މި އެކަޑަމީއަކީ އއ.މަތިވެރީގައި ޅަފުރާގެ ކުދިންގެ ހިތްތަކުގައި ފުޓްބޯޅައަށް ލޯބި އުފެއްދުމާއި، އެކުދިންގެ ހުނަރުތައް އެންމެ އެދެވޭ އަދި ބޭނުންތެރިގޮތެއްގައި އިތުރުކޮށް ފުރިހަމަކޮށްދިނުމާއި، ކުޅިވަރުގެ އަޚްލާޤު ދަސްކޮށްދިނުމުގެ މަގްސަދުގައި ފަށާ އެކަޑަމީއެކެވެ.

މީގެއިތުރުން ކުޅިވަރުގެ އަޚްލާޤް ކުދިންގެ ހިތްތަކުގައި އަށަގެންނެވުމުގެ އިތުރުން ދީނީގޮތުން ކުދިން ހޭލުންތެރިކުރުމަށް އިސްކަމެއް ދީގެން ކުރިޔަށް ގެންދާ ޕްރޮގްރާމްތަކެއް ވެސް މި އެކަޑަމީން ކުރިޔަށްގެންދަން ވަނީ ނިންމާފައެވެ.

މިއީ މަތިވެރީގައި މޮޅެތި، ހުނަރުވެރި ކުޅުންތެރިންތަކެއް އުފެއްދުމުގެ މަޤްޞަދުގައި އެ ރަށުގެ ތާރީޚުގައިވެސް މިފަދަ ގޮތަކަށް ފަށަން ތައްޔާރުވާ ފުރަތަމަ އެކަޑަމީއެވެ.

މަތިވެރިއަކީ ފުޓްބޯޅައިގައި ތާރީޚެއް އޮތް ރަށެކެވެ. ނަމަވެސް މިފަދަ ފުރުޞަތެއް ޅަފުރައިގެ ކުދިންނަށް މީގެ ކުރިން ލިބިފައި ނުވާއިރު، އެކަން ބަދަލުކޮށް ތާރީޚުގައި ފަވާލެވޭނެ ފަދަ މޮޅެތި ކުޅުންތެރިންތަކެއް އުފެދިގެން ދިއުމަކީ އެ އެކަޑަމީގެ ބޮޑު އަޒުމެކެވެ.

މާރންސް ޖަމިއްޔާ އުފެއްދުމުގެ މައިގަނޑު މަޤުޞަދުގެ ތެރޭގައި ރަށުގައި ކުޅޭ ކުޅިވަރުތަކުގައި މަތީފަންތީގެ ކުޅުންތެރިންތަކެއް މަތިވެރިން އުފެއްދުމަކީ އެޖަމިއްޔާގެ އެންމެ އިސްކަމެއް ކަމުގައި ދެކިގެން ކުރާނެ ކަމެއްކަމުގައި ޖަމިއްޔާގެ ނައިބު ރައީސް އާދަމް ނިޔާޒު ވިދާޅުވެއެވެ.

އެހެންކަމުން ރަށުގެ ކުރިއެރުމަށް މާރންސްގެ ފަރާތުން ކުރައްވާ މަސައްކަތްތަކަށް ރަށުގެ ރައްޔިތުންގެ ފަރާތުން ދެއްވާ އެއްބާރުލުމަށް އެޖަމިއްޔާގެ ފަރާތުން ވަނީ ޝުކުރުއަދާކޮށްފައެވެ.