުހިލައިގެ ބޭރުތޮށި ޖަހާނީ 232 މީޓަރުގެ ސަރަހައްދެއްގައެވެ. އަދި 320 މީޓަރުގެ ސަރަހައްދެއްގައި އެއްގަމު ތޮށި ޖެހުމަށް ހަމަޖެހިފައި ވާކަމަށް އެމްޓީސީސީން ބުންޏެވެ.
މީގެ އިތުރުން މި މަޝްރޫއުގައި ހިމެނެނީ 35 މީޓަރުގެ ރިވެޓްމަންޓް ޖެހުމާއި ނެވިގޭޝަން ދެ ލައިޓް ހަރުކޮށް 25 މޫރިން ބޮއި ހަރުކުރުމުގެ އިތުރުން 1600 އަކަ މީޓަރުގެ ޕޭވްމަންޓް ހެދުމެވެ.
އެމްޓީސީސީން ބުނީ މި މަޝްރޫގެ ދަށުން ގައްދޫގައި 16 މަގުބައްތި ހަރުކޮށް ކޮންކްރީޓް ބްރިޖެއް އެޅުމަށް ހަމަޖެހިފައިވާ ކަމަށެވެ.
މިއީ 38.4 މިލިއަން ރުފިޔާގެ މަޝްރޫޢުއެކެވެ.