ދެމީހަކު ހުރިހާ ކަމެއް އެކަކު އަނެކަކާއި ހިއްސާކޮށްގެން އުމުރު ދުވަހު އުޅުން އެއީ ފަސޭހަ ކަމެއް ނޫނެވެ. ރަނގަޅަށް، ޒުވާބުނުކޮށް، ހިތްހަމަނުޖެހުމެއް ފާޅުނުކޮށް އުޅެން މީހަކު ކައިރީ ބުނުން އެއީ ކުރަން ވަރަށް ފަސޭހަ ކަމެކެވެ. ނަމަވެސް އަމަލުން އެކަން ދެއްކުން އެއީ ބަހެއް ބުނުމަށް ވުރެ މާއުނދަގޫ ކަމެކެވެ. އެއް ސަބަބަކީ އެކަކަށް ރަނގަޅު ގޮތް އަނެކަކަށް ނޭނގުމެވެ. އޭގެ އިތުރަށް ވެސް ބައެއް ސަބަބުތައް ހުރެއެވެ. އެވާހަކަ ދައްކާނީ ފަހުންނެވެ.

މިހާރު މިކިޔައި ދެނީ އަންހެން ކުދިންނަށް ހާއްސަ ވާހަކައެކެވެ. ޒުވާން އަންހެން ކުއްޖަކު އޭނާގެ ލޯބިވެރިޔާ އަށް އެންމެ ރަނގަޅު ލޯބިވެރިޔާ އަށް ވާނީ ކިހިނެއް ހެއްޔެވެ؟

ސީދަލަށް ބުނުން

އެއްވެސް މީހަކީ އަނެކާގެ ހިތުގައި އޮންނަ އެއްޗެއް އެނގޭނެ މީހެއް ނޫނެވެ. ހާއްސަކޮށް ބައެއް އަންހެން ކުދިންނަކީ ގިނަ ކަންކަން އަނގައިން ނުބުނެ ލޯބިވެރިޔާ ލައްވައި ކުރުވަން ބޭނުންވާ މީހުންނެވެ. ނަމަވެސް އެއީ ގޯހެކެވެ. ރަނގަޅު ލޯބިވެރިންނަކީ ކޮންމެ ވާހަކައެއް ވެސް ޑައިރެކްޓްކޮށް ލޯބިވެރިޔާ ކައިރީ ބުނާ މީހުންނެވެ. ނަމަވެސް ކޮންމެ ވާހަކައެއް ބުނަން ވާނީ ރުޅި އައިސްފައި ހުރެގެންނެއް ނޫނެވެ. ކުރަން ބޭނުންވާ ކަމެއް، ނުވަތަ ނުކޮށް ދޫކޮށްލަން ބޭނުންވާ ކަމެއް ސީދަލަށް ބުނާ އަންހެނުން ދެކެ ފިރިހެނުން ވަރަށް ގަޔާވާނެއެވެ.

އޭނާ ކުރާ ކަންތައް ފާހަގަ ކުރުން

ލޯބިވެރިޔާ ކުރާ ކަންތައް ފާހަގަ ކުރުމަކީ ވަރަށް މުހިއްމު ކަމެކެވެ. ރަނގަޅު ކަމެއް ކުރުމުން އެކަން ފާހަގަ ކޮށް އޭނާ އަށް ޝުކުރު އަދާކުރަން ކޮންމެ ފަހަރަކު ވެސް ހަނދާން ކުރާށެވެ. އެއީ އެންމެ އިސްކަން ދޭންޖެހޭ އެއްކަމެވެ.

އޭނާ އަށް ޖާގަ ދިނުން

ތިބާގެ ހިތުގައި އޮތް އެއް ވާހަކައެއް ބުނަން އަހަރެންނަށް އެނގިދާނެއެވެ. އެއީ ތިބާ އަކީ އަންހެން ކުއްޖަކަށް ވާނަމަ އެހެން އަންހެން ކުއްޖަކާއި ތިބާގެ ލޯބިވެރިޔާ މާގާތް ރަހުމަތްތެރިކަމެއް ބާއްވަން ތިބާ ބޭނުމެއް ނުވާނެއެވެ. އަދި ބައެއް އަންހެން ކުދިންނަކީ އެއްވެސް ވަރަކަށް އޭނާގެ ލޯބިވެރިޔާ އަންހެން ކުދިންނާއި ވާހަކަ ދެއްކުމުގެ ފުރުސަތު ވެސް ދޭން ބޭނުންވާ ބައެއް ނޫނެވެ. ނަމަވެސް އެއީ ގޯހެކެވެ. ލޯބިވެރިޔާ އަށް މިނިވަންކަމާއި އިހްތިޔާރު ދޭން ވާނެއެވެ. އިތުބާރާއި ޔަގީންކަން ހޯދާނީ އެމިނިވަންކަން ދީގެންނެވެ.

ކޮންމެ މައްސަލައެއް ލޯބިވެރިޔާ ކައިރިއަށް ނުގެންދިއުން

ތިއީ އެކުގައި އުމުރު ދުވަހު އުޅެން ނިއަތް ގަނެގެން ތިބި ދެމީހުންނެވެ. ނަމަވެސް ލޯބިވެރިޔާ އަކީ އަދި ތިބާގެ ބަލަދުވެރިޔާއެއް ނޫނެވެ. އެހެންކަމުން ކޮންމެ މައްސަލައެއްގެ ހައްލު ހޯދަން ލޯބިވެރިޔާ ކައިރިއަށް ނުދާށެވެ. އަމިއްލަ އަށް ތިބާ އަށް ވެސް ހައްލު ކުރެވޭނެ މައްސަލަތައް ހުންނާނެއެވެ. އެމައްސަލަތައް އަމިއްލަ އަށް ހައްލު ކުރާށެވެ.

ހިނިތުންވުން

ހިނިތުންވުމަކީ ވަރަށް މުހިންމު ކަމެކެވެ. ކޮންމެ ދުވަހަކު އެތައް ފަހަރަކު ބައްދަލުވާ މީހަކަށް ކޮންމެހެން ހިނިތުންވާން ޖެހޭތޯ ބައެއް ފަހަރު ސުވާލު އުފެދިދާނެއެވެ. ޖަވާބަކީ އާނއެކެވެ. އެއީ ކޮންމެ ދުވަހަކު ކިތަންމެ ފަހަރަކު ކުރަން ޖެހޭ ކަމެކެވެ.

ނިންމާލަކުން ބުނަމެވެ. ވަރުގަދަ ލޯބީގެ ގުޅުމެއް ފައްކާވުމަށް އެތައް ސަބަބެއް ބޭނުންވެއެވެ. އެހުރިހާ ސަބަބެއްގައި ހިފައިގެން ނޫން ގޮތަކަށް ލޯބީގެ ގުޅުން ވަރުގަދައެއް ނުކުރެވޭނެއެވެ.

ކިޔުންތެރިންގެ ހިޔާލު