ބޭންކް އޮފް މޯލްޑިވްސް (ބީއެމްއެލް)ގެ އެހީގައި ޤައުމީ ކުތުބުހާނާ އަށް ބޮޑު ބަދަލެއް ގެނެސްފިއެވެ.
ގައުމީ ކުތުބުހާނާ އަށް އެ ބޭންކްގެ އެހީގައި ގެނެވުނު ޒަމާނީ ބަދަލުތައް ބައްލަވާލެއްވުމަށް ބޭންކް އޮފް މޯލްޑިވްސްގެ ސީއީއޯ ކާރލް ސްޓުމްކަ މިއަދު ވަނީ ކުތުބުހާނާ އަށް ޒިޔާރަތްކުރައްވައި އެތަނުގައި މަސައްކަތް ހިނގަމުންދާ ގޮތް ބައްލަވާލެއްވިއެވެ.
އެ ބޭންކް އިން މައުލޫމާތު ދިންގޮތުގައި ބީއެމްއެލްގެ އެހީގައި އެތަނަށް ގެނެވުނު ބަދަލުތަކުގެ ތެރޭގައި، ފުރަތަމަ ފަހަރަށް ލައިބްރަރީގައި ޒަމާނީ ސެކިއުރިޓީ ގޭޓެއް ގާއިމު ކުރުމާއި ފޮތް ކިޔުމަށް އާންމުކޮށް ބޭނުންކުރާ ތަން ތަރައްގީ ކުރުމާއި ޒަމާނީ ވަސީލަތްތަކާ އެކު މުޅިން އަލަށް އޯޑިއޯ ރިކޯޑުކުރެވޭނެ ބޫތެއް ގާއިމް ކުރުން ހިމެނެއެވެ.
އޭގެ އިތުރުން، ގައުމީ ތަރިކައާ ގުޅުންހުރި ލިޔުންތަކާއި ފޮތްތައް ހުންނަ ކޮޓަރި ތަރައްގީކޮށްފައިވާއިރު، ލައިބްރަރީގައި ހުރި ފޮތްތަކާއި ލިއުންތައް ޑިޖިޓަލް ކުރުމުގެ މަސައްކަތަށް ބޭނުންވާ ހާއްސަ ސްކޭނަރެއް ބަހައްޓާފައި ވެއެވެ.