ރާއްޖޭގެ ބޮޑު ސަރަހައްދެއްގެ ކަނޑުތައް ގަދަވާނެ ކަމަށް ލަފާކޮށް ރާއްޖޭގެ މޫސުމާއި ބެހޭ ގައުމީ އިދާރާ (މެޓް)އިން ހުދު ސަމާލު ނެރެފިއެވެ.
މެޓް އޮފިހުން ހުދު ސަމާލު ނެރެފައި ވަނީ، ހއ. އަތޮޅުން ފެށިގެން މ އަތޮޅާއި ހަމައަށެވެ.
މެޓް އޮފީހުން ނެރުނު ސަމާލުގައި ބުނެފައި ވަނީ، ގަޑިއަކު 19 މޭލާއި 24 މޭލާއި ދެމެދުގެ ބާރުމިނެއްގައި ވައި ޖެހޭނެ ކަމަށާއި، ވިލާގަނޑުގައި ގަޑިއަކު 45 މޭލަށް ގައިގަދަވެ ކަނޑުތައް ގަދަވާނެ ކަމަށެވެ.
މި ސަމާލުގެ މުއްދަތު ހަމަވާނީ މިރޭ 21:45 ގައެވެ.
މެޓް އޮފީހުން މިއަދު ވިދާޅުވީ، އުތުރާއި މެދުތެރޭގެ އެކިހިސާބަށް ވިއްސާރަކުރާނެ ކަމަށެވެ. އަދި ބައެއް ރަށްތަކަށް ބޯކޮށް ވާރޭވެހި ގުގުރުން އެކަށީގެން ވާ ކަމަށެވެ.
އަދި ދިޔަވަރު ބޮޑުވާ ގަޑިތަކުގައި އުދައިގެއަސަރު ކުރުން އެކަށީގެންވާ ކަމަށްވެސް މެޓް އޮފީހުން ބުނެފައި ވެއެވެ.