މެޗުގައި ފުރަތަމަ ލަނޑުޖަހާ ލީޑު ނަގާފައިވަނީ ވެސް ޔޫކްރެއިން އެވެ. ކެޕްޓަން ޒިންޗެންކޯ މި ލަނޑު ކާމިޔާބުކޮށްފައިވަނީ މެޗުގެ 27 ވަނަ މިނެޓުގައެވެ. މިއީ އޭރިއާ ތެރޭގައި ހުރެ ފޮނުވާލި ބާރު ހަމަލާއަކުން ކާމިޔާބުކުރި ލަނޑެކެވެ.
މި ގޯލަށްފަހު ސްވިޑަން އިން ކުރިޔަށްޖެހި އިތުރު ފުރުސަތުތަކެއް ތަނަވަސްކުރެވޭތޯ މަސައްކަތްތަކެއް ކުރިއެވެ. ނަތީޖާއެއްގެ ގޮތުން ފުރަތަމަ ހާފު ނިމެން ގާތްވެފައިވަނިކޮށް ސްވިޑަން ވަނީ ނަތީޖާ ހަމަހަމަކޮށްފައެވވެ. އޭރިއާ ބޭރުން ފޯސްބާގް ފޮނުވާލި ހަމަލާ ގޯލަށް ވަދެފައިވަނީ ޔޫކްރެއިން ކުޅުންތެރިއެއްގެ ފައިގައި ޖެހިފައި ބޯޅައިގެ މިސްރާބު ބަދަލުވެގެންނެވެ.
ދެވަނަ ހާފު ފެނުނީ ދާދި ހަމަހަމަކޮށެވެ. ސްވިޑަންގެ ފޯސްބާގް ނުރައްކާ ބޮޑުވެ، އޭނާ ފޮނުވާލި ދެ ހަމަލާއެއް ދަނޑިއަށް އަމާޒުވިއިރު، ޔޫކްރެއިންގެ ކުޅުންތެރިއެއް ފޮނުވާލި ހަމަލާވެސް ވަނީ ދަނޑިއަށް އަމާާޒުވެފައެވެ. މެޗުގެ ފުރިހަމަ ވަގުތު ހަމަވިއިރު ނަތީޖާ އެއްވަރުވުމުން ދެން ކުޅުނީ އިތުރުވަގުތުގެ ދެ ހާފެވެ.
އިތުރުވަގުތުގެ ފުރަތަމަ ހާފުގެ ކުރީކޮޅު ސްވިޑަން އަށް މައްސަލަތަކެއް ކުރިމަތިވީ ނުރައްކާތެރި ފައުލެއް ކުރުމާއި ގުޅިގެން އެ ޓީމުގެ ޑެނިއަލްސަން އަށް ރަތްކާޑު ދެއްކުމުންނެވެ. އެއް ކުޅުންތެރިއަކު މަދުކޮށް ކުޅެން ޖެހުމާއި އެކު ސްވިޑަން އަށް އުނދަގޫތަކަކާއި ކުރިމަތިލާން ޖެހުނު ތަން ފެނިގެންދިޔަ އެވެ.
ޔޫކްރެއިން މެޗު ކާމިޔާބުކުރި ލަނޑު ޖަހާފައިވަނީ މެޗުގެ އިތުުރުވަގުތުގެ ދެވަނަ ހާފު ނިމެން ގާތްވެފައިވަނިިކޮށެވެ. މި ލަނޑު އެ ޓީމަށް ކާމިޔާބުކށްދިނީ ޑޮވްބީކް އެވެ.